1Cutinllata vichai ricushpaca, ishcai urcu chaupimanda chuscu carretacuna llujshimujtami ricurcani. Chai urcucunaca, bronce urcucunami carca.
2Punda carretataca, puca caballocunami aisanajurca. Jipa carretataca, yana caballocunami aisanajurca.
3Ishcaipaj cati carretataca, yuraj caballocunami aisanajurca. Quimsapaj cati carretataca, ninan shinlli, muru caballocunami aisanajurca.
4Chaita ricushpami ñucahuan rimajuj angeltaca: “Ñuca mandajlla, ¿caicunaca imata capan?” nishpa tapurcani.
5Shina nijpimi chai angelca cashna nirca: “Caicunaca Mandaj Diospaj ñaupajpi ricurishca jipa llujshimuj, jahua pacha chuscundi suyucunamanda shamuj huairami” nircami.
6Yana caballocunaca, janajman tiyanajuj llactamanmi carretata aisashpa llujshinajurca. Yuraj caballocunaca, chai carretata catishpami llujshinajurca. Muru caballocunaca, uraman tiyanajuj llactamanmi llujshinajurca.
7Puca caballocunaca, cai pacha muyundita ñapash ringapami shayanajurca. Chaimandami paicunataca: “Cai pachata muyugrichi” nijpi, cai pachata muyugrirca.
8Chai jipami ñucata cayashpa, angelca cashna nihuarca: “Janajman tiyanajuj llactaman rijcunaca, Ñuca imata rurachun mandashcatami pactachinajunga” nihuarcami.
Jatun mandaj cachun, Josueman coronata churachishcamanda9Mandaj Diosca, cashnami nihuarca:
10“Babilonia llactaman prezu apai tucushpa tigramushca, Heldai, Tobías, Jedaías shuti runacunata ofrendacunata mañangui. Chai ofrendacunahuanga, Sofoniaspaj churi Josiaspaj huasiman, chai punllallata ringuilla.
11Chaiman chayashpaca, culquihuan, curihuanmi, coronacunata rurana cangui. Chaitaca, Josadac shuti runapaj churi, sacerdotecunata mandaj Josueman churachinguilla” nircami.
12Chai jipaca cashna ningui: “Tucuita Mandaj Diosca, cashnami nin: ‘Mushuj yura viñajujshna Ñucapajtalla ruraj runaca, ñallami shamunga. Paica, aliguta viñashpami Mandaj Diospaj huasitaca cutin ruranga.
13Paimi, Mandaj Diospaj huasitaca shayachinga. Paica, ninanda alicachi tucushcami canga. Paica, mandangapa tiyarinapi tiyarishpami, tucuita mandanga. Paihuanga, shuj sacerdotemi pacta canga. Paicunaca, ishcandimi shujlla yuyaita charinga.
14Chai coronataca Helem, Tobías, Jedaías shuti runacunatapash, shinallata Sofoniaspaj churi Hen shuti runatapash yarinajuchunmi, Mandaj Diospaj huasipi churana cangui’ ninmi ningui” nihuarcami.
15Caru llactacunapi causajcuna shamushpami, Mandaj Diospaj huasitaca cutin yanapashpa huasichinajunga. Chaita ricushpami, Mandaj Diosllata cangunapajman ñucata cachamushcata yachanguichi. Cangunata Mandaj Dios rimashca shimita uyashpa cazujpimi, chashnaca pactanga.
Who We AreWhat We EelieveWhat We Do
2025 by iamachristian.org,Inc All rights reserved.
