1Davidca, pai causana huasicunatami, paipaj pueblopi huasichirca. Shinallata, Diospaj arcata churangapapash, shuj pushtuta agllashpami, shuj carpata shayachirca.
2Chai jipami, Davidca cashna nirca: “Taita Diospaj arcataca, pipash na apangachu, levitacunallami apai ushanga. Mandaj Diosca, paicunatallami Mandaj Diospaj arcata apachumbash, tucui causaipi Paipajta rurachumbash agllashca” nircami.
3Chai jipami Davidca, Pai shayachishca carpaman, Mandaj Diospaj arcata yalichishpa, maipi churana pushtupillata churangapa, tucui Israelcunata Jerusalenman tandachirca.
4Aaronbaj churicunatapash, levitacunatapashmi Davidca tandachirca.
5Coat shuti runapaj miraimandaca, paicunata mandaj Uriel shuti runami, patsaj ishcai chunga huauquicunandi shamurca.
6Merari shuti runapaj miraimandaca, paicunata mandaj Asaías shuti runami, ishcai patsaj ishcai chunga huauquicunandi shamurca.
7Gersonbaj miraimandaca, paicunata mandaj Joel shuti runami, patsaj quimsa chunga huauquicunandi shamurca.
8Elizafán shuti runapaj miraimandaca, paicunata mandaj Semaías shuti runami, ishcai patsaj huauquicunandi shamurca.
9Hebrón shuti runapaj miraimandaca, paicunata mandaj Eliel shuti runami, pusaj chunga levitacunandi shamurca.
10Uziel shuti runapaj miraimandaca, paicunata mandaj Aminadab runami, patsaj chunga ishcai levitacunandi shamurca.
11Davidca, Sadoc shuti, Abiatar shuti sacerdotecunata, Uriel, Asaías, Joel, Semaías, Eliel, Aminadab shuti levitacunatapashmi cayarca.
12Paicunatami cashna nijurca: “Cangunami, levitacunapaj ayllucunata mandaj taitacuna canguichi. Chaimandami, Israelcunata Mandaj Taita Diospaj arcata, ñuca shayachishca carpaman yalichimungapaca, cangunapash, cangunapaj huauquicunapash alichirishpa Diospajlla tucuna canguichi.
13Pundaca, canguna na chashna alichirishca cajpimi, ñucanchita Mandaj Taita Diosca llaquichirca. Pai mandashcashna, Paita na cazujpimi, chashna rurarca” nijurcami.
14Israelcunata Mandaj Taita Diospaj arcata Jerusalenman apamungapaca, chashnami sacerdotecunapash, levitacunapash, Diospajlla tucushpa alichirinajurca.
15Taita Diospaj arcataca, levitacunami, Mandaj Dios mandashcata, Moisés yachachishcashna, caspicunapi churashpa, rigrapi apamunajurca.
16Davidca, levitacunata mandajcunataca cashnatapashmi nijurca: “Salteriocunata, arpacunata, platillocunata taquishpa, cushijuihuan shinlli candashpa rinajuchunga, cangunapaj huauquicunata agllashpa churaichi” nircami.
17Shina nijpimi levitacunaca, Joel runapaj churi Hemán shuti runata agllarca. Shinallata, paicunapaj ayllumandaca, Berequías shuti runapaj churi Asaf runatami agllarca. Merari shuti runapaj ayllumandaca, Cusaías shuti runapaj churi Etán shuti runatami agllarca.
18Pungupi ricushpa yanapachunga: Zacarías, Jaaziel, Semiramot, Jeiel, Uni, Eliab, Benaía, Maasías, Matatías, Elifelehu, Micnías shuti huauquicunatami agllarca. Obed-edom shuti, Jeiel shuti levitacunatami, churarca.
19Shinami, Hemán, Asaf, Etán shuti candajcunaca, bronce platillocunata huactashpa candanajun carca.
20Zacarías, Aziel, Semiramot, Jehiel, Uni, Eliab, Maasías, Benaía shuti levitacunaca, salteriocunatami, ashtahuan ñañulla Alamot shuti taquipi taquinajun carca.
21Matatías, Elifelehu, Micnías, Obed-edom, Jeiel, Azazías shuti levitacunaca, arpacunatami ashtahuan raculla taquipi taquishpa candachinajun carca.
22Tucui levitacunata ashtahuan yali candanacunata yachaj Quenanías shuti runatami, candanata yachachijuchun churarca. Paica, taquinata alipacha yachajmi carca.
23Diospaj arcataca, Berequías shuti, Elcana shuti levitacunami ricunajurca.
24Shinallata, Sebanías, Josafat, Natanael, Amasai, Zacarías, Benaía, Eliezer shuti sacerdotecunaca, Taita Diospaj arca ñaupajpimi, trompetata huacachinajurca. Obed-edom shuti, Jehías shuti levitacunapash, Diospaj arcata ricujcunallatami carca.
25Davidpash, Israelcunata mandaj rucucunapash, macanajuj runacunata mandajcunapash cushijushpami, Obed-edom shuti runapaj huasimandaca, Mandaj Dioshuan ari ninajushpa quilcashcata alichishca arcata apamungapa rinajurca.
26Mandaj Dioshuan ari ninajushpa quilcashcata alichishca arcata apanajun levitacunaca, Taita Dios paicunata huacaichijujpimi, canchis maltun shicucunata, canchis jari llamacunata Diosman cushpa huañuchinajurca.
27Davidca, ashtahuan ali linota rurashca churajunatami churajushca carca. Shinallata, arcata apanajun levitacunapash, candaj levitacunapash, chai candajcunata yachachij Quenanías shuti runapashmi, chashnallata ali churajunata churajushca carca. Davidca, linota rurashca efodtapashmi churajushca carca.
28Chashnami, Mandaj Dioshuan ari ninajushpa quilcashcata alichishca arcataca, tucui Israelcuna, ninan cushijuihuan shinllita candashpa apamunajurca. Paicunaca, cachucunata, trompetacunata, platillocunata, salteriocunata, arpacunatapashmi, shinllita taquishpa rinajurca.
29Ashtahuangarin, Mandaj Dioshuan ari ninajushpa quilcashcata alichishca arcahuan, Davidpaj puebloman ña chayajpimi, Saulpaj ushi Mical shuti huarmica, shuj ventanamanda ricujurca. Paica, jatun mandaj David fahuashpa, tushushpa shamujujta ricushpami, paipaj shungupica, ninanda na alicachishpa ricujurca.
Who We AreWhat We EelieveWhat We Do
2025 by iamachristian.org,Inc All rights reserved.
