APOCALIPSIS 6 - Quichua Imbabura 2016

Sellashcacunamandami villajun

1Sellashcacunamanda shujtaca, Llamagu anchuchijtami ricurcani. Chaipimi, causaita charij chuscupuramanda shujca, rayu culun nijshna ninanda caparishpaca: “Shamui ricungui” nihuarca.

2Shina nijpimi, ñapash shuj yuraj caballota ricurcani. Chai caballopi tiyajujmi, shuj arcota charijurca. Paimanmi shuj coronatapash curca. Paica, tucuita mishashpami, ashtahuan mishashpa catingapa llujshijurca.

3Cati sellashcata anchuchijpica, shujpaj cati causaita charijmi: “Shamui ricungui” nihuarca.

4Chai jipaca, quilluman puca shuj caballomi ñapash llujshirca. Chai caballopi tiyajunmanmi, cai pachapi ali causanatapash anchuchishpa, caishuj chaishuj huañuchirichumbash ushaita curca. Shinallata, shuj jatun espadatapashmi curca.

5Ishcaipaj cati sellashcata Llamagu anchuchijpica, ishcaipaj cati causaita charijpash: “Shamui ricungui” nihuarcami. Shina nijpica, shuj yana caballo ñapash llujshimujtami ricurcani. Chai caballopi tiyajujmi, shuj balanzata paipaj maquipi charijurca.

6Causaita charij chuscupurapaj chaupimandami cashna nishpa rimajta uyarcani: “Ishcai libra trigoca, shuj denario culquipajmi canga. Shinallata, sucta libra cebadapash, shuj denario culquipajmi canga. Ashtahuangarin, aceiteta, vinotaca na tacarinachu cangui” nijurcami.

7Quimsapaj cati sellashcata Llamagu anchuchijpica, quimsapaj cati causaita charijpash: “Shamui ricungui” nihuarcami.

8Shina nijpimi, ñapash shuj quillu caballota ricurcani. Chai caballopi tiyajujpaj shutica: “Huañuchishpa tucuchij” shutimi carca. Shinallata, Hadespash catiriyajmi llujshimurca. Cai pachata chuscupi chaupishpami, shuj chaupitaca, espadahuan, yarjaihuan, ungüihuan, millai animalcunahuan huañuchinajuchun ushaita curca.

9Chuscupaj cati sellashcata Llamagu anchuchijpica, Taita Diospaj Shimita aliguta villanajushcamanda, huañuchi tucushca almacuna, altar ucupi cajtami ricurcani.

10Paicunami, cashna nishpa ninanda caparinajurca: “Jatun Dioslla, canga jucha illaj, na llullajmi cangui. Cai pachapi causajcuna, ñucapaj yahuarta jichashpa huañuchijcunataca, ¿ima punllacamanda paicunatapash, tapuchishpa llaquichigripangui?” ninajurcami.

11Paicunamanga, yuraj churajunata churachishpami, cashna nirca: “Asha punllacunata samashpa shuyanarami canguichi. Cristopajta ruranajushcamanda, cangunashnallata, huañuchi tucunacuna nara pactashcamandami, chashna shuyanara canguichi” nijurcami.

12Pichapaj cati sellashcata Llamagu anchuchijpica, alpa mama ninanda cuyushpa tucuchindami ricurcani. Shinallata, indipash yana yana tucushpami, cilicio findushna tigrarca. Lunapash, yahuarshna pucamanmi tigrarca.

13Ninanda huairashpa higo yurata cuyuchijpi higocuna urmajshnami, jahua pachamanda luzerocunapash, cai pachaman urmamurca.

14Jahua pachapash, cara pillurinshnami tucurirca. Cai pachapi tiyanajuj urcucunapash, mama cucha chaupipi tiyanajuj alpacunapash, maipi tiyanajushcamandaca, tucuillami chingarca.

15Shinallata, cai pachata jatun mandajcunapash, mandajcunapash, ninan charijcunapash, macanajuj runacunata mandajcunapash, ushaita charijcunapash, gañangunapash, na gañangunapash, tucuillami urcu huaicucunapi, rumi utujucunapi pacajungapa mascanajurca.

16Paicunaca, urcucunata, huaicucunatami cashna ninajurca: “Mandangapa tiyarinapi tiyajuj ama ñucanchita ricuchun, urmashpa pacahuaichi. Shinallata, Llamagupash ninanda fiñarishpa ñucanchita llaquichinamandaca pacahuaichi” ninajurcami.

17Shinallata: “Cunanga, paicuna ninanda fiñarishpa llaquichimui punllamari pactamushca. Cashnapacha llaquipica ¿pita shayari ushangayari?” ninajurcami.