AMÓS 8 - Quichua Imbabura 2016

Mishqui murucunata jundachishca canastamanda

1Mandaj Jatun Diosca, rupai punllacunapi fucushca mishqui murucunahuan canastatami ricuchihuarca.

2Paica:

“Amós, ¿imatata ricujungui?” nishpa tapujpimi, ñucaca:

“Rupai punllacunapi fucushca, mishqui muruhuan canastatami ricujuni” nircani.

Shina nijpimi Mandaj Diosca cashna nihuarca:

“Ñuca agllashca Israelcunata llaquichina punllami ña chayamushca. Paicunapaj juchataca na ashtahuan saquijushallachu.

3Chai jatun llaqui punllapica, Ñuca huasipi candajcunapashmi huacanajunga. Huañushcacunapash, ashtacapacha sirinajujpimi, maipipash shitanajunga” nircami Mandaj Jatun Diosca.

Israelcunata Dios llaquichinaca, ñami chayamujun nishcami

4Huajcha gentecunata quichushpa causajcuna,

cai llactapi causaj imagutapash na charijcunata ninanda llaquichijcuna, caita uyahuaichi.

5Cangunaca, Trigota ucha jatungapaca, quillacuna ucha yalichunmi munanguichi.

Samana punlla yalijpi,

granocunata alichishca ucumanda llujchishpa,

balanzapipash pishiyachishpa pezashpami,

umashpa ashtaca culquipaj jatushun yanajunguichi.

6Huajcha gentecunaca, ñucanchi gañangunami tucunga.

Imagupash illajcunapash, chaquipi churajunamandami jatui tucunga.

Lanchashca trigotapashmi jatushun yanguichimi.

7Mandaj Diosca, Jacobpaj juyailla shutipimi cashna nishpa juramenturca:

“Chai tucui na alita rurashcataca, napacha cungashachu.

8Chashna na alicuna cashcamandaca, ¿nachu alpaca chujchunga?

Cai llactapi causajcunapash, ¿nachu huacanajunga?

Tucui cai pachaca, jatun yacushnami miranga.

Shina mirashpapash, Egiptopi jatun yacushnami cutin ashalla tucunga” nircami.

9Mandaj Jatun Diosca, cashnatapashmi nin:

“Ñuca llaquichijui punllapica, indipash, chaupi punllapilla huashajuchunmi saquisha.

Cai pachatapash punchapamba punllapimi, yana tuta tucuchun saquisha.

10Cangunapaj cushijuna punllacunatapash, huacana punllacunamanmi tigrachisha.

Canguna cushijushpa candanatapash, huacanamanmi tigrachisha.

Cañamutami cangunamanga churachisha.

Ajchatapash tucuillami rutuchisha.

Shujlla churipash huañushcapishna huacanamanmi tigrachisha.

Paicunapaj tucurimui punllapica, ninan llaqui punllami canga” ninmi.

11Mandaj Jatun Diosca, cashnatapashmi nin:

“Cai pachamanga, jatun yarjai punllacunatami cachamugrini.

Micuna yarjaitaca na cachamushachu.

Yacunayachina llaquitapash, na cachamushachu.

Ashtahuangarin Mandaj Dios Ñuca villashca shimita uyanayachishpa,

yarjachijshna causana punllatami cachamusha.

12Ñuca shimita uyanayachishpami, shuj mama cuchamandaca caishuj mama cuchacaman rinajunga.

Janajmandaca indi huashajunmanmi mascashpa purinajunga.

Shina mascashpapash, napacha tarinajungachu.

13Chai huatacunapica, chairalla viñai juyailla cuitsacunapash,

chairalla viñai huambracunapash yacunayaihuan na ushashpami, huañunalla tucunajunga.

14Samaria pueblopi causajcunapaj rurashcalla dioscunamanda juramentujcunaca:

‘Dan shuti ayllu runacunalla, cangunapaj diosmanda’ ninajunmi.

Shinallata: ‘Beerseba pueblo, cangunapaj diosmanda’ ninajunmi.

Chashna rurashcamandami, paicuna urmashpaca napacha cutinga jataringachu” ninmi.