1Shinallata Moisespash, mandaj ancianocunapashmi, Israelcunataca cashna nishpa mandarca:
“Ñuca yachachishca tucui mandashca shimicunataca pactachinami canguichi.
2Canda Mandaj Taita Dios carashca llactaman yaicungapa, Jordán yacuta ña chimbashca punllallatami jatun rumicunata jahuan jahuan churashpa, izcuhuan quilpana cangui.
3Chai rumicunapica, cai mandashca shimicunatami quilcana cangui. Canda Mandaj Taita Dios, cangunapaj ñaupa taitacunaman carasha nishca llactaman chimbashpami, shina quilcachina cangui. Chai llactapica, Mandaj Dios nishcashnami, lechepash, balun mishquipash ashtacapacha tiyan.
4Jordán yacuta chimbashpa, Ebal shuti urcuman ña chayashpaca, ñuca nishcashnami rumicunata jahuan jahuan churashpa izcuhuan quilpana cangui.
5Chaipillatami, canda Mandaj Taita Diosman, rumicunahuan shuj altarta rurana cangui. Chai altarta rurana rumicunataca, na jirruhuan llagllanachu cangui.
6Canda Mandaj Taita Diospaj altartaca, faquishca rumicunahuanga na ruranachu cangui. Chai altarpimi, canda Mandaj Taita Diosman animalcunata cushpa tucuillata rupachina cangui.
7Shinallata Dioshuan ali tucungapapash, animalcunatami huañuchina cangui. Chai aichataca, chaipillata micushpami, canda Mandaj Taita Diospaj ñaupajpi ninanda cushijungui.
8Chai rumicunapica, Ñuca mandashca shimicunataca, ali ricunallapacha cachunmi quilcana cangui” nishpami mandarca.
9Chai jipami Moisesca, sacerdote levitacunandi, tucuilla Israelcunata cashna nirca: “Israelcuna upalla uyaichi. Cunanmi cangunaca, Mandaj Taita Diospajlla tucushcanguichi.
10Shina cashcamandami, canda Mandaj Taita Dios rimashca shimicunataca uyana cangui. Shinallata, Pai mandashca shimicunataca cunan ñuca yachachishcashnami pactachina cangui” nircami.
Ebal shuti urcupi, llaquichina shimicunata rimashcamanda11Chai punllallatami Moisesca, Israelcunataca cashna nishpa mandarca:
12“Jordán yacuta chimbashpaca: Simeón, Leví, Judá, Isacar, José, Benjamín shuti ayllucunami, Gerizim shuti urcupi shayarishpa tucuilla pueblota bendicianga.
13Shinallata: Rubén, Gad, Aser, Zabulón, Dan, Neftalí shuti ayllucunami, Ebal shuti urcupi shayarishpa llaquichina shimicunata caparinajunga.
14Shinallata levitacunaca, tucuilla Israelcunatami ninanda caparishpa cashna ninajunga:
15‘Imatapash llagllashpa rurashca diosta, na cashpaca jirruta yacuyachishpa imamambash rijchaj diosta rurajcunaca, ninanda na alicachi tucushca cachun.
Shinallata, imatapash ruranata ali yachaj rurashcata, Mandaj Dios millanayachishcata alicachijcunaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
16‘Paipaj taitata, paipaj mamata na cazushpa causajcunaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
17‘Paipaj cumba runapaj alpa mujunda suchuchijpash, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
18‘Ñausa runata, shuj ñanda catichun pandachijcunaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
19‘Shuj llactamanda shamushca runata, sapalla mamata, taita mama illajcunata llaquichijcunaca ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
20‘Taitapaj huarmihuan pacta puñushpa, paipaj taitata yangapi churashpaca ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
21‘Maijan cashpapash animalhuan millanai na alita rurajcunaca ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
22‘Taitamanda, na cashpaca mamamanda, panihuan pacta puñujcunaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
23‘Paipaj huarmipaj mamahuan pacta puñuj runaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
24‘Paipaj cumba runata cungashcapi pacalla japishpa huañuchij runaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
25‘Ima na alitapash na ruraj runata huañuchingapa culquita japij runaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
26‘Cai mandashca shimicunata na cazushpa, na pactachishpa causaj runaca, ninanda na alicachi tucushca cachun’ ninajungami.
Shina nijpica tucui gentecunami: ‘Chashna cachun’ ninajunga.
Who We AreWhat We EelieveWhat We Do
2025 by iamachristian.org,Inc All rights reserved.
