JEREMÍAS 37 - Quichua Imbabura 2016

Jeremiasta prezu churashcamanda

1Babilonia llactata jatun mandaj Nabucodonosormi, Josiaspaj churi Sedequías runataca, Judá llactata jatun mandaj cachun churarca. Paica Joacimbaj churi Coniaspaj randimi mandajurca.

2Mandaj Dios, Jeremiasman imata villashcatapash, Sedequías runaca, paipajta rurajcunapash, chai llactapi causajcunapash, na cazurcachu.

3Jatun mandaj Sedequías runaca: “Ñucanchita Mandaj Diosta ñucanchimanda ninanda mañapai” nichunmi, Selemías shuti runapaj churi Jucal shuti runata, Maasías shuti runapaj churi sacerdote Sofonías runata, profeta Jeremiaspajman cachamurca.

4Jeremiastaca, nara prezu churashcachu carca. Chaimandami paica, gentecunahuan cungashca purijurca.

5Faraonbaj macanajuj runacuna, Egiptomanda llujshimujujtami, Jerusalén muyundipi shuyanajuj caldeo macanajuj runacunaca yacharca. Chaita yachashpami, Jerusalenmandaca anchurishpa rinajurca.

6Chaimandami Mandaj Diosca, cai shimicunata Jeremiasman cashna nishpa villarca:

7“Israelcunata Mandaj Taita Diosca, cashnami nin: ‘Ñucata tapuchun cangunata cachamuj, cai Judá llactata jatun mandajtaca, cashna nigrichi: Cangunata yanapangapa llujshimuj Faraonbaj macanajuj runacunaca, ñami paicunapaj Egipto llactamanllata cutin tigrarca.

8Chaimandami, caldeo runacunaca cutin tigramugrin. Paicunaca, macanajushpa mishashpami, cai pueblotaca rupachinajunga’ ninmi.

9Mandaj Diosca, cashnatapashmi nin: ‘Caldeo runacunaca, ñami rishca yashpaca, na pandarinachu canguichi. Paicunaca, caimandaca na rishcachu.

10Canguna chai macanajuj caldeo runacunata mishajpi, huaquinlla puchushca runacuna, paicuna huañunalla cashpapash, tucuilla jatarishpami, cai pueblotaca rupachinga’ ninmi nigrichi” nijurcami.

11Caldeo macanajuj runacunaca, Faraonbaj macanajuj runacuna shamunajujta yachashpami, Jerusalenmanda llujshishpa rinajurca.

12Shina rinajujpimi Jeremiasca, Jerusalén pueblomanda, Benjamín ayllupaj llactaman rijurca.

13Paica, Benjamín shuti pungumanmi chayarca. Chaipica, macanajuj runacunata mandaj Irías shuti runami ricujurca. Paimi, profeta Jeremiastaca:

“Canga, caldeocunapajmanmi rijungui” nishpa prezu japirca.

Irías shuti runaca, Selemías shuti runapaj churimi. Selemías shuti runaca, Hananías shuti runapaj churimi carca.

14Irías runataca, Jeremiasca:

“Pandatami nijungui, na caldeo runacunapajman rijunichu” nirca.

Shina nijpipash na uyashpami Irías shuti runaca, Jeremiastaca, mandajcunapaj ñaupajman pusharca.

15Mandajcunaca ninanda fiñarishpami, Jeremiastaca astishpa, Jonatán shuti quilcaj runapaj huasipi, prezu churanajurca. Chai huasitaca, prezuna huasitami rurashca carca.

16Chai huasipica Jeremiastaca, ucuman allashpa utujushca ucupimi churarca. Chaipimi paica, tauca punllacunata tiyajurca.

17Jatun mandaj Sedequías runaca, Jeremiasta chai ucumanda llujchimuchunmi cacharca. Chaimanda llujshimujpimi:

“¿Mandaj Diosca, imatapash villanllu?” nishpa, paipaj huasipi pacalla tapurca. Shina tapujpimi Jeremiasca, cashna nirca:

“Ari, pai villashcataca charinimi. Babilonia llactata jatun mandajpaj maquipimi, churai tucugringui” nirca.

18Jeremiasca, jatun mandaj Sedequías runataca, cashnatapashmi nijurca:

“Ñucata cashna prezu churangapaca, candapash, cambajta rurajcunatapash, cai gentecunatapash, ¿Imata na alitata rurashcani?

19Cunanga, cangunapaj profetacunaca, ¿maipita canga? Paicunaca: ‘Babilonia llactata jatun mandajca, cangunatapash, cai llactatapash na llaquichingapa shamungachu’ nishpami villanajurca.

20Ñucata jatun mandajlla, cunanga caigutallami nigripani. Ñuca mañashcata ari nihuailla: Ñucaca, Jonatán shuti quilcaj runapaj huasipi huañungapaca, na munapanichu. Ama chaiman cutin cachahuanguichu” nijurcami.

21Shina nijujpimi, jatun mandaj Sedequías runa mandajpi, Jeremiastaca prezuna huasi patiopi churanajurca. Paimanga, Tandata jatunajuj ñanmanda apamushpami, mishqui tandata punllandi caranajurca. Chai pueblopi tanda tiyangacamanmi chashna caranajurca. Shinami Jeremiasca, prezuna huasi patiopilla tiyajurca.