PROVERBIOS 31 - Quichua Imbabura 2016

Jatun mandajman aliguta yarichishpa yachachishcami

1Jatun mandaj Lemuel villashca shimicunami. Dios ima nishcatami, paipaj mamaca cashna yachachishca:

2Ñuca huahualla,

ñuca vijsamanda llujshishca huahualla.

Ñuca ninanda juyashca huahualla,

¿Candaca, imatata ni ushasha?

3Ama huarmicunahuan yangata puringuichu.

Jatun mandajcunata llaquiman apaj ñandaca, ama catinguichu.

4Ñuca churi Lemuel,

jatun mandajcunaca, na vinota ufiashpa machanachu.

Mandajcunaca, machachij sidrataca napacha ufianachu.

5Chaicunata ufiashpa machashpara,

mandashca shimicunata cunganguiman.

Shinallata, llaquipi causajcunaman alita ruranatara saquinguiman.

6Sidrataca, llaquipi causajcuna ufiachun saquilla.

Vinotapash, fiñarishpalla causajcuna ufiachun saquilla.

7Chaita ufiashpami, imagupash illaj cashcatapash,

llaqui causajushcatapash cunganga.

8Na rimangapa ushaita charijcunamandaca, canmi shayarina cangui.

Imatapash na rurai ushajcunata juchachishpa llaquichigrinajujpipash, canmi shayarina cangui.

9Tucuitami aligutapacha ricushpa mandana cangui.

Imagupash illaj huajchacunataca, canmi yanapana cangui.

Tucuipi ali huarmigumandami villajun

10Tucuipi ali huarmigutaca, ¿pita tari ushangayari?

Shina ali huarmiguca, punchapamba juyailla rumicunatapash yali aligumi.

11Paipaj cusapash, ali huarmigu cashcata yachashpami causan.

Paihuanga, imagupash na illajmi causan.

12Chai huarmiguca, alitalla rurashpami,

cusahuanga tucui causaipi ali causan.

13Milmata, linota mascagrishpami,

paipaj maquihuan imagutapash rurajun.

14Jatunacunahuan barco shamujshnami,

micunatapash carumanda apamujun.

15Narapash pacarijpillata jatarishpami,

paipaj huasi ucupuramanga micunata caran.

Shinallata, paipajta ruraj huarmicunamambashmi micunata caran.

16Ali alpata ricushpa randishpami,

paipaj maquihuambacha uvata tarpun.

17Paica, shinlli chumbilishpami, imata cashpapash rurajun.

18Ali yuyaihuanmi, randishpa, jatushpa causan.

Paica, tutacamanmi imaguta cashpapash rurajun.

19Paica, paipacha puchashpami, churajunacunatapash rurajun.

20Huajchacunatapash ricuriashpami,

imata carana cajpipash caran.

21Rasu urmajujpipash, paipaj huasi ucupuracuna chirichinataca na manllanllu.

Tucuillami racu churajunacunata churajushca.

22Jatanacunatapash, paillatami ahuan.

Ashtahuan ali linota ahuashca, yana puca churajunatami churajun.

23Paipaj cusatapash, tucuicuna alichishcami.

Llactata mandaj rucucunahuan, paipaj cusa pueblo pungupi tiyarijpica, tucuicunami alicachinajun.

24Churajunacunata ahuashpami jatujun.

Jatushpa, randishpa purijcunamanmi, chumbicunatapash jatujun.

25Ali yuyaihuan, ushaita japishpami ñaupajman catin.

Jipa punllacuna ima tucunatapash na manllanllu.

26Paica, ali yachajushca cashpami tucuita aliguta rimajun.

Shujcunata llaquishpa causanatami yachachijun.

27Huasipica, imagupash ali cachunmi ricuriajun.

Paica, na yanga micushpa causanllu.

28Paipaj huahuacuna jatarishpaca, ninandami alicachinajun.

Cusapash, cashna nishpami ninanda alicachijun:

29“Tauca huarmicunami alita ruranajun.

Ashtahuangarin canga, tucuicunata yali alita rurajmi cangui” nijunmi.

30Juyailla ñavi cashpapash umachinllami.

Juyaillagu cashpapash yangallatami.

Mandaj Diosta manllaj huarmica, tucuicuna alicachijpimi causanga.

31Paipaj maquihuan tucui alicunata rurashcamandaca, alicachinami canguichi.

Chashna alicunata rurashcamandaca, pueblo pungucunapimi alicachina canguichi.