JUDAS 1 - Quichua Imbabura 2016

“Alillachu capanguichi” nishcami

1Jesucristopajta ruraj, Jacobopaj huauqui Judasmi cani. Taita Diospaj juyaimanda, Jesucristohuan shujlla tucushpa, Paipajlla causaj crijcunamanmi quilcamuni.

2Cangunapica, ninanda llaquinapash, ali causaigupash, juyaipash, ashtahuan mirachunmi munani.

Panda yachachishcamandapash, llullashpa yachachijcunamandapash(2 Ped. 2:1-17)

3Juyashca crijcuna, tucui ñucanchita Dios quishpichishcatami, quilcangapa ninanda munajurcani. Cunanga, canguna crishpa, Diospajlla tucushcata na saquishpa catichunmi, shinllitapacha tacurishpa, quilcanapacha cajpi quilcamuni.

4Huaquin runacunaca, ñamari pacalla yaicumushca. Pundamandapacha llaquichi tucuna, na ali runacunami yaicumushca. Paicunaca, Taita Diospaj ninan juyaitapash, Taita Diospaj ushaitapash, ñucanchita Quishpichij Apunchi Jesucristotapash, yangapi churashpami, na alicunata rurashpa purinajun.

5Cangunataca, yachashca cajpipash, cutin yarichingapami munani: Jatun Diosca, Pai agllashcacunata Egiptomanda llujchishpa quishpichishpapash, Paita na cazujpica tucuchishcatami villajuni.

6Angelcunaca, paicuna mandai ushanata saquishpami, paicuna maipi causanajushcatapash saquishpa shamurca. Shinamandami paicunataca, ninanda llaquichina punlla chayamungacaman, yana yana ucupi prezu charijun.

7Sodoma, Gomorra pueblocunapi causajcunapash, chai quimirialla shuj pueblocunapi causajcunapash, chai angelcunashnami, paicunapurallata huainayashpa, na rurana jatun na alicunata ruranajushca. Shinamandami, causaita causaicaman rupajuj ninahuan ninanda llaquichi tucurca. Cunambi ama chashna causachun ricuchingapami chashna tucushca.

8Chai pandata yachachijcunaca, paicunapaj na ali yuyaicunata catishpami, paicunallata llaquiman rinajun. Paicunaca, Taita Diospaj ninan ushaitapash na cazushpami, mandana ushaita charijcunatapash na cazushpa, na ali shimicunata rimanajun.

9Angelcunata mandaj ángel Miguelca, Moisespaj cuerpoguta, diablohuan quichurijushpapash, diablota ninan llaquiman cachangapaca, ima na alitapash na rimarcachu. Ashtahuangarin: “Candaca, Jatun Diosmi llaquichinga” nircami.

10Ashtahuangarin, chai pandata yachachijcunaca, napash yachashpatami na ali shimicunata rimanajun. Shinallata, imatapash ali yachashca jahuami, imatapash na yachaj animalcunashna, paicunallata llaquiman ringapa, na alitalla ruranajun.

11¡Aij, paicunaca imachari tucunga! Caín runapaj ñandamari catinajun. Balaam runashnamari, culquimandalla pandanajun. Na cazushpa huañuchi tucushca Coré runashnami, chingaita chingagrinajun.

12Chai runacunaca, crijpuralla micungapa tandanajushcapi, pingaitapash na pingashpami, paicunallata alipi ricurishpa, tucui na alicunata ruranajun. Paicunaca, yacu illaj fuyuta, caiman chaiman huaira apajpishnami purinajun. Fucui punllacuna chayajpi, na fucuj quiruta, cutin cutin chaquijpi, sapindi llujchishpa shitashcashnami.

13Paicunapaj pinganayai rurashcacunaca, mama cucha yacuta huaira caiman chaiman shitajujpi, yacu putsuju tucushcashnami. Paicunaca, caita chaita pandashpa rinajuj luzerocunashna, yana yanata rishpa chingagrishpa tucurinashnami.

14Enocca, Adanmandaca, canchis miraimi cashca. Paica, chai na ali runacunamandaca cashna nishpami villajushca: “Uyaichi, paipajlla causaj huaranga huaranga angelcunahuan, Mandaj Dios shamujujtami ricurcani.

15Diosta na manllaj runacuna, jatun na alicuna cashpa, tucui na alita rurashpa causashcamanda llaquichi tucunapacha cashcamanda, tucuicunata llaquichingapami shamurca. Shinallata, chai na ali gentecuna, na ali shimicunata Diosta rimashcamanda llaquichingapami shamurca” nishcami.

16Chai pandata yachachijcunaca, huasha parlashpa, na alicachishpami, paicunapaj munaitalla rurashpa purinajun. Ninanda jariyashpami, shimi cacharishcata rimanajun. Paicuna imatapash japingapallami, pitapash cushi cushi rimaj tucunajun.

Aliguta yarichishpa rimashcami

17Juyashca crijcuna, ñucanchi Apunchi Jesucristomanda, apostolcuna villashca shimicunataca yariashpa causapanguichi ninimi.

18Paicunami, cashna villanajurca: “Tucurimui punllacunapica, na alicachishpa, asishpa ricujcunami tiyanga. Paicunaca, paicunapaj na ali munaicunatalla rurashpami causanajunga” ninajurcami.

19Paicunami, tandanajushca crijcunataca shicanyachinajun. Paicunaca, aicha munaitalla yarishpa causashpami, Diospaj Espiritutaca na charin.

20Ashtahuangarin juyashca crijcuna, cangunaman Diospajlla causachun crinata caramushcataca, ashtahuan aliguta catishpami, jucha illaj Espíritu yuyaita cujpi, Diosta mañana canguichi.

21Taita Diospaj juyaihuanmi causana canguichi. Causaita causagrinata, ñucanchi Apunchi Jesucristo llaquishpa carana punllacaman shuyashpa causaichi.

22Ishcai shungu tucushpa purijcunamambash, aliguta cringacaman yachachipaichi.

23Ninapi rupangapa rinajujcunataca, ninamanda aisashpa llujchijshna quishpichipaichi. Shujcunatapash, manllaihuan llaquishpa charipaichi. Aicha munaitalla rurashpa, churajunata mapayachijshna, paicunapaj na ali causaimandaca anchurinami canguichi.

Taita Diosta alicachishcamanda

24Ninan ushaita charij Diosmi, ñucanchitaca, ima na alipipash ama urmachun huacaichishpa charinga. Shinami ñucanchitaca, ima mapapash illajta, Pai punchapamba tiyajuj ñaupajman pushajpi ninanda cushijushunchi.

25Taita Diosca, ñucanchita Quishpichij, tucuita yachaj, shujlla Diosmi. Paitami cunambash, causaita causaicamambash: “Ninan ushaitami charingui, mandana ushaitapashmi charingui, tucuita rurai ushajmi cangui, tucuita mandajmari cangui” nina canchi. Chashna cachun.