HEBREOS 10 - Quichua Imbabura 2016

1Mandashca shimicunaca, jipa punllacunapi Dios caramusha nishcata ashatalla ricuchijllami cashca. Shina cajpimi, imata carasha nishcapachaca nara pactashca. Chaicunata pactachishpa, animalcunata huatan huatan cushpa purinajushpapash, Diospajman quimirishpa alipacha caitaca napacha ushashcachu.

2Chaicuna, juchata anchuchi ushashca cajpica, chaicunata rurashpa catinataca saquinmanmi carca. Chaita ruraihuanlla jucha illaj saquirishca cashpaca, juchayu cashcatapash na ashtahuan yarinmanllu carca.

3Ashtahuangarin, animalcunata Diosman cushpa huañuchinajushpaca, huatandimi paicunapaj juchacunataca yarinajun.

4Ashtahuangarin, jari huagracunapaj, jari chivocunapaj yahuarca, napacha juchacunata anchuchi ushanllu.

5Shina cajpimi, cai pachaman shamushpaca cashna nirca:

“Animalta huañuchishpa cunajuchumbash,

ofrendata cuchumbash na munarcanguichu.

Ashtahuangarin Ñucatami, runa aichayuj tucuchun alichihuashcangui.

6Animalcunata cushpa tucuillata rupachijpipash,

juchacunata anchuchijuchun cujpipash, napacha cushijunguichu” nircami.

7Chaimandami cashna nircani:

“Ricui Taita Dioslla, Cambaj munaita pactachingapami shamuni.

Ñucamanda quilcashpa, pillushca libropi nijushcashnallatami shamurcani” nijurcami.

8Caitarami punda nirca: “Animalta Diosman cushpa huañuchishcatapash, ofrendata cushcatapash, animalcunata cushpa tucuilla rupachishcatapash, juchacunata anchuchijuchun imata cushcatapash, na cushijushpa chasquircanguichu” nircami. (Mandashcapi nijushcamandallami, chaicunataca cunajun).

9Chai jipaca cashnatapashmi nirca: “Taita Dioslla, Cambaj munaita pactachingapami shamuni” nircami. Mushuj mandashcata churangapami, punda mandashcataca anchuchirca.

10Dios munashcata pactachishcamandami, ñucanchica Diospajlla tucushcanchi. Jesucristo aichayuj tucushpa, Paillata cararishpa, shuj cutinlla huañushcamandami, Diospajlla tucushcanchi.

11Diospajta ruraj sacerdotecunaca, punllandimi animalcunataca huañuchishpa Diosman caranajun. Chaita rurashcacunaca, na juchacunata anchuchi ushanllu.

12Ashtahuangarin, causaita causaicamanmi, tucuicunapaj juchacunamanda Diosman cararishpa, Cristoca shuj cutinlla huañurca. Cunanga, Taita Diospaj ali maquimanmi tiyajun.

13Paica, Paita fiñajcunata, Paipaj chaqui sarunapi Dios churanatami shuyajun.

14Paica, shuj cutinlla Diosman cararishpa huañushpami, Diospajlla causajcunataca, causaita causaicaman ima pandatapash na rurashpa causachun agllashca.

15Shinallatami jucha Illaj Espiritupash, ñucanchiman villashca jipaca cashna nijurca:

16“Paicunahuanmi ari nirishcata pactachingapaca, cashna ruragrini.

Jatun Diosca: Chai punllacuna jipami, cashna ruragrini nijunmi.

Ñuca mandashca shimicunataca, paicunapaj shungupimi churasha.

Paicunapaj yuyaipipashmi, quilcajshna churasha” nijunmi

17Ashtahuan cashnatapashmi nijurca:

“Paicunapaj juchacunatapash, paicuna na cazushcacunatapash,

napacha ashtahuan yarishachu” nijurcami.

18Ñucanchi juchacunata ña anchuchishca cajpimi, ashtahuan ofrendata juchamanda cunataca na charinchi.

19Shina cajpica, juyashca crijcuna, Jesucristopaj yahuarmandami, Diospajllapacha shicanyachishca ucumanga yaicui ushanchi.

20Jesucristomi, quilpashca tiyajuj fachataca liquishpa pascashpa, causaita causagrina mushuj ñanda, ñucanchiman ricuchirca. Chai facha liquirishcataca, Paipaj cuerpo llaquichi tucushcatami shina nijun.

21Taita Diospaj huasipica, Jesustami ñucanchipaj jatun Sacerdoteta charinchi.

22Shinamandami, na nij tucushpalla, tucui shunguhuambacha crishpa, Diospajman quimirina canchi. Ñucanchi shungutapash mapa illaj yuyaillata rurashpa, ñucanchi cuerpotapash mapa illaj yacuhuan armashpami quimirina canchi.

23Paita crishpa, cushijuihuan shuyanajushcataca, na cungashpami shinllitapacha aliguta catina canchi. Diosca, Pai carashami nishcataca pactachingapachami.

24Shinallata, caishuj chaishuj ashtahuan juyarinata, imata cashpapash aliguta ruranataca yarichirinami canchi.

25Tandanajunataca napacha saquinachu canchi. Huaquingunaca tandanajunata saquinajunmi. Jesús tigramuna punlla ña chayamujujta yachashpacarin, ashtahuanmi, caishujmanda chaishujmanda aliguta yarichirishpa catina canchi.

Yachashca jahua ama juchata rurachunmi shinllita tacurishca

26Na llullashpa villajuj shimita yachashca jahua, cutin juchata rurajpica, chai juchamanda shuj quishpichijca na ashtahuan tiyanllu.

27Ashtahuangarin paicunaca, Dios ninanda llaquichina punlla chayamujpi, ninanda rupajuj ninapi, Diosta fiñajcunata tucuchinatallami manllaihuan shuyanajun.

28Moisés mandashca shimicunata na cazujcunataca, ishcai cashpa, quimsa cashpapash, “chashnapachami nijpica”, llaquitapash na llaquijpimi huañuita japina.

29Taita Diospaj Churita yangapi churashpacarin, ¿nachu ashtahuan ninandapacha llaquichi tucunata charin? Shinallata, Dioshuan ari nishcata pactachijuj, Diospajlla shicanyachijuj yahuartapash mapa cashcatashna rimashpaca ¿nachu ashtahuan ninandapacha llaquichi tucunata charin?. Ninanda juyashpa Dios carashca Espiritutapash na alicachishpa rimajcunaca, ¿nachu ashtahuan ninandapacha llaquichi tucunata charin?

30Taita Dios cashna nishcataca yachanchimi: “Ñucami, llaquichijcunataca chashnallata llaquichisha. Ñucallatami cuna cashcataca cusha” nijunmi. Shinallata: “Jatun Diosca, Pai agllashca gentecuna na alita rurajpica, Ñucallatami tapuchishpa llaquichisha” nishcami.

31Causajujlla Taita Diospaj maquipi urmanaca, ¡aij jatun manllanayaipachami!

32Punda punllacunapi, cangunapaj shunguta Dios punchayachijpi, ima tucushcatapash yarinami canguichi. Chai punllacunapica, ninan llaquicunata apashpapash, mishajcunami carcanguichi.

33Cangunapuramanda huaquingunaca, ninandapacha na alicachi tucushpami, gentecunapaj ñaupajpipash jatun llaquita aparcanguichi. Shinallata, huaquingunaca, shujcuna llaquichi tucunajujpi cumba tucushpami cushichircanguichi.

34Prezu tiyajcunamandapash, ninandami llaquirircanguichi. Imata charishcacunata quichujpipash cushijushpami saquircanguichi. Chaicunatapash ashtahuan yali, na tucurinallata, jahua pachapi japigrinata yachashpami ninanda cushijurcanguichi.

35Ninan alita japigrina tiyajta yachashpa causanataca, napacha cunganachu canguichi.

36Chaita japigringapaca, na ñapash fiñarishpa, Taita Dios munashcatalla rurashpami, aliguta causana canguichi. Chashna causashpami, Pai carashapachami nishcataca japigringuichi.

37Quilcashcapica cashnami nijun:

“Paica na unaiyashpa, shamunami cani nijujca, ñallapachami shamunga.

38Ashtahuangarin, alitalla rurashpa causajmi, crishcamandalla causanga.

Huashaman tigrashpaca, na Ñucata cushichingachu” nijunmi.

39Ashtahuangarin ñucanchica, na chingaita chingagringapa, huashaman tigrajcunachu canchi. Ashtahuangarin, ñucanchi alma quishpirichun, Diosta aligutapacha crijcunami canchi.