MARCOS 6 - Quichua Imbabura 2016

Jesús Nazaretpi cashcamanda.(Mat. 13:53-58; Luc. 4:16-30)

1Chaimanda llujshishpaca Jesusca, Paipaj llactamanmi rirca. Shinallata, Paipaj yachajujcunapashmi catishpa rinajurca.

2Samana punlla chayajpica, sinagogaman yaicushpami yachachi callarirca. Chaita ashtacacuna uyanajushpami, ninanda manllarishpa paicunapura cashna ninajurca:

“¿Cai runaca, maimandata caicunataca yachan? Cashna ninan yachaica ¿imata canga? Pipash na rurai ushanallacunataca ¿imashpata Paica rurai ushanga?

3¿Nachu cai runaca, Mariapaj churi caspicunahuan imatapash ruraj? ¿Nachu paica Jacobopaj, Josepaj, Judaspaj, Simonbaj huauqui? Paipaj panicunapash ¿nachu ñucanchihuanllata caipi?” ninajurcami.

Shina nishpami, Jesusta na crishpa, maitapash nishpa pandarinajurca.

4Shina nijpimi Jesusca cashna nirca:

“Profetataca, shuj llactacunapirami alicachishpa chasquin. Ashtahuangarin, paipaj llactapi causajcuna, paipaj ayllucuna, paipaj huasi ucupurallatami, ninanda na ricunayachin” nircami.

5Shinamandami, chai pueblopica, pipash na rurai ushanallacunataca na ashtahuan rurarca. Huaquin huañunajujtallami, paicunapaj uma jahuapi maquita churashpa alichirca.

6Jesusca, chai gentecuna na crijpimi, manllarishpa ninanda llaquirishpa, chai uchilla llacta muyundicunapilla yachachishpa purijurca.

Chunga ishcai yachajujcunata villachun cachashcamanda(Mat. 10:5-15; Luc. 9:1-6)

7Chai jipami Jesusca, chunga ishcaicunata cayashpa, ishcai ishcai cacharca. Paicunamanmi, mapata rurachij ayacunata llujchishpa cachana ushaita cararca.

8Paicunataca: “Ñanda ringapaca, imatapash na apanachu canguichi. Tauna caspitallami apana canguichi. Cucabi muchilatapash, tandatapash culquitapash na apanachu canguichi.

9Ashtahuangarin, chaquipi churajunatalla churajushpa, jahualla churajunataca na ishcaita churajunachu canguichi” nishpami mandarca.

10Shinallata, paicunataca cashnami nirca: “Cangunaca, maijan huasiman chayashpapash, chai pueblomanda llujshingacaman, chai huasipilla saquiringuichi.

11Maipi cashpapash, cangunata na chasquishpa, cangunata na uyangapa munajpica, chaimanda llujshishpa ringuichilla. Paicuna napacha ali cajta ricuchingapami, cangunapaj chaquipi churajushcapi catijuj alpatapash chafsishpa rina canguichi. Na llullashpami, cangunataca cashna nini: Imatalla rurashcata Dios ricuchijui punllapica, Sodoma, Gomorra pueblocunapi causashca gentecunata llaquichishcatapash ashtahuan yalitami, chai pueblopi causajcunataca ninanda llaquichinga” nijurcami.

12Paicuna llujshishpa rishpaca, gentecuna ninanda llaquirishpa Diospajman tigrarichunmi villanajurca.

13Shinallata, ashtaca ayacunatami llujchinajurca. Huañujujcunatapash, ashtacacunatami aceiteta churashpa alichinajurca.

Bautizaj Juanda huañuchishcamanda(Mat. 14:1-12; Luc. 9:7-9)

14Jesús imata rurashpa purijujtaca, tucui gentecunami maipipash parlanajurca. Chaita jatun mandaj Herodes uyashpami cashna nirca:

“Bautizaj Juanmi, huañushcacunapaj chaupimanda causarimushcanga. Shina cashpami paica, imata ruraitapash ushajunga” nijurcami.

15Huaquingunaca:

“Profeta Eliasmi canga” ninajurcami.

Shujcunaca:

“Profetami canga, na cashpaca profetapuramanda maijambashmi canga” ninajurcami.

16Shinallata Herodes uyashpami:

“Caica, Juanmi canga. Paitaca, ñucami umata fitishpa huañuchigrichun mandarcani. Chai runami, huañushcacunapaj chaupimanda causarimushca” nircami.

17Juandaca, Herodes japichun cachashpami cadenahuan huatashpa, prezuna huasipi churashca carca. Chashna rurachunga, paipaj huauqui Felipepaj huarmi Herodiasmi mañashca carca. Herodesca, chai huarmitami paipaj huarmi cachun japishpa causajurca.

18Shina causajujpimi Juanga, Herodestaca: “Cambaj huauquipaj huarmihuan causanaca, napacha alichu” nishca carca.

19Herodías huarmica, Juanda huañuchingapa munashpa pacalla chapariyajushpapash na usharcachu.

20Juandaca, alitalla ruraj, jucha illaj cajta yachashpa manllashpami, Herodesca aliguta ricurishpa charirca. Juan villajujpica, imata ruraita na ushashpami alicachishpa uyajurca.

21Herodesca, pai huacharishca huata pactajpimi, paipaj cati mandajcunaman, macanajuj runacunata mandajcunaman, Galilea llactata mandajcunaman chishi micuita rurarca.

22Chaipimi, Herodías huarmipaj ushica, ucuman yaicushpa tushujurca. Chaitaca Herodespash, paihuan chaipi micushpa tiyanajujcunapash ninandami alicachinajurca. Shinamandami jatun mandajca, chai cuitsataca cashna nirca:

“Can imata munashcata mañahuailla. Imata mañajpipash cushallami.

23Juramentushpami nini: Imata mañajpipash, tucuitami carasha, ñuca mandajujtapash, chaupicaman carashallami” nircami.

24Shina nijpi, chai cuitsa llujshishpami:

“¿Imatata mañasha?” nishpa, paipaj mamata tapurca.

Shina tapujpimi paipaj mamaca:

“Bautizaj Juanbaj umata mañai” nirca.

25Shina nijpi jatun mandajpajman, chai cuitsa ucha rishpaca:

“Bautizaj Juanbaj umata shuj platopi cunanllata carachunmi munani” nirca.

26Shina mañajpimi, jatun mandajca, ninanda llaquirirca. Ashtahuangarin: “Imata mañajpipash, carashallami” nishpa juramentujujta, paihuan micunajujcuna uyashca cajpimi, pactachina tucurca.

27Shina mañajpimi, chai jatun mandajca, chapaj runacunamanda shujtaca, Juanbaj umata fitishpa apamuchun cacharca.

28Chai chapaj runa rishpaca, prezuna huasipillatami Juanbaj umata fitirca. Chai umataca, platopi apamushpami, chai cuitsaman curca. Chai cuitsaca, paipaj mamamanmi curca.

29Chaita yachashpami, Juanbaj yachajujcuna shamushpaca paipaj cuerpogutaca huañushcacunata pambana utujupi churagrirca.

Picha huaranga runacunaman micuchun carashcamanda(Mat. 14:13-21; Luc. 9:10-17; Juan 6:1-14)

30Chai jipami apostolcunaca, Jesushuan tandanajungapa shamushpa, tucui imatalla rurashcata, imata yachachishcatapash villanajurca.

31Shina villajpimi Jesusca: “Cangunalla cai jichushca pambaman shamushpa, ashaguta samaichi” nirca.

Ashtaca gentecunami, huaquingunaca rinajurca, shujcunaca shamunajurca. Shinamandami, micungapallapash na pactai tucunajurca.

32Shinamandami, barcopi paicunalla jichushca pambaman rinajurca.

33Ashtahuangarin, ashtaca gentecuna ricushpami, Jesús rijujtaca rijsinajurca. Shinamandami, pueblocunamanda chaquilla rishpa, paicunata mishashpa chayanajurca. Chaipimi Jesushuan tandanajurca.

34Barcomanda Jesús llujshishpaca, ashtaca gentecunatami ricurca. Paicunataca, michij illaj llamacunashna cajta ricushpami, ninanda llaquishpa, ashtaca yachachinacunata yachachi callarirca.

35Ña tutayajujpimi Jesuspaj yachajujcunaca, Paipajman quimirishpa cashna ninajurca:

“Ñamari tutayan. Cai pushtuca, jichushca pambamari.

36Paicunataca, chai pambacunapi, chai uchilla llactacunapi tandata randigrichun cachailla. Cai gentecunaca imata micunatapash na charinllu” ninajurca.

37Shina nijpimi Jesusca:

“Cangunallata, micunataca caraichilla” nishpa tigrachirca.

Shina nijpimi paicunaca:

“¿Ishcai patsaj denario culquihuanllu, tandata randigrichilla ningui?” ninajurca.

38Shina ninajujpimi Jesusca:

“Cangunaca, ¿mashna tandagutata charinguichi? Ricungapa richi” nirca.

Paicuna ricushpa tigramushpaca:

“Picha tandagu, ishcai pijigullami tiyashca” ninajurcami.

39Shina ninajujpimi, jihua pambapi tucuillata asha asha tiyachinajuchun mandashpa cacharca.

40Shina cachajpimi, patsaj patsaj chaupirishpa, shinallata picha chunga, picha chunga chaupirishpa tiyarinajurca.

41Shina cajpimi, picha tandaguta, ishcai pijiguta japishpa, jahua pachata ricushpa, Diosta pashi nishpa mañarca. Chai tandacunata chaupishpami, chai gentecunaman carachun, Paipaj yachajujcunaman curca. Shinallata, ishcai pijigutapash chaupishpami tucuicunaman cararca.

42Shina carajpimi tucuicunallata, na munangacaman micunajurca.

43Paicuna na micui ushashcataca, chunga ishcai canasta jundatami tandatapash, pijitapash tandachinajurca.

44Chai micushpa tiyanajujpurapica, jaricunallami picha huaranga carca.

Yacu jahuata Jesús purijushcamanda(Mat. 14:22-27; Juan 6:16-21)

45Chai jipallami Jesusca, Paipaj yachajujcunataca barcopi tiyachishpa, Betsaida puebloman ñaupashpa chimbachun cacharca. Shina cachashpallami Jesusca, chai tucui gentecunataca: “Cayacaman” nirca.

46“Cayacaman” nishca jipaca, Diosta mañangapami Jesusca urcuman rirca.

47Ña tutayashcapimi, chaupi cuchata barcopi rinajurca. Jesusca, Paillami alpapi saquirirca.

48Paipaj yachajujcunaca, ninan huaira tuparimushpa jarcajpi, ninanda shaijushpa na ri ushanajundami ricurca. Ña punllayanalla tucujujpimi Jesusca, paicunata ñaupashpa yalishpa ringapa, yacu jahuata shamujurca.

49Yacu jahuata Jesús shamujujta ricushpaca:

“Ayamari shamujun” yashpami, ninanda caparinajurca.

50Chaitaca tucuicuna ricushpami, ninanda manllarishpa, imata ruraitapash na ushanajurca. Ashtahuangarin Jesusca, paicunata ucha rimashpami:

“Ñucami cani. ¡Ama manllarishpa, shinlli tucuichi!” nirca.

51Paicuna rinajuj barcopi Jesús yaicujhuanmi, huairapash chulunlla tucurca. Chaimandami, paicunaca, ninanda manllarishpa ricunajurca.

52Paicunapaj shungu shinlliyashca cashcamandami, tandata mirachishpa carashcatapash nara yuyaipi japirca.

Genesaretpimi huañujujcunata Jesusca alichishca(Mat. 14:34-36)

53Chai cuchata chimbashpa, Genesaretman shamunajushpami, chai cucha manñaman chayarca.

54Barcomanda paicuna llujshijhuanmi gentecunaca, Jesús cajta rijsinajurca.

55Jesús maipi cajta yachashpami, muyundi llactacunamanda, huañujujcunata huandunacunapi apamunajurca.

56Uchilla llactacunaman, pueblocunaman, pambacunaman, maiman Jesús yaicujpipash, Pai yalina ñangunapimi, huañujujcunataca churanajurca. Shina churajpimi huañujujcunaca:

“Can churajushca pundagupillapash tacarichun, saquihuai” nishpa mañanajurca.

Tucuilla maijan tacarijcunaca ali tucurcallami.