1 SAMUEL 6 - Quichua Imbabura 2016

Filisteocuna arcata tigrachishcamanda

1Mandaj Diospaj arcataca, canchis quillacamanmi, filisteocunapaj llactapi charinajurca.

2Chaimandami filisteocunaca, sacerdotecunatapash, yachajcunatapash cayashpa, cashna tapunajurca: “Mandaj Diospaj arcataca, ¿imatata rurashun? Maimanda apamushca cashpapash, chaipillata saquigringapa imashna ruranataca villanamari canguichi” ninajurcami.

3Shina nijpimi cashna ninajurca: “Israelcunapaj Diospaj arcataca, na yangata saquigrinalla cajpimi, canguna na alita rurashcamandaca ofrendata cuna canguichi. Chashna rurashpa, ungüicunamanda ali tucushpami, cangunamanda llaquicuna anchurishcatapash yachanguichi” ninajurcami.

4Shina nijpimi, filisteocunaca: “Ñucanchi na alita rurashcamandaca, ¿imatata cuna canchi?” ninajurca. Shina nijpimi paicunaca, cashna ninajurca: “Filisteocunata mandajcuna mashna cajpipash, picha chupushnalla curita, picha ucuchashnalla curita rurashcahuanmi saquigrina canguichi. Chai ungüillatami cangunatapash, cangunapaj mandajcunatapash llaquichijun.

5Chupushnalla curita, cangunapaj alpata tucuchij, ucuchashnalla curita rurashpami, Israelcunapaj Taita Diostaca: ‘Jatunmari cangui’ nina canguichi. Chashna rurajpica, cangunatapash, cangunapaj dioscunatapash, cangunapaj alpacunatapash, llaquichinataca saquingapashchari.

6¿Imashpata cangunapaj shungutaca, Egiptopi causajcunashna, Faraonshna shinlliyachun saquircanguichi? Nachu, chashna ninanda llaquichijpi, ¿Israelcunataca richun saquirca?

7Cunanga, shuj mushuj carretata rurashpa, nara yapushca, huahuayuj ishcai huagracunata, aisachishpa apaichi. Huahua shicucuna catishpa ringapa munajpica, huasipi saquinguichilla.

8Mandaj Diospaj arcatapash carretapi churashpa, na alita rurashcamanda cushca curitapash, shuj uchilla cajonbi churashpa, chai arcahuan pacta cachanguichi. Chai carretataca, huagracunalla aisashpa richun saquinguichilla.

9Shinallata, Bet-semes shuti puebloman rina ñanda, chai carretata rijujta ricushpaca, Israelcunapaj Taita Diosllata llaquichishcatami yachanguichi. Ashtahuangarin, chai ñanda na rijujpica, cai llaquicunaca yangamanda shamushcatami yachanguichi” ninajurcami.

10Shina nijpimi paicunaca, imashna mandashcata ruranajurca. Huahuayuj ishcai huagracunaman aisachishpa cachangapami carretacunata huatanajurca. Huahua shicucunataca huasipimi saquirca.

11Chai jipami, Mandaj Diospaj arcataca curi ucuchata rurashcatapash, curi chuputa rurashcatapash, carretapi churashpa cacharca.

12Chai huagracunaca, Bet-semes shuti puebloman rina ñanda japishpami, alimambash lluquimanbash na anchurishpa, huacai huacai rinajurca. Filisteocunata mandajcunapash, Bet-semes shuti pueblo mujungamanmi catishpa rinajurca.

13Bet-semes pueblopi causajcunaca, trigota pambapi cuchunajushpami, Diospaj arcata apashpa shamunajujta ricunajurca. Chaita ricushpaca, ninandami cushijunajurca.

14Chai carretata aisashca huagracunaca, Bet-semes shuti pueblopimi, Josué causashca alpaman chayamushpa, shuj jatun rumi jahuapi shayarirca. Chaipimi chai runacunaca, carreta caspicunataca yamdata rurashpa, chai ishcai huagracunataca, Mandaj Diosman cushpa tucuillata rupachinajurca.

15Levitacunami, Mandaj Diospaj arcatapash, uchilla cajonbi churashca curicunatapash, carretamanda uriajuchishpa, chai jatun rumi jahuapi churanajurca. Chai punllami, Bet-semes shuti pueblopi causajcunaca, chai huagracunatapash huañuchishpa, Mandaj Diosman cushpa tucuillata rupachinajurca. Shuj ofrendacunatapashmi Diosman cunajurca.

16Chashna rurajta ricushpami, filisteocunata picha mandajcunaca, Ecrón puebloman chai punllallata tigrarca.

17Filisteocunaca, na alita rurashcata, Mandaj Dios anchuchijuchunmi, chuputashnalla rurashca curitaca cunajurca. Paicunaca: Asdod, Gaza, Ascalón, Gat, Ecrón shuti pueblocunamandami, shuj shujlla cunajurca.

18Curi ucuchacunaca, filisteocunapaj pueblocunata picha mandajcunashna, pichami carca. Shinallata, muyundita pircahuan jarcashca pueblocuna mashna cajpipash, uchilla pueblocuna mashna cajpipash, tucuillamandami cunajurca. Mandaj Diospaj arcata churashca chai jatun rumica, Bet-semes shuti pueblopi causajushca, Josuepaj alpapimi cunangaman tiyajun.

19Diosmi, Bet-semes shuti pueblopi causaj runacunataca, Mandaj Diospaj arcata pascashpa ricushcamanda, canchis chunga runacunata huañuchirca. Chai gentecunaca Mandaj Dios huañuchijpimi, ninanda huacanajurca.

20Chaimandami Bet-semes shuti pueblopi causajcunaca, cashna ninajurca: “¿Jucha illaj Diospaj ñaupajpica, pita shayari ushangayari? ¿Caimandaca, maimanda cachai ushanchi?” ninajurcami.

21Chashna nishpami, Quiriat-jearim shuti pueblopi causajcunaman cashna nishpa villachun cacharca: “Mandaj Diospaj arcataca, ñami filisteocunaca tigrachimurca. Cunanga, apangapa urai shamuichi” nichunmi cacharca.