1Ashtahuangarin canga, Diosmanda ima alita yachajushcatalla villangui ninimi.
2Ruculla taitacunapash, aliguta causajcuna, ama pugllarijujcuna, aligutapacha yarishpa causajcuna cachun ninimi. Shinallata, ali crijcuna, juyajcuna, na ñapash fiñarijcuna cachun ninimi.
3Payalla mamacunapash, Diostalla yarijcuna, pitapash na yangata parlajcuna, na machashpa purijcuna cachun ninimi. Ashtahuangarin, aliguta yachachijcuna cachun ninimi.
4Shina cashpami, chairalla huarmicunatapash, paicunapaj cusacunata, huahuacunata juyashpa causachun yachachinga.
5Shinallata, aliguta yarishpa, ima na alimandapash anchurishpa, huasipipash aliguta ricushpa, ali shunguta charishpa, cusatapash cazushpa causanatapashmi yachachinga. Taita Diospaj Shimitaca, ama pipash na alicachijuchunmi chashna yachachinga.
6Shinallata, chairalla viñaicunatapash, aliguta yarishpa purichun, shinllita rimashpa yachachingui.
7Shujcunapaj ñaupajpica, canllata imagutapash aliguta rurashpami ricuchina cangui. Shinallata, na nij tucushpalla, tucuita aligutapachami yachachina cangui.
8Pipash ama na alicachichunmi chashna alitalla yachachina cangui. Shina yachachijpimi, cangunata na ricunayachij gentecunaca pingai tucushpa, imata juchachitapash na ushanga.
9Gañan tucushpa causajcunataca, mandajta cazushpa, tucuipi cushichishpa causachun yachachingui. Shinallata, ama chimbapura shayarishpa rimajcuna cachun yachachingui.
10Na shuhuana yuyaihuan, imatapash aliguta tucuipi pactachijcuna cachun yachachingui. Shina aliguta rurashpami, ñucanchita Quishpichij Taita Diosmanda yachajunaca, juyailla cashcata tucuipi ricuchinajunga.
11Taita Diosca, tucui gentecunata quishpichingapami, pai ninanda llaquishpa juyajushcataca ricuchimurca.
12Shina juyashpami, cai pacha na ali munaicunatapash, Diosta na manllashpa causanatapash cungachun yachachijun. Cai causaipi aliguta yarishpa, alitalla rurashpa, Diosta yariajlla causachumbashmi yachachijun.
13Quishpichij Jesucristo, jatun ushaita charij ñucanchi Diosca, punchapamba shamusha nishcami. Chaita ñucanchi ninanda cushijushpa shuyanajuchunmi yachachijun.
14Tucui na alicunata ñucanchi ruranajujpimi, Jesucristoca ñucanchita quishpichingapa, Paillata japi tucushpa huañurca. Mapa illaj causashpa, alitalla rurana yuyaihuan, Paipajlla causachunmi huañurca.
15Ñuca imata nishcataca, tucui ushaihuan, shinllita rimashpa aliguta yachachingui. Pipash candaca, ama na alicachishpa rimachun ninimi.
Who We AreWhat We EelieveWhat We Do
2025 by iamachristian.org,Inc All rights reserved.
