ZACARÍAS 12 - Quichua Imbabura 2016

Jerusalen, jipa punlla cacharichi tucunamanda

1Mandaj Dios villashca cai shimicunaca, Israelcuna imalla tucunatami villajun. Jahua pachatapash, cai pachatapash ruraj, runacunaman causana samaita caraj Mandaj Diosca, cashnami nijurca:

2“Ñucami Jerusalendaca, ufiashpa machana copatashna rurasha. Paicunami, Judá llacta muyundipi causanajuj, paicunata fiñaj tucui gentecunataca chujchuchinga. Jerusalenda fiñashpa chaupipi churanajui punllami, chashna canga.

3Chai punllapica, Jerusalendaca quimiria llactacunapi causaj gentecunapaj llashaj rumishna cachunmi rurasha. Chai rumita aparijcunaca, tucuillami ñutui tucunga. Cai pachapi tiyaj tucui llactacunamandami, paita llaquichingapa tandanajunga.

4Chai punllapica, Mandaj Diosca cashnami ninga: ‘Tucui caballocunatami ninanda manllachishpa llaquichisha. Caballocunapi tiyarij macanajuj runacunatapash juizu illajtashnami rurasha. Ashtahuangarin Judá llactapi causajcunataca, Ñucami ricujusha. Shuj llactacunapi tiyaj tucui caballocunatapash ñausayachishpami llaquichisha’ ningami.

5Chaita ricushpami, Judá llacta macanajuj runacunata mandajcunaca, paicunapaj shungupica cashna yarinajunga: ‘Jerusalenbi causajcunaca, tucuita Mandaj paicunapaj Taita Diosmandami ushaita charin’ yashpami causanajunga.

6Chai punllapica, Judá llacta macanajuj runacunata mandajcunataca, yamdata rupachijuj ninatashnami rurasha. Ninanda rupajuj ninata, chaquishca fangapi churanshnami rurasha. Chaimandami, paicunapaj muyundi llactacunapi causajcunataca, alimambash, lluquimambash tucuchinajunga. Ashtahuangarin Jerusalenbi causajcunaca, paicuna causashca pushtupillatami, Jerusalenbi cutin causanajunga.

7Mandaj Diosca, Judá ayllutarami quishpinchinga. Davidpaj ninanda alicachi tucushca huasi ucupurapash, Jerusalenbi causajcunapash, ama ashtahuan Judata yalishpa jatun tucunajuchunmi chashna ruranga.

8Chai punllapica, Jerusalenbi causajcunamandaca, Mandaj Diosmi shayaringa. Paicunapurapi maijambash ushaita na charishpapash, chai huatacunapica jatun mandaj Davidshnami shinllipacha canga. Davidpaj huasi ucupuracunaca, paicunapaj ñaupajpica, Taita Diosmambash, Mandaj Diospaj angelmanbash rijchajshnami canga.

9Chai punllapica, Jerusalenda llaquichingapa shamuj llactacunataca, tucuillatami tucuchisha.

10Chaipimi, Davidpaj miraicunamambash, Jerusalenbi causajcunamambash, llaquirishpa juyaita charinatapash, Ñucata ninanda mañana yuyaitapash cuj espirituta cachamusha. Chaipimi paicunaca, jirruhuan yalijta tujsishpa Ñucata chugrichishcata ricunajunga. Shinamandami ninandapacha llaquirishpa, shujlla churi huañushcamanda huacanshna huacanajunga. Paicunaca, punda churimanda ninanda llaquirijshnami llaquirinajunga.

11Chai punllapica, Meguido shuti pambapi Hadad-rimón shuti diosmanda llaquirishpa huacashcashnami, Jerusalenbica jatun huacai tiyanga.

12Cai llactapi causajcunaca, ayllucuna imashna, shican shican tandanajushca cashpapash chashnami huacanajunga. Davidpaj huasi ucupura miraicunaca paipura, paicunapaj huarmicunapash paipurami huacanajunga. Natán runapaj huasi ucupuracunapash paipura, paicunapaj huarmicunapash paipurami huacanajunga.

13Levipaj huasi ucupura miraicunapash paipura, paicunapaj huarmicunapash paipurami huacanajunga. Simei shuti runapaj miraicunapash paipura, paicunapaj huarmicunapash paipurami huacanajunga.

14Tucuilla caishuj ayllu miraicunapash paipura, paicunapaj huarmicunapash paipurami huacanajunga.