1Tucuita Mandaj Jatun Diosca,
Jerusalendapash, Judá llactatapash na ashtahuan shinlliyachishpa catingachu.
Shinallata, micunatapash, yacutapash na ashtahuan carangachu.
2Shinallata, macanajunata ali yachaj runatapash, jueztapash,
profetatapash, yachajtapash, mandaj rucutapash,
3picha chunga macanajuj runacunata mandajtapash,
alicachi tucushca runatapash, ali yuyaita cuj runatapash,
imatapash juyailla ruranata yachajtapash, juyailla shimicunata rimajtapashmi anchuchinga.
4Shinallata, chairalla viñai huambracunatami mandachun churasha.
Huambracunami, tucuita mandanajunga.
5Shina cajpimi, caishuj chaishuj macanajui callaringa.
Huambracunaca, rucucunatami llaquichinga.
Yanga runacuna jatarishpami, alicachi tucushca runacunata llaquichinga.
6Chashna llaquicuna tiyajpimi,
paipaj taitapaj ayllupuramanda maijandapash cashna ninajunga:
“Canga, ali churajunatallapash charinguimi.
Ñucanchipaj mandaj tucushpa, cai llaquicunataca alichipai” ninajungami.
7Shina nijpimi chai runaca:
“Ñuca huasipica ima churajunata, ima micunatapash na charinichu.
Cai llaquicunata alichingapaca, napacha ushashachu.
Ñucataca, gentecunata mandachunga, na churanachu cahuanguichi” ningami.
8Jerusalenga, tucuilla tucurishca, Judá llactapash urmashcami.
Paicunaca, Mandaj Jatun Diosta na cazushpa fiñachishcamandami, chashna tucushca.
9Paicuna juchapi causanajujtaca ricunallami.
Sodoma pueblopi causajcunashnami, tucuicuna ricujta juchata ruranajun.
¡Aij, paicunaca imachari tucunga!
Paicunallata, jatun llaquita apangapami juchata mirachinajun.
10Alitalla rurashpa causajtaca, alicachinami canguichi.
Paica, ali cashcamandami, imagutapash charinga.
11¡Aij, Diosta na manllaj runalla! Jatun llaquitami apanga.
Paipaj na alita rurashcamandami, llaquichi tucunga.
12Ñuca llactataca, chairalla huambracuna, huarmicunami mandanajun.
Paicuna mandanajushpami, ñuca pueblotaca, na ali pushai ushashpa llaquiman apanajun.
13Mandaj Diosmi, tucui gentecuna imatalla rurashcatapash,
tapuchishpa llaquichingapa shayajun.
14Mandaj Diosca, pai agllashcacunata mandanajuj rucucunatapash,
mandajcunatapash llaquichingapami shamunga.
Cangunami, uva chagracunata quichushpa micurcanguichi.
Huajchacunata imata quichushcatapash,
cangunapaj huasicunapimi charinguichi.
15Tucuita Mandaj Jatun Diosmi, cashna nin:
Cangunaca “¿Imashpata, Ñuca agllashca pueblopi huajchacunataca, ninanda llaquichinguichi?” ninmi.
Sion pueblopi causaj huarmicunata llaquichinamanda16Mandaj Diosca, cashnatapashmi nin:
“Sion pueblopi causanajuj huarmicunaca, jariyashpa,
jatun tucushpa, pingai illajmi purinajun.
Tushurinman purishpami, chaquipi churajushcacunapash uyarijta rinajun” ninmi.
17Shinamandami Mandaj Diosca, Sionbi causaj huarmicunataca,
ungüita cachamushpa, ajchataca tucuilla anchuchinga.
Mandaj Diosca chashna rurashpami, paicunataca pingaichinga.
18Chai punllapica Jatun Diosca,
paicuna chaquipi churajushcatapash,
ajchapi tucui churarinacunatapash,
19hualcacunatapash, zarcillocunatapash, maqui huatarinacunatapash,
20umata quilparinatapash, chaquipi huatarinacunatapash,
ajchapi churarinatapash,
mishquilla ashnajun jambitapash, uchilla zarcillocunatapash,
21surtijacunatapash, singapi churajunatapashmi anchuchinga.
22Shinallata, juyailla churajunacunatapash, jahualla fachalishcacunatapash,
ñavita quilparinacunatapash, aisana muchilacunatapash,
23espejocunatapash, ashtahuan ali linocunatapash,
uma huatarinacunatapash, jahualla quilparinacunatapashmi anchuchinga.
24Mishquilla ashnajungapa randica, millanayaitami ashnajunga.
Chumbipaj randica, huascahuanmi huataringa.
Juyailla ajchata charingapa randica, ajcha illaj huarmicunami tucunga.
Juyailla churajunapaj randica, cañamutami churajunajunga.
Juyailla ñavigu cangapa randica, rupashca ñavimi ricujunga.
25Jaricunaca, espadahuanmi huañuchi tucunga.
Cangunapaj shinlli runacunapash, jatun macanajuipimi huañunga.
26Pueblopi causajcunapash ninan llaqui tiyajpimi, caparishpa huacanajunga.
Jichushca saquirishca cashpami, alpapi tucuilla urmanga.
Who We AreWhat We EelieveWhat We Do
2025 by iamachristian.org,Inc All rights reserved.
