HECHOS 26 - Quichua Imbabura 2016

Pabloca, “cacharihuachun yashpami” Agripa shuti mandajman villashca

1Chai jipami, Mandaj Agripaca, Pablotaca:

“Canllata rimailla” nirca.

Shina nijpimi, “cacharihuachun yashpa” Pabloca, maquita jahuaman chutashpa, cashna ni callarirca:

2“Mandaj Agripalla, judiocuna imatapash nishpa juchachishcatami cunanga, imashnapacha cashcata cambaj ñaupapi cushijushpa villagrini.

3Ashtahuambachaca, judiocuna imata rurashpa causajtapash, paicunapura imata ninajushcatapash, canllata tucuita alimi yachapangui. Chaimandami: ‘Ñuca villajujtaca, ama ñapash fiñarishpa uyapai’ nishpa mañapani.

Pabloca, pai imashna causashcatami villajushca

4Ñuca llactapipash, Jerusalenbipash, huambra cashcamandapacha, ñuca imashna causashcataca, judiocunapash, tucuillami alipacha yachahuan.

5Paicunaca, ñucataca, callarimandapacha fariseopura cajtaca alimi yachan. Shina cashpami, ñucanchi imata crishcatapash aligutapacha tucuita pactachini. Caicunata villangapa munashpaca villachunlla.

6Ñucanchi ñaupaj taitacunaman, Taita Dios ‘carashapacha’ nishcata crishpami cushijushpa shuyajuni. Chaimandami, cunanga, imatalla rurashcata ricuchingapa cayai tucushcani.

7Dios cushapacha nishcataca ‘pactachingami’ nishpami, ñucanchi chunga ishcai ayllucunaca shuyanajun. Shina cashpami, paicunapash tutandi, punllandi Taita Diospajta ruranajun. Ñucapash, chaitami cushijushpa shuyajuni. Mandaj Agripalla. Judiocunaca, chaimandallami chashna juchachihuan.

8¡Imashnatayari! ¿Huañushcacunata Taita Dios causachinataca, cangunapurapica imashpata na cringuichi?

Crijcunata llaquichishpa purishcatami, Pabloca villashca

9Nazaret pueblomanda Jesusta crijcunataca, ninanda fiñashpa llaquichinami cani yashpami causarcani.

10Shinami Jerusalenbipash llaquichircani. Chaita rurangapaca, sacerdotecunata mandajcunata ushaita mañashpami, Diospajlla causajcunataca, ashtacacunata prezuchijurcani. Huañuchinajujpipash, ‘alitami ruranguichi’ nijun carcani.

11Paicuna Jesusta crishcata saquichunmi, sinagogacunaman yaicushpa cutin cutin ninanda llaquichijurcani. Paicunahuanga, ninandapacha fiñarishca cashpami, caru llactacunamambash rishpa, chai pueblocunapipash catiriyashpa llaquichijurcani.

Imashna pai crishcatapash Pabloca, cutinmi villashca(Hech. 9:1-19; 22:6-16)

12Chashna llaquichingapa yariajlla cashpami, sacerdotecunata mandajcuna ushaita cushpa cachajpi, Damasco puebloman rijurcani.

13Jatun mandajlla. Ña chaupi punlla cajpi, ñanda rinajushpami, inditapash yali micha punchapamba jahua pachamanda shitamujta ricurcani. Chai michami ñucatapash, ñanda ñucahuan rinajujcunatapash chaupipi churarca.

14Shina cajpi alpaman tucuilla urmashca cashpami, hebreo rimaipi cashna nishpa rimajta uyarcani: ‘Saulo, Saulo, ¿imamandata catiriyashpa llaquichihuangui? Canllatami, racu aujapi tujsirijshna, ninan llaquita apagringui’ nijtami uyarcani.

15Shina nijpica: ‘¿Pita capangui, mandaj Taitalla?’ nircanimi. Shina nijpimi Apunchi Jesusca, cashna nihuarca: ‘Can catiriyashpa llaquichijuj Jesusmi cani.

16Cunanga jatarishpa shayarilla. Cunanbi imata ricushcatapash, jipaman imata ricunatapash villashpa, ñucapajta rurachunmi, canman ricurircani.

17Cambaj llactapura gentecunamambash, na Israelcunamambash villachunmi, candaca cachagrini. Paicuna llaquichingapa munajpipash, candaca ñucami cacharichisha.

18Paicunaca, Satanás mandajujpimi, yana tutapishna causanajun. Paicunataca, canmi, ñavita pascajshna michata ricushpa, Taita Diosta catichun yachachingui. Paicunaca, ñucata crishpa, jucha illaj saquirishpami, Dios carashapacha nishcataca, paipajlla tucushcacunahuan pacta japinajunga’ nihuarcami.

Muscuipishna ricushcatami, Pabloca cazushca

19Mandaj Agripalla. Chaimandami, jahua pachamanda muscuipishna ricurimushcataca, imatapash na nishpa cazurcanilla.

20Shina cashpami, Damasco pueblopira villai callarircani. Chai jipami, Jerusalenbipash, tucui Judea llactapipash, shuj llactacunapi na Israelcunamambash, cashna nishpa villajurcani: ‘Taita Diospajman llaquirishpa tigrarinami canguichi. Na alita rurashpa causajushcata saquishpa, aligutami causana canguichi’ nishpami villajurcani.

21Chaimandami, judiocuna Diospaj huasipi japij shamushpa, ñucataca huañuchingapa munarca.

22Ashtahuangarin ñucataca, Taita Dios ricuriajujpillami, cunangaman catijuni. Shina cashpami, huajchacunamambash, charijcunamambash villajuni. Jipaman ima tucunataca, profetacunapash, Moisespashmi villanajushca, chaitallatami ñucapash cashna nishpa villajuni:

23‘Cristoca, huañuchi tucushpapash, huañushcacunapaj chaupimanda pundami causarina carca. Israelcunaman, na Israelcunamambash, paillata michashna cajta villangapami, causarina carca’ nishpami villanajushca” nircami.

Mandaj Agripa crichunmi, Pabloca villashca

24Cacharihuachun yashpa Pablo villajujpimi Festo runaca, cashna nishpa ninanda caparirca:

“Pabloca, juizu illajmari tucushcangui. Canga, ninanda yachajushca cashpami, juizu illaj tigrashcangui” nircami.

25Shina nijpimi Pabloca, cashna nirca:

“Ninanda alicachi tucushca mandaj Festolla. Juizu illaimandaca na cashna nijunichu. Ashtahuangarin, na llullashpami, ali yuyaihuambacha villajuni.

26Chaitaca, jatun mandajpash alimi yachapan. Shina cajpimi na manllashpa, paipaj ñaupajpi cai shimicunataca villajuni. Caicunaca, na maipipash pacalla chashna tucushcachu.

27Mandaj Agripalla. ¿Profetacuna villashcataca nachu cripangui? Paicuna villashcataca, cambash cringuipachami yanimi” nircami.

28Shina nijpimi, mandaj Agripaca, Pablotaca:

“Ashamandallami ñucataca, Cristota catichun crichihuangui” nirca.

29Shina nijpimi Pabloca, cashna nirca:

“Ashamandalla crijpi, na crijpipash, canda ñucashna crij cachun, Taita Dios munashcanman yanimi. Shinallata, caipi tucuilla ñucata uyajcunatapash, crij tucushcanman yanimi. Ñucashna, cadenahuan cashna huatai tucuchunllami na munani” nircami.

30Shina tucuita Pablo nijpimi, mandaj Agripaca, Festo runandi, Berenice shuti huarmindi, chaipi tiyanajuj gentecunandi jatarirca.

31Chai ucumanda llujshishpaca, paicunapurallami cashna nishpa parlarinajurca:

“Huañuchi tucungapapash, prezuna huasipi churai tucungapapash, cai runaca ima na alitapash na rurashcachu cashca” ninajurcami.

32Shina parlarishpami mandaj Agripaca, Festo runataca cashna nirca:

“Cai runaca: ‘Jatun mandaj Cesarmi, ñucataca tapuchihuanga’ nircami. Na shina nishca cajpica, cacharimanllami carcani” nircami.