ISAÍAS 27 - Quichua Imbabura 2016

Israelcunata llaquimanda llujchishpa tigrachimunamanda

1Chai punllami Mandaj Diosca, ninan shinlli, ñapash calpaj, caita chaita rij leviatán culebratapash, Paipaj ninan espadahuan huañuchinga.

Mama cuchapi causaj manllanai dragondapashmi huañuchinga.

2Chai punllapica, juyailla uva chagratami, alicachishpa candana canguichi.

3“Chai chagrataca, Mandaj Dios Ñucami yacutapash punllandi jichashpa, aliguta ricushpa charisha.

Pipash ama yaicushpa huaglichinajuchunmi punllapash, tutapash ricujusha.

4Chai chagrataca, na fiñashcachu cani.

Casha yuracunalla, na ali jihuacunalla jundashca cashpapash, Ñucahuanga na macanajui ushangachu.

Ñucami sarushpa, tucuillata rupachisha.

5Pita Ñucahuanga, chimbapurai ushanga?

Pi cashpapash, Ñucahuan ali causaita charingapa mascanatami charin”.

6Jacobpaj miraicunapajca, cutin ninanda mirashpa catina punllacunami chayamunga.

Israelcunamandaca, mushuj yuracuna llujshishpa sisajshnami mirashpa catinga.

Paicunaca, tucui cai pachapimi jundanga.

7Taita Diosca, paicunataca, chaishuj na ali gentecunatashnaca na tucuchishcachu.

Shinallata, huañuchij runacunatashnaca na tucuchishcachu.

8Paicunapaj jipa miraicunataca, prezu cachashpami llaquichingui.

Shinlli huairata cachamushpami, llujchishpa cachangui.

9Chashna rurashpami, Jacobpaj miraicuna na alita rurashcataca, Diosca cunganga.

Rumihuan rurashca altarcunataca, cal rumicunatashna tucuillata ñutujpi,

asera shuti huarmi diosman rijchajcunatapash,

indiman rijchaj rurashcalla dioscunatapash tucuillata urmachijpimi,

paicunapaj juchacunataca, anchuchinga.

10Jatun pircahuan muyundi jarcashca puebloca, llaquinayaitami tucuchi tucunga.

Ashtacacuna causanajuj puebloca, jichushca pambashnami saquiringa.

Chaipi shicucunata michinajujpimi, jihuacunataca micushpa tucuchinga.

11Yura malquicuna chaquijpica, faquishpami saquinga.

Chaitaca, huarmicunami yamdashpa rupachinajunga.

Cai gentecunaca, napacha ali yuyaita japi ushangachu.

Chaimandami, paicunata ruraj Diosca napacha llaquinga.

Paicunata ruraj Diosca, na llaquishpami llaquichinga.

12Chai punllacunapica, Éufrates shuti jatun yacumandaca, Egipto llacta jatun yacucamanmi, Mandaj Diosca, granotashna tandachijunga.

Chaipimi, Israelcunaca tucuilla tandachi tucunguichi.

13Chai punllapica jatun trompetatami huacachinga.

Shina huacachijpimi, Asiria llactaman caita chaita cachai tucushcacunapash, Egiptoman apai tucushcacunapash tigramunajunga.

Paicuna tigramushpami, Mandaj Diostaca, Paipajlla lomapi tiyaj, Jerusalenbi ninanda alicachinajunga.