LEVÍTICO 6 - Quichua Imbabura 2016

1Mandaj Diosca, Moisestaca cashnami nijurca:

2“Maijan cashpapash, Mandaj Dios mandashcacunata yangapi churashpaca juchatami rurajun. Shinallata ricupangui nishpa, paipaj maquipi mingashca jahua, pita cashpapash shuhuashpa, rimashpa llaquichishpaca juchatami rurajun.

3Shinallata chingachishcata tarishpa, llullashpa na tigrachishpapash, tucui imapipash gentecuna juchapi urmashpa, llullashpa juramentushpapash juchatami rurajun.

4Chashna juchata rurashpa llaquichishcamandaca, imata shuhuashcatapash tigrachinatami charin. Yangata juchachishpa llaquichishcamandapash, paipaj maquipi mingashcatapash, chingachishcata tarishcatapash tigrachinatami charin.

5Na cashpaca, tucui imamandapash llullashpa juramentushpa na tigrachishcamandaca, juchata perdonachun animalta Diosman cujui punllapimi, pichapi chaupishcamanda shujta yapachishpa tucuillata tigrachinata charin.

6Juchata perdonachunga, paipaj llamacunamanda, shuj jari ali llamatami Mandaj Diosman apamunga. Chaitaca, mashnata cuna cashcata ali ricushpami, sacerdoteca juchamanda rupachingapa japinga.

7Chai jipami sacerdoteca, chai runapaj juchata perdonachun, Mandaj Diospaj ñaupajpi rupachijunga. Chashna rurajpimi, ima na alita rurashpa llaquichishca cajpipash perdonanga” nijurcami.

Animalcunata Diosman cushpa huañuchinamanda

8Mandaj Diosca, Moisestaca cashnatapashmi nijurca:

9“Aarondapash, paipaj churicunatapash cashna nishpa mandangui: ‘Animalta Diosman cushpa tucuillata rupachinaca canshnami canga: Tucuillata rupachina animalca, ninata japichishca altarpimi, punllayangacaman tucui tuta rupashpa pacaringa. Chaitaca, altarpi rupajuj ninami tucuillata rupachinga.

10Shinallata sacerdoteca, lino telata rurashca churajunatapash, lino telatallata rurashca ucuman churajuna calzondapash, churajushcami canga. Tucuillata rupachina animalta rupachishca jipaca, sacerdotemi chai altarmanda uchufata anchuchishpa, shujman churanga.

11Chai jipami chai churajushcata llujchishpa, shuj churajunacunata churajushpa, chai uchufataca, carpacunata shayachishca pushtumanda caruman apashpa, na mapayashca pushtupi churanga.

12Altarpi japichishca ninaca, sacerdote punllandi tutamandata yamdata churajpimi, na huañushpa rupajungalla. Chai nina jahuapimi tucuillata rupachina animaltapash, Dioshuan ali cangapa carashpa huañuchishca animalpaj viratapash rupachijunga.

13Chai altarpi ninaca, na huañushpa rupajungallami.

14Diosman ofrendata caranamandaca, cashnami mandashca: Chaicunataca, Aaronbaj churicunami, Mandaj Diospaj ñaupajman apashpa, altar ñaupajpi churanajunga.

15Diosman carashca ofrendamandaca, maqui junda ali jacuta japishpami, aceitehuan, inciensohuan, altar jahuapi rupachinga. Chaitaca, na cungashpa yarichunmi, Mandaj Dios Ñuca ñaupajpi mishquilla ashnajuchun rupachijunga.

16Chai puchushcataca Aaronbash, paipaj churicunapashmi micunajunga. Chaitaca, Ñucahuan tuparina jatun carpa patiopi, Ñucapajlla shicanyachishca pushtupimi, levadura illajta micunajunga.

17Chaitaca levadura illajtami yanuna. Ñucaman carashpa rupachishca ofrendamandaca, paicunamanmi ashata saquini. Chaicunaca, juchamanda Ñucaman cushpa huañuchishca animalshnallata, na alita rurashcamanda cushca ofrendashnallata, Ñucapajlla cachun shicanyachishcami.

18Chaicunataca Aaronbaj mirai tucuilla jaricunami micunajunga. Mandaj Diosman cushpa rupachijuchun mandashcacunaca, cangunapaj miraicunapash tucui causaipi pactachinajuchun cushca shimicunami. Shinallata tucui ima cashpapash Diospajlla shicanyachishcapi tacarishpaca, Diospajllami tucunga’ nishpa mandangui” nijurcami.

19Mandaj Diosca, Moisestaca cashnatapashmi nijurca:

20“Aaronbash, paipaj churicunapash, aceiteta talishpa javi tucushca punllapi, Mandaj Diosman caranacunaca caicunami: Paicunaca, ishcai kilo yali ashtahuan ali jacutami, tucui causaipi cunajunga. Chaitaca chaupitaca tutamanda, chaupitaca chishimi cunajunga.

21Chaitaca, callanapi aceitehuan aliguta yanuchishpami apamunajunga. Chai carashca ofrendamandaca, Mandaj Diospaj ñaupajpi mishquilla ashnajuchunmi, chaupishpa chaupishpa, rupachinajunga.

22Aaronbaj randi sacerdote cachun, paipaj churicunamanda aceiteta talishpa javi tucushca sacerdotepash chashnallatami ruranga. Caica, causaita causaicaman pactachinajuchun, Mandaj Dios mandashca shimicunami. Shina cashcamandami, chai ofrendataca tucuillata rupachina canga.

23Sacerdote cushca ofrendataca, tucuillata rupachinami canga. Chaitaca na micungachu” nijurcami.

24Mandaj Diosca, Moisestaca cashnami nijurca:

25“Aaronmambash, paipaj churicunamambash, cashna nishpa villangui: ‘Juchamanda Diosman cushca animalta huañuchijuchun mandashcacunaca, caicunami: Diosman cushpa tucuillata rupachina animalta, cungata cuchushpa huañuchina pushtupillatami, juchamanda cushca animaltapash, Mandaj Diospaj ñaupajpi cungata cuchushpa huañuchinga. Chaica, Diospajlla shicanyachishcami.

26Chaitaca juchamanda Diosman cushpa rupachij sacerdotellatami micunga. Dioshuan tuparina jatun carpa patiopi, Diospajlla shicanyachishca pushtupimi micunga.

27Tucui ima cashpapash, chai aichapi tacarishpaca Diospajllami tucunga. Shinallata yahuar zimbrashpa churajunapi javirijpica, chaitaca Diospajlla shicanyachishca pushtupimi tajshana cangui.

28Chai aichata yanushca alpa mangataca faquinami cangui. Bronce mangapi yanushca cashpaca, chaitaca aliguta jacushpami, yacuhuan maillana cangui.

29Chai aichataca, sacerdotecunamanda tucui jaricunami micunga. Chaica Diospajlla shicanyachishcami.

30Ashtahuangarin Dioshuan tuparina jatun carpa ucupi, juchata anchuchijuchun yahuarta Diosman cungapa huañuchishca animalpaj aichataca napacha micunachu. Chaitaca ninapimi rupachina canga.