DEUTERONOMIO 28 - Quichua Imbabura 2016

Diosta cazujpica bendicianatami villajun(Lev. 26:3-13; Deut. 7:12-24)

1Canda Mandaj Taita Dios rimashca shimicunata, cunan ñuca yachachishcataca, pactachishpami causana canguichi. Shina cajpimi canda Mandaj Taita Diosca, cai pachapi tiyaj llactacunata ashtahuan yali jatun cachun churanga.

2Canda Mandaj Taita Dios rimashca shimicunata cazushpaca, tucuipimi bendiciai tucunguichi.

3Canga, pueblopipash, pambapipash, bendiciai tucushcami cangui.

4Cambaj huahuacunapash, cambaj pambapi fucushcacunapash, cambaj animalcunapash, cambaj huagracunapash, llamacunapash bendiciai tucushcami canga.

5Cambaj tazapash, tandata rurangapa chapuna bateapash bendiciai tucushcami canga.

6Can maiman rijushpapash, maimanda tigramujushpapash bendiciai tucushcami cangui.

7Canhuan macanajungapa jatarij canda fiñajcunataca, Mandaj Diosmi llaquichinga. Canhuan macanajungapaca, shujlla ñandami llujshimunajunga. Ashtahuangarin cambaj ñaupajmandaca, canchis ñandami caita chaita calpanajunga.

8Mandaj Diosca, cambaj granocunapipash, cambaj maquihuan tucui imatalla ruranapipashmi bendicianga. Canda Mandaj Taita Dios, canman carashca llactapimi chashna bendicianga.

9Canda Mandaj Taita Diosca, Pai mandashcacunata cazushpa pactachishpa causajpica, Mandaj Dios carashami nishcashnami, Paipajlla cachun shicanyachinga.

10Shina rurajpimi, cai pachapi causaj tucui gentecunaca, Mandaj Diospaj shutipi canmanda mañanajujta ricushpa, candaca ninanda manllanajunga.

11Mandaj Diosca, cambaj huahuacunata, cambaj animalcunata, cambaj alpapi fucushca granocunatami, cambaj ñaupa taitacunaman Mandaj Diosllata carasha nishca alpapica ninanda bendicianga.

12Mandaj Diosca, cambaj maquihuan imatalla rurashcacunata bendiciangapami, jahua pachata pascajshna cachamunga. Shina cashpami, tamiana punllacunapillata tamiachimunga. Canga, tauca llactacunamanmi imacunatapash mañachishpa causangui. Ashtahuangarin canga, pitapash na mañashpa causanguichu.

13Mandaj Diosca, can mandajuchun churajpimi, huashaman chupashna saquirishpaca na causangui. Can umashna mandajujpimi, candaca pipash na mandanga. Canda Mandaj Taita Dios mandashcacunata, ñuca villajpi cazushpa pactachishpa causajpimi, chashnaca churanga.

14Cai mandashca shimicunamandaca, alimambash, lluquimambash na anchurinachu cangui. Shinallata rurashcalla dioscunataca napacha alicachinachu cangui.

Diosta na cazujpica llaquicuna japinamanda(Lev. 26:14-46)

15Ashtahuangarin, canda Mandaj Taita Dios rimashca shimicunata na uyashpa, cunan ñuca yachachishpa mandashca shimicunata na cazushpa causajpica, ninan llaquicunami candaca japinga.

16Cambaj pueblopipash, cambaj pambacunapipash, ninanda na alicachi tucushcami causangui.

17Cambaj tazapash, cambaj tandata rurangapa chapuna bateapash, ninanda na alicachi tucushcami canga.

18Cambaj huahuacunapash, cambaj pambapi fucushcacunapash, cambaj animalcunapash, cambaj huagracunapash, llamacunapash ninanda na alicachi tucushcami canga.

19Can maiman rijushpapash, maimanda tigramujushpapash, ninanda na alicachi tucushcami cangui.

20Mandaj Diosca candapash, cambaj maquihuan tucui imatalla rurashcacunatapash, ninanda na alicachi tucunata cachamushpami, can huañungacaman ninanda llaquichimunga. Can na alicunata rurashpa ñucata saquishcamandami, chashna llaquicunataca cachamunga.

21Mandaj Diosca, huañuna ungüicunatami cachamunga. Can japigrijuj llactapi tucuilla huañushpa tucuringacamanmi, chashna llaquichinga.

22Mandaj Diosca, millai ungüihuan, calentura ungüihuan, punguichij ungüihuan, shijshi ungüihuanmi candaca llaquichinga. Shinallata na tamiachishpa, cungashcapi jatun llaquicunata cachamushpa, tarpushca chagracunapipash lanchacunata cachamushpami can huañungacaman llaquichinga.

23Jahua pachapash, bronceshnami tigranga. Can sarujuj alpapash jirrushnami tigranga.

24Mandaj Diosca, cambaj llactaman tamiata cachamungapa randica, ñutu alpata, uchufata tamiachimushpami candaca huañungacaman llaquichinga.

25Mandaj Diosca, canda fiñajcunapaj maquipimi candaca churanga. Macanajungapaca, shujlla ñanda llujshimushpapash, canchis ñandami caita chaita calpangui. Candaca cai pachapi tucui mandajcunapash ninandami na ricunayachinga.

26Canguna huañushca sirinajujpica, aichata micuj angacuna, sacha animalcunami micunga. Chai animalcunata manllachishpa calpachijcunapash na tiyangachu.

27Mandaj Diosca, Egipto llactapishnami candaca, chupu ungüicunahuan, aicha ucuman yura chupushna ungüicunahuan, caracha ungüicunahuan, shijshi ungüicunahuan ninanda llaquichijpi, napacha jambiri ushangui.

28Mandaj Diosca candaca, yuyai illajta rurashpa, ñausata rurashpa, caita chaita musparina yuyaicunata cushpami llaquichinga.

29Canga, ñausa runa tacarishpalla purijujshnami, chaupi punllapipash chashna puringui. Cambaj causaipi imata rurashcapash, yangallatami canga. Tucui punllacuna llaquichi tucushpalla, imatapash quichui tucushpallami causangui. Canda quishpichingapaca, pipash na tiyangachu.

30Can cazarangapa purijuj huarmihuambash, shuj runarami pacta puñunga. Huasita shayachishpapash, chai huasipica na causanguichu. Uvata tarpushpapash, chai uvataca na micunguichu.

31Cambaj huagrata, cambaj ñaupajpillata huañuchishpami shuj runara micunga. Cambaj burruta, cambaj ñaupajmanda apashpapash na tigrachimungachu. Cambaj llamacunatapash, canda fiñajcuna apajpimi pipash na yanapai ushanga.

32Cambaj churicunata, ushicunatapash, can ricujtami shuj gentecuna maimambash apanga. Shina apajpimi tucui punllacuna llaquirishpa huacashpa imata ruraitapash na ushanguichi.

33Cambaj alpapi fucuchishca granocunataca, can na rijsishca runacunami micunajunga. Canga, punllandi ninanda llaquichijpimi causangui.

34Chai tucui llaquicunata cambaj ñavihuambacha ricushpami, yuyaicunapash chingajpi causangui.

35Mandaj Diosca, cambaj cunguripipash, changapipash ismuchijlla ungüihuanmi llaquichinga. Na jambiri ushanalla ungüihuanmi, chaqui pundamanda callarishpa umacaman llaquichinga.

36Mandaj Diosca candapash, canda mandaj cachun churashca jatun mandajtapashmi, cambaj ñaupa taitacunapash na rijsishca caru llactaman prezu apanga. Chaipimi caspita, rumita rurashca dioscunata alicachishpa causangui.

37Mandaj Diosllata, tucui chai gentecunapajman apajpimi, cangunataca manllarishpa, na alicachishpa, asishpa ricunajunga.

38Ashtaca muyucunata tarpujpipash, langostacuna tucuchijpimi, ashagutalla tandachingui.

39Uvata tarpushpa ali ricushpa charijpipash, jurucuna micujpimi, uvatapash na pallashpa, vinotapash na ufiangui.

40Cambaj tucui alpacunapi olivo chagracunata charijpipash, chai olivo granocuna nara fucushpallata tucuilla urmajpimi, aceitehuan javiringapapash na charingui.

41Cambaj churicunata, ushicunatapash prezu apajpimi, paicunaca na canhuan causanga.

42Cambaj tucuilla yuracunatapash, cambaj alpapi fucushca granocunatapash langostacunami micushpa tucuchinga.

43Shuj llactamanda shamushca canhuan causajuj runara canda yalishpa mandajpimi, paipajta rurashpa causangui.

44Paimi, canmanga imatapash mañachinga. Canga, paiman mañachingapaca imatapash na charinguichu. Paimi umashna mandajunga, canga chupashnami catijungui.

45Cai tucui llaquicuna canda japij shamushpami, catiriyashpa huañungacaman llaquichinga. Canda Mandaj Taita Dios rimashpa, tucui mandashca shimicunata na cazushpa na pactachishcamandami, chashna llaquichinga.

46Shina llaquichishcacunaca, tucui causaipi, cambash, cambaj miraicunapash, ninanda llaquichishcata yarishpa causangapami canga.

47Canda Mandaj Taita Dios, tucuita canman carajpipash, na tucui shunguhuan cushijushpa, Paita alicachishcamandami chashna llaquichi tucungui.

48Shinamandami, Mandaj Dios cachamushca canda fiñajcunapajtara rurashpa causangui. Yarjaihuan, yacunaihuan, churajuna illaj, tucui imapash illajmi tucuita rurashpa chashna causangui. Chashnami Mandaj Diosca, cunga tullupi jirru yuguta apachinshna, candaca tucuchingacaman llaquichinga.

49Mandaj Diosca, canda llaquichinajuchunga, can na yachashca shimicunata rimaj shuj runacunatami, cai pacha caru llactamanda cai pacha tucuri manñamanda apamunga. Chai runacunaca, jatun angashnami ñapash chayamunga.

50Paicunaca, ninan millai gentecuna cashpami, rucucunatapash, huahuacunatapash na llaquishpa huañuchinga.

51Candaca imapash illajta saquingacamanmi, cambaj animalcuna mirashcatapash, cambaj alpacunapi fucushcatapash micunajunga. Trigotapash, llullu vinotapash, aceitetapash, cambaj huagracuna, llamacuna mirashcatapash tucuchishpami candaca imapash illajta saquinga.

52Cai llactacunapi, cambaj tucui pueblocunata chaupipi churangapa shamushpami, muyundi pircashcatapash urmachinajunga. Canda Mandaj Taita Dios carashca tucuilla llactata, tucuilla pueblocunatami chaupipi churanajunga.

53Canda fiñajcuna chaupipi churajpi, caita chaita musparijushpami, canda Mandaj Taita Dios carashca, cambaj churicunatallata, cambaj ushicunatallata micungui.

54Cangunapurapi, ninan juyaita charij runapashmi, paipaj huauquitallata, paipaj juyashca huarmitallata, paipaj churicunatallata, ninanda millanayachinga.

55Paipaj churipaj aichatallata micujushpami, pimambash ama carangapa chashna ricujunga. Cangunata fiñajcuna cambaj tucui pueblocunata chaupipi churashpa caita chaita muspachinajujpi, micuna illajpi chashna canga.

56Cangunapurapi ninan juyailla, tucuita yali ali, ali shunguta charij sumaj huarmipashmi, paipaj cusatallata, paipaj ushitallata, paipaj churicunatallata, ninanda millanayachinga.

57Shinallata, chairalla huacharishca paipaj huahuatapashmi yarjaimanda micunga. Cangunata fiñajcuna cangunapaj tucui pueblocunata chaupipi churashpa, caita chaita muspachijpi, ima micunapash illajpimi chashna pacalla micunga.

58CANDA MANDAJ TAITA DIOSCA, ninanda alicachina, jatun manllarina shutimi. Chai shutita na manllashpa, cai quilcashcapi tiyanajuj tucui cai mandashca shimicunata na pactachijpimi, shina llaquicunaca japinga.

59Shina na cazujpimi, Mandaj Diosca, canmambash, cambaj miraicunamambash, huañuchij llaquicunata, na jambirinalla manllanai ungüicunata cachamushpa unaicaman llaquichinga.

60Egipto llactapi llaquichishca, can ninanda manllarishca llaquicunata apamushpami, candaca catiriyashpa llaquichijunga.

61Mandashca shimicunapi na quilcashca tiyajuj huañuchij tucui ungüicunatapashmi, Mandaj Diosca can tucuringacaman cachamunga.

62Cangunaca, luzerocunashna ashtacacuna cangapa randica, huaquinllami saquiringuichi. Canda Mandaj Taita Dios rimashca shimicunata na cazushcamandami shina tucunguichi.

63Mandaj Diosca, alicunata cangunaman rurashpa, cangunata ashtacata mirachishpami cushijun carca. Chashnallatami Mandaj Diosca, cangunata ninanda llaquichishpa tucuchishpapash cushijunga. Canguna japingapa yaicunajun llactamandaca, anchuchi tucunguichimi.

64Mandaj Diosca, tucui shuj llactacunamanmi, cai pacha tucuri manñamandaca, caishuj manñacaman caita chaita calpachinga. Chaipica, cangunapash, cangunapaj ñaupa taitacunapash na rijsishca, caspimanda, rumimanda rurashca dioscunatami alicachishpa causanguichi.

65Chai llactacunapica, maipi samaitapash na ushashpami, caita chaita puringuichi. Chaipimi Mandaj Diosca, manllana shunguta, imata shuyanata na charij, llaquilla almahuan causachun saquinga.

66Cambaj causaica, ñapash tucurinallata yachashpami, tutapash, punllapash ninan manllaihuan causajungui.

67Tutamandaca: ‘¡Ucha chishashcanman!’ ninguimi. Chishica: ‘¡Ucha punllayashcanman!’ ninguimi. Cambaj ñavihuambacha ricujushpa, shungupi ninanda manllashpa chujchushpami chashna ningui.

68Mandaj Diosca: ‘Cai ñandaca, cutinga na tigranguichu’ nircami. Shina cashpapash, chai ñandallatami candaca, barcocunapi Egiptoman cutin tigrachishpa apanga. Shina apashpa, jaricunatapash, huarmicunatapash gañan cachun canda fiñajcunaman jatungapa munajpipash, pipash na randingapa munangachu” nijurcami.