LEVÍTICO 10 - Quichua Imbabura 2016

Nadab shuti, Abiú shuti runacunapaj juchamanda

1Aaronbaj churi, Nadab shuti, Abiú shuti sacerdotecunaca, paicuna inciensota cushnichinata japishpami inciensota churashpa, Mandaj Diospaj ñaupajpica, napash mandashca cajpita rupachinajurca.

2Chaimandami, Mandaj Diospaj ñaupajmanda nina llujshishpa, paicunata rupachijpi, Mandaj Diospaj ñaupajpi huañurca.

3Shinamandami Moisesca, Aarondaca cashna nijurca:

“Cashna tucunamandami, Mandaj Diosca cashna nishpa villarca: ‘Ñuca jucha illaj cajtaca, Ñucapajman quimirijcunamanmi ricuchisha. Tucui gentecunapaj ñaupajpimi, ninanda alicachi tucusha’ nishpami villarca” nijurcami.

Shina nijpica, Aaronga upalla saquirircallami.

4Moisesca, Aaronbaj taitapaj huauqui Uziel shuti runapaj churicunatami cayarca. Paicunaca Misael shuti, Elzafán shuticunami carca. Paicunatami cashna nirca:

“Cangunapaj huauquicunataca, Diospajlla carpa ucumanda llujchishpa, cai carpacunamanda caruman apaichi” nircami.

5Shina nijpi paicuna quimirishpami, chai huañushcacunataca, Moisés mandashcashna paicunapaj túnica churajunacunandi, carpacunamanda caruman apanajurca.

6Chai jipami Moisesca, Aarondapash, Eleazar shuti, Itamar shuti, Aaronbaj churicunatapash cashna nijurca:

“Paicuna huañushcamanda ninanda llaquirishcata ama ricuchingapaca, umapi churajushcataca na anchuchinachu canguichi. Canguna churajushcatapash na liquinachu canguichi. Cangunapash ama huañungapa, tandanajushca tucui Israelcunatapash, Dios ama ninanda fiñachunmi, na chashna rurana canguichi. Ashtahuangarin, Mandaj Dios rupachishcamandaca, cangunapaj huauquicunapash, tucui Israelcunapashmi huacanajunga.

7Cangunaca, Dioshuan tuparina jatun carpa pungumandaca na llujshinachu canguichi. Chaimanda llujshishpaca huañunguichimi. Cangunaca, Mandaj Diospaj aceitehuan javi tucushca cashpami, na chashna rurana canguichi” nircami.

Paicunaca, Moisés imashna nishcashnami ruranajurca.

8Mandaj Diosca, Aarondaca cashnami nirca:

9“Ñucahuan tuparina jatun carpaman yaicushpaca, canguna ama huañungapaca, cambash, cambaj churicunapash, vinota, sidrataca na ufianachu canguichi. Chai mandashcacunaca, cangunapaj miraicunapash, tucui causaipi pactachingapami canga.

10Ñucapajlla shicanyachishca cajta, na chashna cajtapash, mapa cajta, mapa illaj cajtapash yachai ushangapami canga.

11Shinallata, pactachinajuchun Mandaj Dios cushca, mandashca shimicunataca Moisesmi, Israelcunaman yachachina carca” nijurcami.

12Chai jipami Moisesca, Aarondapash, Eleazar shuti, Itamar shuti Aaronbaj caishuj churicunatapash cashna nijurca:

“Mandaj Diosman granocunata ofrendashpa rupachishcamanda puchushcataca, altarman chayanapi levadura illajta micunguichi. Chaicunaca, Diospajlla shicanyachishcapacha cajpimi chashna rurana canguichi.

13Chaicunataca, Diospajlla shicanyachishca pushtupimi micuna canguichi. Mandaj Diosman cushpa rupachishca ofrendacunaca, cambajpash, cambaj churicunapajpash cajpimi chashna rurana canguichi. Chashnami Diosca ñucataca mandahuarca.

14Vichai cuyuchishpa cushca pecho aichatapash, vichai ricuchishpa cushca rigra aichatapash, Diospajlla huasimanda canllamanmi mapa illaj pushtupi cambash, cambaj churicunapash, cambaj ushicunapash micuna canguichi. Israelcuna Dioshuan ali cangapa animalta cushpa huañuchishca aichacunaca, canguna japina cashcamandami, cambajpash, cambaj churicunapajpash canga.

15Diosman carashpa rupachina viracunahuanmi, vichai ricuchishpa cuna rigra aichataca apamunga. Mandaj Diospaj ñaupajpi vichai cuyuchishpa cujshnallata, vichai cuyuchishpa cuna pecho aichatapashmi apamunga. Chai aichacunaca, Mandaj Dios mandashcashna, tucui causaipi canguna japinapacha cashcamandami, cambajpash, cambaj churicunapajpash canga” nijurcami.

16Chai jipami Moisesca: “Juchamanda Diosman cuna jari chivoca maipita” nishpa tapurca. Chai chivotaca ñami rupachishca carca. Chaimandami, Eleazar shuti, Itamar shuti, Aaronbaj caishuj churicunahuanga ninanda fiñarishpa, cashna nirca:

17“Juchamanda cushca aichataca, ¿imashpata Diospajlla huasipi na micurcanguichi? Chaicunaca, Diospajpacha cachun shicanyachishca cajpimi, tandanajushca Israelcuna na alita rurashcata anchuchingapa, cangunaman curca. Mandaj Diospaj ñaupajpi, paihuan ali tucuchunmi chashna curca.

18Ricuichi, yahuartaca na Diospaj huasiman aparcachu. Cangunaca, ñuca mandashcashnami, Diosman carashcataca, Diospajlla ucupi micuna carcanguichi” nircami.

19Shina nijpimi Aaronga, Moisestaca cashna nirca:

“Ricui, paicunapaj juchamanda cuna animaltapash, tucuillata rupachina animaltapash, Mandaj Diospaj ñaupajman apamushcami. Ashtahuangarin, ñucataca cashna llaquicunami japihuashca. Juchamanda cushpa huañuchishca animalpaj aichata ñuca micujpica, ¿Mandaj Diosca cushijunmanllu carca?” nircami.

20Moisesca chaita uyashpami upalla saquirirca.