DEUTERONOMIO 31 - Quichua Imbabura 2016

Moisespaj randi Josueta agllashcamanda

1Moisesca, tucui Israelcunaman cutin villajushpami,

2cashna nijurca:

“Cunanga ñami patsaj ishcai chunga huatata charini. Cangunahuan maiman llujshitapash, tigramuitapash na ushanachu cani. Mandaj Diosca: ‘Cai Jordán yacutaca napacha chimbanguichu’ nihuarcami.

3Mandaj Taita Dios, cangunata ñaupashpa rishpami, chai llactacunapi causajcunataca, cangunapaj ñaupajpi tucuchijpi, chai llactacunataca cangunapaj cachun japinguichi. Mandaj Dios imashna nishcashnami, Josueca cangunata pushashpa chimbanga.

4Mandaj Diosca, amorreo gentecunata mandaj Sehón shuti, Og shuti runacunata tucuchishcashnami, chaipi causajcunatapash tucuchinga.

5Chaipi causajcunataca, Mandaj Taita Dios cangunapaj maquipi churajpimi, Ñuca mandashcashna chai gentecunataca tucuchina canguichi.

6Cangunaca, shinlli tucushpa, ali yuyaita japishpami, paicunapaj ñaupajpica na manllana canguichi. Mandaj Taita Diosmi cangunahuan canga. Paica na saquingachu, na jichungachu” nijurcami.

7Chai jipami Moisesca, Josueta cayashpa tucui Israelcunapaj ñaupajpi cashna nirca:

“Shinlli tucushpa, ashtahuan ali yuyaita japishpami, ñaupa taitacunaman carashami nishpa Mandaj Dios juramentushca llactaman yaicushpa japigrina cangui.

8Mandaj Diosmi, candaca ñaupashpa ringa. Paica, canhuanmi canga. Paica na saquingachu, na jichungachu. Shina cashcamanda, na manllanachu cangui” nircami.

9Moisesca, mandashca shimicunata quilcashpami, Levipaj mirai sacerdotecunaman, tucui Israelcunata mandaj ancianocunamambash curca. Levitacunaca, Mandaj Dioshuan ari nishpa quilcashcata alichishca arcata apajcunami carca.

10Paicunatami Moisesca cashna nishpa mandarca:

“Tucui canchis huata tucurijuipimi, imata mañashcatapash na tigrachina huatapi, chugllata rurashpa cushijuna punllata rurana canguichi.

11Canda Mandaj Taita Dios agllashca pushtupi, Paipaj ñaupajmanmi tucui Israelcuna shamuna canga. Chaipica, cai mandashca shimicunatami, tucuicunapaj ñaupajpi paicuna uyajta quilca catina canguichi.

12Tucui jaricunata, huarmicunata, huahuacunata, cangunapaj pueblocunapi causaj shuj llactamanda runacunatapashmi, tucuicunata tandachina canguichi. Cai shimicunata uyashpa, Mandaj Taita Diosta manllaihuan cazushpa pactachinajuchunmi, chashna tandachina canguichi.

13Shinallata, paicunapaj miraicuna nara yachashca cashpapash, Mandaj Taita Diosta manllashpa causangapa uyashpa yachajuchunmi, chashna tandachina cangui. Jordán yacuta chimbashpa causangapa rinajuj llactapimi chaitaca pactachina canguichi” nijurcami.

14Mandaj Diosca, Moisestaca cashnami nirca:

“Ñami can huañuna punllapash chayamushca. Josueta cayashpa, Ñucahuan tuparina jatun carpapi shuyaichi. Chaipimi, pai imatalla ruranataca villasha” nircami.

Shina nijpimi Moisespash, Josuepash rishpa, Dioshuan tuparina jatun carpapi shuyanajurca.

15Chaipimi Mandaj Diosca, pilarshnalla shayajuj fuyupi ricurirca. Pilarshnalla shayajuj fuyuca, jatun carpaman yaicuna pungu jahuapimi shayarirca.

16Chaipimi Mandaj Diosca, Moisestaca cashna nijurca:

“Canga huañushpami, cambaj ñaupa taitacunahuan tandanajugringui. Can huañujpica, cai Israelcunaca, paicuna causangapa rinajuj llactapi tiyaj shuj rurashcalla dioscunata catishpami, na alita rurashpa causanajunga. Shina rurashpami, Ñuca paicunahuan ari nishcatapash saquishpa, yangapi churanajunga.

17Chaimandami chai punllapica, paicunahuanga ninandapacha fiñarishpa, jichushpa saquijpi, paicunaca tucuchi tucunga. Paicunataca, ashtaca na alicuna, ninan llaquicuna chai punllapi japijpimi: ‘¿Nachu ñucanchi Taita Dios, na ñucanchihuan cajpi cai llaquicunaca japimujun?’ ninajungami.

18Chai punllapica, chai tucui na alicunata rurashcamandami paicunamandaca anchurisha. Shuj rurashcalla dioscunaman tigrarishcamandami, chashna rurasha.

19Cunanga, cai candanata quilcashpa, Israel miraicunaman yachachingui. Cai candanataca, Israelcunata fiñashpa llaquichinata ricuchijuchun, paicunapaj shimihuambacha candanajuchunmi chashna yachachina cangui.

20Paicunapaj ñaupa taitacunaman juramentushca llactamambash, Ñucallatami pushasha. Chai llactapica lechepash, balun mishquipash ashtacapachami tiyan. Chaipica, na munangacaman micushpami virayanajunga. Shina cashpapash, shuj dioscunapajman tigrarishpa, chaicunata alicachishpami, Ñucata fiñashpa, Ñucahuan ari ninajushcatapash yangapi churanajunga.

21Ashtaca na alicuna, ninan llaquicuna japijpimi, cai candanaca tucui shungu yarichinga. Paicunapaj miraicunapash, paicunapacha candashpami chashna yarinajunga. Paicunaman carashami nishpa juramentushca llactaman nara chayashpallata, paicuna imata yarinajujtaca ñami ali yachani” nijurcami.

22Moisesca, cai candanataca chai punllallata quilcashpami, Israelcunaman yachachijurca.

23Shinallata, Nun shuti runapaj churi Josuetaca, cashna nishpami mandarca:

“Shinlli tucushpa, ashtahuan ali yuyaita japingui. Canmi, Israelcunataca, Ñuca carashami nishpa juramentushca llactaman pushangui. Ñucami canhuan casha” nircami.

Mandashca Shimicunata quilcashcata churanajuchun mandashcamanda

24Moisesca, mandashca shimicunataca, shuj libropimi tucuringacaman quilcarca.

25Chai jipami Moisesca, Mandaj Dioshuan ari ninajushpa quilcashcata alichishca arcata apaj levitacunataca, cashna nishpa mandarca:

26“Mandashcata quilcashca cai librota japishpa, cangunata Mandaj Taita Dioshuan ari ninajushpa quilcashcata alichishca arcahuan pacta churaichi. Chaipimi, canguna cazushpa causachun yachachingapa tiyajunga.

27Canguna na cazuj cajtapash, shinlli shungu cajtapash alimi yachani. Cangunahuan caipi causajujpipash, Mandaj Diostaca napacha cazujcunami canguichi. Ñuca huañushca jipacarin, ¿nachu ashtahuan na alicuna tucunguichi?

28Cangunapaj ayllucunata mandaj ancianocunata, caishuj mandajcunatapash, Ñuca ñaupajman tandachimuichi. Paicuna uyajtami cai shimicunata rimagrini. Shinallata jahua pachapaj, cai pachapaj ñaupajpimi, cai shimicunataca nigrini.

29Ñuca huañushca jipaca, na alicunapacha tucushpami, ñuca mandashca ñanmandapash anchuringuichi. Shinallata, Mandaj Diospaj ñaupajpi, cangunapaj maquihuan na alicunata rurashpa fiñachishcamanda, jipa punllacunapi jatun llaquicuna shamunataca yachanimi” nijurcami.

Moisés candashcamanda

30Shina nishca jipami Moisesca, tandanajushca tucuilla Israelcuna uyajta, callarimanda tucuringacaman candashpa yachachijurca.