1Shina cashcamandami, cangunapajman napacha shamui ushashpa, Atenas pueblopi saquirircanchi.
2Shinamandami, Cristo quishpichijmanda villashpa, Taita Diospajta rurashpa, ñucanchihuan pacta purij huauqui Timoteota, cangunapajman cachamurcanchi. Canguna alipacha crishpa catichun, shinllipacha rimashpa yachachijuchunmi paitaca cachamurcanchi.
3Chashna jatun llaquicunata apanajushpapash, crishcataca napacha saquinachu canguichi. Chashna llaquita apanallata cashcataca, cangunallata alimi yacharcanguichi.
4Cangunahuan chaipi cashpallatami: “Llaquita apanapachami canchi” nishpa ña villanajurcanchi. Ñucanchi villashcashnami, ña llaquita apanajunguichi. Chaitaca yachanguichimi.
5Na cungashpa ninandapacha yariajushpami, canguna crishpa imashna catinajujta yachangapa munashpa Timoteotaca cachamurcani. Cangunata diablo pandachijpica, ñucanchi villashcapash yangami saquiringa yashpami cachamurcani.
6Ashtahuangarin, cangunata ricushpa ñucanchipajman Timoteo tigramushpaca, cangunataca, aligutapacha crishpa, juyaihuan catinajujtami villaj shamurca. Shinallata, juyaihuan ñucanchita yarinajujtapash, cangunapash, ñucanchishnallata ricungapa munanajujtapashmi villaj shamurca.
7Juyashca crijcuna, imagu illashpa, ñucanchi llaquilla cashpapash, canguna chashna aliguta crishpa catinajujta uyashpaca ninandami cushijurcanchi.
8Apunchi Jesustaca, “shinllipachami catinajun” nijta uyashpami ashtahuan cushijuita japishpa causanajunchi.
9Cangunamandaca, imashna Taita Diosta “pashi” nitapash na ushanichu. Taita Diospaj ñaupajpi cangunamanda ninanda cushijushcamandapash, imashna “pashi” nitapash na ushanichu.
10Canguna ashtahuan alipacha crishpa catichun, ashtahuan ima yachajuna tiyajtapash, ñavi ñavi ricushpa yachachingapa munashpami, Taita Diostaca tutapash, punllapash na samashpa ninanda mañanajunchi.
11Taita Diosca, ñucanchipaj Taitami. Ñucanchi Apunchi Jesucristo, ñucanchita cangunapajman aliguman pushashca cachunmi munanchi.
12Juyarishpa causana yuyaita Apunchi Jesús ashtahuan carajpi, cangunapash, shujmanda shujmanda juyarishpami, shujcunatapash ashtahuan juyana canguichi. Ñucanchi, cangunata juyashcashnallata, cangunapash juyarichunmi munanchi.
13Alipacha crishpa catina yuyaita shungupi churajpi, Taita Diospaj ñaupajpi ama juchachi tucushpa, jucha illaj catinajuchunmi cangunamandaca mañanajunchi. Ñucanchi Apunchi Jesucristo, Paipajlla causajcunandi tigramujpica, chashna juyailla shuyanajuchunmi munanchi.
Who We AreWhat We EelieveWhat We Do
2025 by iamachristian.org,Inc All rights reserved.
