ROMANOS 15 - Quichua Imbabura 2016

1Shina cashcamanda, ñucanchi shinlli crijcuna cashpaca, nara shinlli crijcunataca, na fiñarishpami aliguta yachachina canchi. Na ñucanchilla ali canata yanachu canchi.

2Ashtahuangarin, shujcunapash ali catishpa, paicunapash shinlli tucuchunmi, ñucanchica alita rurana canchi.

3Shinallata, Cristopash na Paipaj ali canatalla mascarcachu. Ashtahuangarin, quilcashcapi nijujtami pactachirca: “Canda na alicachishpa imata rimashcapash, Ñucatami na alicachishpa rimahuarca” nijunmi.

4Ñucanchi yachajuchunmi, Diosca ña pundata quilcachishca. Chai quilcachishca Shimicunami, na ñapash fiñarishpa, cushijushpa causanata ñucanchiman yachachijun. Shinamandami, japigrinata yariajlla shuyana canchi.

5Na ñapash fiñarij, cushijushpa causanata caraj Taita Diostami, Cristo Jesús yachachishcashna, shujlla yuyaihuan causanata cangunaman caramuchun mañani.

6Shina cashpami, ñucanchi Apunchi Jesucristopaj Taita Diostaca, ninanda caparishpa shujllashnalla alicachinajuchun mañani.

Quishpirinamandaca, na Israelcunamambash villashcami.

7Cristo ñucanchita chasquishcashna, Taita Diosta jatunyachingapami, cangunapurapash caishuj chaishuj chasquirina canguichi.

8Cashna nishpami villajuni: Cristo Jesusca, circuncisionda rurashca judiocunaman alita rurangapami shamurca. Shina shamushpaca, ñaupa taitacunaman, Taita Dios “carashami” nishcataca, na llullashpa pactachishcatami ricuchimurca.

9Na Israelcunapash, Taita Diosta alicachinajuchunmi, Jesusca shamurca. Shinamandami, quilcashcapipash cashna nijun:

“Chaimandami, na Israelcunapaj chaupipi canmandaca villajusha.

Cambaj shutitapash alicachishpami candajusha” nijunmi.

10Shinallata, cutinbash cashnami nijun:

“Na Israelcunapash,

Dios agllashca gentecunahuan cushijunguichi” nijunmi.

11Cashnatapashmi cutin nijun:

“Tucui na Israelcuna,

Jatun Diostaca ninanda alicachinguichi.

Tucuicunallata, Paitaca jatunyachinguichi” nijunmi.

12Shinallata Isaiaspash, cutinmi cashna nijun:

“Taita Isaimanda miraimandami,

tucui na Israelcunata mandangapa jataringa.

Na Israelcunami, paita yariashpa tucuilla shuyanajunga” nijunmi.

13Ñucanchiman cushijuita caraj Taita Diosllata, Paita crishcamandaca, cushijuitapash, llaqui illaj causaitapash carachunmi mañani. Jucha illaj Diospaj Espíritu ushaita carajpimi, japigrinataca yariajlla shuyanajunguichi.

14Ñuca juyashca huauquicuna, cangunaca ninan juyai shunguta charishpami, aliguta yachajushca cashcamanda, caishuj chaishuj ali yuyaicunata japishpa rinajunguichi. Chaitaca yachanipachami.

15Huauquicuna, ashtahuangarin, huaquin shimicunataca shinllita rimashpami quilcamushcani. Taita Dios, ñucaman ninan juyaita carajujpimi canguna ama cungachun cashna cachamuni.

16Ñucataca, Jesucristopajta rurashpa na Israelcunaman villachunmi cachamuhuashca. Na Israelcunapash, Diosman animalta carashpa rupachishcashna, Jucha illaj Diospaj Espiritumandaca, Diospajlla causanajuchunmi, quishpirimanda villajuni.

17Cristo Jesusta crishcamandami, Taita Diospajta rurashpa ninanda cushijuni.

18Cristo ñucata agllajpimi, na Israelcunapash Diosta cazuchun villajuni. Chaitaca na shimihuanlla villashpami, imagutapash rurashpa pactachijuni.

19Taita Diospaj Espiritupaj ushaihuan, pipash na rurai ushanallacunata, jatun manllarinacunata rurachunmi ñucaman carahuarca. Shina cashpami, Jerusalenmanda callarishpaca, Ilírico muyundi llactacunapi, Cristomanda ali villanata tucuicunaman villajurcani.

20Chashnami, Cristopaj shutita nara uyashca llactacunapi, ali villanata villajurcani. Shujcuna villai callarishca llactacunapica na villarcanichu.

21Ashtahuangarin quilcashcapi nijujshnallatami rurarcani:

“Paimanda villajta napacha uyashcacunami ricunajunga.

Paimanda yachachijpi na yachajushcacunami yachajunajunga” nijunmi.

Roma pueblomanmi Pabloca ringapa munashca

22Shina villajushpapash, cutin cutin cangunata ricungapa shamusha yajushpapash, na shamui ushashcanichu.

23Ashtahuangarin cunanga, ñami cai llactacunapi villaita tucuchircani. Tauca huatacunatami, cangunata ricuj shamungapa munajurcani.

24España llactaman rijushpaca, cangunata ricushpandi yalingapami munani. Chaipi cangunahuan cushijushpa tiyajushca jipa, chaimanda richunga, cangunami yanapahuanguichi.

25Ashtahuangarin cunanga Jerusalenmanmi, Diospajlla causajcunata ricungapa rijuni.

26Macedoniapi crijcunapash, Acaya crijcunapash, Jerusalenbi causajcunamanda imagutapash na charijcunaman carangapami, ali shunguhuan ofrendata tandachinajurca.

27Chashna ruranaca, alipacha cajta yachashpami, paicunaman caranatapacha charirca. Israelcunaman aliguta Dios carajpimi, na Israelcunapash japinajunga. Chaimandami, paicunapash randi imaguta caranatapash charin.

28Shinamandami, chai ofrendata Jerusalenbi crijcunaman saquishca jipaca, cangunata ricushpandi Españaman yalisha.

29Cangunapajman ñuca rishpaca, Cristomanda ali villanata villajpi, ashtaca bendiciongunata japichunmi villaj shamusha. Chaitaca yachanipachami.

30Ñuca juyashca huauquicuna, Apunchi Jesucristomanda, Diospaj Espíritu ninan juyaita caramushcamandaca, ñucamandapash, Taita Diosta ninanda mañahuanguichi nipanimi.

31Diosta na cazuj judea llactapi causaj huaquin gentecuna, ama ñucata llaquichinajuchun mañapanguichi. Shinallata, ñuca saquigrijun ofrendatapash, Jerusalenbi Diospajlla causajcuna aliguta chasquishca cachun mañapanguichi nipanimi.

32Taita Dios munajpica, cangunapajman cushijuihuan chayamushpa, cangunahuan aliguta samangapami, mañapanguichi nipani.

33Ali causaiguta caraj Taita Diosca cangunahuan cachun nipanimi. Chashna cachun.