1 SAMUEL 13 - Quichua Imbabura 2016

Israelcunaca, filisteocunahuan macanajushcamanda

1Saulca, ñami shuj huatata mandajushca carca. Ña ishcai huatata Israelcunata mandajushpami,

2Israelpuramandaca, quimsa huaranga runacunata macanajuiman richun agllarca. Chaicunamandaca, ishcai huaranga runacunahuanmi, Saulhuanga Micmas shuti pueblopi tiyajuj, Bet-el shuti urcupi saquirirca. Shuj huaranga runacunaca, Benjamín llactapimi Gabaa pueblopi, Jonatanhuan saquirirca. Na agllai tucushca runacunataca, paicunapaj carpacunamanmi tigrachirca.

3Lomapi macanajungapa shuyanajuj filisteocunata, Jonatán mishashcatami filisteo gentecunaca yachaj chayarca. Chaimandami Saulca: “Hebreocuna yachachun nishpa” tucuilla llactapi trompetacunata huacachinajuchun mandarca.

4Tucui Israelcunami: “Saulmi, lomapi macanajungapa shuyanajun filisteocunata mishashca. Chaimandami filisteocunaca, Israelcunata na ricunayachinajun” ninajujtami uyarca. Shinamandami Gilgal pueblopi, Saulhuan tandanajungapa Israelcunaca, tucuilla shamurca.

5Filisteocunaca, Israelcunahuan macanajungapami tandanajurca. Paicunaca: Quimsa chunga huaranga macanajuna carretacunahuan, sucta huaranga caballopi tiyarishca runacunahuan, t'iyu alpashna, na yupai ushanalla chaquilla shamuj runacunami tandanajurca. Paicunaca, Micmas shuti puebloman vichai rishpami, carpacunata shayachishpa tiyanajurca. Chai puebloca, Bet-avén shuti pueblomandaca, indi llujshimujmanmi saquirin.

6Israelcunaca, chaupipi churai tucushca, ninan llaquipi cashpami, jatun utujucunapi, zanja huashacunapi, jatun rumi chaupicunapi, jacacunapi, yacu huashajuchun rurashca utujucunapi pacajunajurca.

7Shinallata huaquin hebreocunaca, Jordán yacuta chimbashpami, Gad shuti, Galaad shuti llactacunaman rinajurca. Ashtahuangarin Saulca, Gilgal pueblomandaca na anchurircachu. Shina cajpipash, paihuan saquirishca runacunaca, ninanda manllashpami chujchunajurca.

8Shinallata, Saulca, Samuel nishcata cazushpami, canchis punllata shuyajurca. Ashtahuangarin Gilgal puebloman Samuel na ucha shamujpimi gentecunaca, caita chaita ri callarirca.

9Chaimandami Saulca: “Diosman animalta cushpa tucuillata rupachinatapash, Dioshuan ali cangapa ofrendacunatapash apamuichi” nirca. Chaicunatami, Diosman cushpa tucuillata rupachijurca.

10Diosman cushpa tucuillata ña rupachishpa tucuchijujpimi, Samuelca chayamurca. Shina chayamunta ricushpami, Saulca: “¿Alillachu capangui?” nishpa tuparingapa llujshirca.

11Chaipimi Samuelca: “¿Imatata rurarcangui?” nirca. Shina nijpimi Saulca: “Tucuilla gentecuna ñucataca saquishpa ri callarijpi, cambash na ucha shamujpi, filisteocunapash, Micmas shuti pueblopi tandanajujpimi,

12cashna yajurcani: ‘Cunanga, filisteocunaca ñucanchihuan macanajungapa Gilgal puebloman urai shamungami. Ñucami, Mandaj Dios yanapachunga, nara mañani’ yashpami, Mandaj Diosman cushpa tucuillata rupachingapa shayarircani” nircami.

13Shina nijpimi Samuelca, Saultaca cashna nijurca: “Canda Mandaj Dios mandashcata na pactachishpami, canga juizu illajshna rurashcangui. Mandaj Dios mandashcata pactachijpica, Israel llactata can mandachun, cambaj huahuacunapash mandashpa causachunmi churanman carca.

14Cunanga, cai llactataca na unaicaman mandanguichu. Mandaj Diosca, Pai munashca runata agllashpami, Paipaj gentecunata mandachun churanga. Mandaj Dios mandashcata, can na cazushamandami chashna ruranga” nijurcami.

15Shina nishca jipami Samuelca, Gilgal pueblomandaca, Benjamín llactapi tiyajuj Gabaa puebloman vichai rirca. Macanajunata yachaj runacunata, Saúl yupajpica, sucta patsajllami chaipi cashca carca.

16Saulpash, paipaj churi Jonatanbash, paihuan rishca runacunapash, Benjamín llactapi tiyajuj Gabaa pueblopimi saquirirca. Filisteocunaca, Micmas shuti pueblopimi, carpacunata shayachishpa tiyanajurca.

17Pacalla chapangapa rishca filisteocunaca, quimsapi chaupirishcami carca. Shuj chaupirishcacunaca, Sual shuti llactapi tiyajuj Ofra shuti puebloman rina ñandami rinajurca.

18Caishuj chaupirishcacunaca, Bet-horón shuti puebloman rina ñandami rinajurca. Shinallata, chaishuj chaupirishcacunaca, jichushca pambatami, Zeboim shuti pugru pambaman rinajurca.

19Israel llactapica, jirrucunata tacashpa imatapash ruraj runaca, shujllapash na tiyarcachu. Chaimandami filisteocunaca: “Hebreocunataca espadatapash, tucsina jirrutapash rurachunga napacha saquinachu canchi” nishca carca.

20Israelcunaca, yapuna rejacunata, palacunata, hachacunata, hocescunataca, filisteocunapajpimi afilachishpa causaj carca.

21Shinamandami, yapuna rejamanda, palamandaca, pusaj gramota pezaj culquita filisteocunaca japinajuj carca. Shinallata, hachacunata, yapuna jirrucunata afilachishcamandaca, quimsa gramota pezaj culquitami japinajuj carca.

22Macanajuna punllacunapica Saulpaj, Jonatanbaj, ali macanajunata yachaj runacunaca, espadatapash, tucsina jirrutapash na charircachu. Saulhuan, paipaj churi Jonatanhuanllami charirca.

23Macanajunata yachaj filisteo runacunaca, Micmas shuti puebloman rina ñangamanmi shamunajurca.