EFESIOS 2 - Quichua Imbabura 2016

Diospaj ninan juyaimandami quishpiri ushanchi

1Juchata rurashpa, huañushcashna causanajujpimi, Diosca cangunaman causaita caramurca.

2Pundaca, cai pachapi causaj gentecunata catishpami, na alicunata rurashpa causarcanguichi. Huairapi purishpa mandajuj diablopaj munaita rurashpami causarcanguichi. Chai diablollatami, Diosta na cazujcunataca cunangaman mandashpa charijun.

3Pundaca, ñucanchipash paicunashnallatami aicha munaicunata rurashpa causarcanchi. Chashna na alitalla rurangapa yarishpami, ñucanchipaj aicha munaitalla rurashpa causarcanchi. Juchayu huacharishca cashpami, Dios ninanda fiñarishpa llaquichijpi, paicunashnallata llaquichi tucunapacha carcanchi.

4Ashtahuangarin, Taita Diosca ninandapacha llaquij, juyaj cashpami, ñucanchita juyashcataca ricuchirca.

5Juchapi causashpa huañushcashna cajpipash, Cristohuanmi ñucanchitaca causachirca. (Dios ninanda juyajpillami quishpirishca canguichi).

6Ñucanchitaca, Cristohuan causachishpami, jahua pachapipash Cristo Jesushuan tiyachirca.

7Cristo Jesusmanda, ñucanchita ninandapacha llaquishpa, juyashcata, shamui punllacunapi ricuchingapami chashna rurarca.

8Cangunaca, Dios juyashcamandami, crishpalla quishpiri ushanguichi. Canguna ima alita rurashcamandaca napacha quishpiri ushashpami, Dios carashcata chasquishpalla quishpiri ushanguichi.

9Pipash ama jariyachunmi, imatapash alita rurashcamandaca na quishpichin.

10Ñucanchipash, Cristoshnalla cashpa, alitalla rurachunmi Taita Diosca ñucanchitaca rurashca. Paillatami, pundamandapacha ñucanchitaca chashna causachun agllarca.

Cristo cruzpi huañushcamandami, Dioshuan ali tucushcanchi

11Aichapi circuncisionda rurashcacunaca, cangunataca aichapi circuncisionda na rurashcacuna cajpimi, punda huatacunaca na alicachishpa rimanajurca, chaitaca yarinami canguichi.

12Punda huatacunaca, na Cristohuan cashpami, Israel llactapuramandapash caruyashca carcanguichi. Dios carashapacha nishpa “ari” nishcatapash napacha chasquinachu carcanguichi. Imata japinatapash na shuyashpa, Taita Diostapash na rijsishpami cai pachapica causarcanguichi.

13Cangunaca, punda huatacunapica, Diosmanda carupi causanajushca cashpapash, cunanga, Cristo Jesuspaj yahuarmandami, Diospajman quimirishca canguichi.

14Cristomi ñucanchiman ali causaita caran. Shinamandami, pirca jarcashpa tiyajundashna shitashpa, ishcandi llacta shujlla tucuchun tandachirca.

15Cristo huañushpami, fiñanajushpa causanajushcatapash, mandashca shimipi “pactachinguichi” nijushcatapash, tucuchirca. Shina rurashpami, shujlla tucushpa, mushuj causaita charishpa, ali causachun chashna rurarca.

16Cruzpi huañushpami Cristoca, Taita Dioshuan cutin ali tucuchun ishcandita tandachirca. Shina rurashpami, fiñanajushpa causanajushcatapash tucuchirca.

17Cristo shamushpami, carupi causajcunamambash, caipilla causajcunamambash, Dioshuan ali causanamanda tucuicunaman villarca.

18Cristomandami, tucuicunallata shujlla Espirituta charishpa, Taita Diospajman chayai ushanchi.

19Shina cashpami, cangunaca na caru llactamanda shamushcacuna canguichi. Ashtahuangarin, Taita Diospajlla causajcuna cashpami, Diospaj huahuapura canguichi.

20Cangunaca, apostolcuna, profetacuna huasichingapa callarichishcashnami canguichi. Huasi pirca tigranapi churana, ashtahuan jatun rumica Jesucristomi.

21Paihuan shinlli shayachishca, alipacha rurashca huasishnami canguichi. Shina cashpami, Diospajlla huasi tucungacaman, Apunchi Jesushuan shujlla tucushpa, mirashpa catinga.

22Jesuspi huasichishcashna cashpami, cangunapash, Diospaj Espíritu causana huasi tucushcanguichi.