ÉXODO 19 - Quichua Imbabura 2016

Israelcuna, Sinaí shuti chaquishca pambaman chayashcamanda

1Israelcuna, Egipto llactamanda llujshishpaca, quimsa quilla jipami, Sinaí shuti chaquishca pambaman chayanajurca.

2Refidim shuti pambamanda llujshishpaca, Sinaí shuti chaquishca pambamanmi chayagrirca. Chaipimi Israelcunaca, urcuman chayanallapi chai chaquishca pambacunapi carpacunataca shayachishpa tiyanajurca.

3Taita Dioshuan tuparingapa Moisés vichai rijujpimi, Mandaj Diosca chai urcumanda cayashpa cashna nijurca:

“Jacobpaj mirai, Israelcunataca cashna ningui:

4‘Cangunaca, Egipto llactapi causajcunata, Ñuca imatalla rurajtaca ricurcanguichimi. Shinallata, angacunapaj alascunapi apamunshnami cangunataca, Ñucapaj ñaupajman apamurcani.

5Ñuca ima nijujta cazushpa, Ñucahuan ari nishcatapash pactachishpaca, ninanda juyai tucushca, Ñucapajlla cachun shicanyachishca gentecunami canguichi. Tucui cai pachaca Ñucapajmi.

6Cangunaca, Ñuca mandana llactapi causana sacerdotecuna, jucha illaj gentecunami canguichi’. Ñuca imatalla nishca shimicunatami, Israelcunaman villana cangui” nijurcami.

7Shina nijpi Moisés shamushpami, Israelcunata mandaj rucu taitacunata cayarca. Paicunamanmi, Mandaj Dios imatalla mandashcatapash tucuita villajurca.

8Chashna villajpimi Israelcunaca:

“Mandaj Dios mandashcataca tucuitami pactachina canchi” ninajurca.

Israelcuna imatalla nishcataca, Mandaj Diosmanmi Moisesca villajurca.

9Shina villajpimi Mandaj Diosca, Moisestaca cashna nirca:

“Ñucami yana yana fuyupi cambajman shamusha. Canhuan, Ñucahuan rimanajujta Israelcuna uyashpami, can ima nishcatapash tucui causaipi cazunajunga” nircami.

Israelcuna imatalla rimashca shimicunatapash, Mandaj Diosmanmi cutin villajurca.

10Mandaj Diosmi, Moisestaca cashna nirca:

“Israelcunataca, Ñucapajlla shicanyachishca cachun, cunambash, cayapash alichirichun mandangui. Shinallata, paicunapaj churajunatapash tajshachun mandangui.

11Quimsa punllahuanga, tucuita alichirishcalla shuyanajuchun mandangui. Chai punllapimi, Mandaj Dios Ñucaca tucui Israelcuna ricujta, Sinaí urcuman urai shamusha.

12Chaiman ama Israelcuna vichai richunmi, muyundipi jarcata churana cangui. Paicunataca: ‘Cai jarcashcata yalishpaca, napacha vichai rinachu canguichi. Cai jarcashcapipash napacha tacarinachu canguichi. Pipash quimirishpa cai urcuta tacarishpaca, huañungapachami’ ningui.

13Pipash quimirimujtaca, rumihuan cashpapash, flechahuan cashpapashmi huañuchina canga. Shinami, animalcuna cashpapash, gentecuna cashpapash huañunga. Cachuta unaicaman huacachijpillami, chai urcumanga vichai rinajunga” nircami.

14Moisesca urcumanda, Israelcunapajman urai shamushpami, paicunataca Diospajlla cachun shicanyachishpa, paicunapaj churajunatapash tajshachun mandarca.

15Moisesca, Israelcunataca cashnami nirca:

“Quimsa punllapaca alichirishcallami cana canguichi. Huarmihuambash na pacta puñunachu canguichi” nircami.

16Ña quimsa punlla tucujpimi, chai tutamandataca, ninanda rayucuna punchapamba shitamushpa, culun nimurca. Yana yana fuyupashmi, urcuman urai shamurca. Chaipica cachuta ninanda huacachijmi uyarimurca. Shinata uyashpami, carpacunapi tiyanajuj gentecunaca manllarishpa chujchunajurca.

17Shinamandami Moisesca, carpacunamanda Israel gentecunata llujchishpa, urcu chaquipi Taita Dioshuan tuparingapa rirca.

18Tucuilla Sinaí urcumi cushnijurca. Mandaj Dios ninapi chai urcuman uriajumushcamandami chashna cushnijurca. Cushnica, hornomandashnami llujshijurca. Tucuilla urcumi ninanda chujchurca.

19Cachuta huacachijujca, ashtahuan ninandapachami uyarijurca. Moiseshuan, Taita Dios rimanajujpash, rayucuna culun nijujshnami ninandapacha uyarijurca.

20Mandaj Diosca, Sinaí urcu jahua pundamanmi urai shamurca. Chai urcu jahuaman Mandaj Dios, Moisesta cayajpimi, Moisesca chaiman vichai rirca.

21Mandaj Diosca, Moisestaca cashnami nirca:

“Cutin urai tigrashpa cashna nigri: ‘Mandaj Diosta ricungapaca na rinallachu canguichi. Maicamanlla chayanata yalishpa shamushpaca, ashtacacunami huañunguichi nijunmi’ nigri nircami.

22Shinallata, Mandaj Dios Ñucapaj ñaupajman shamuj sacerdotecunapash, Ñucapajlla shicanyachishca cashpallami na huañunga” nircami.

23Shina nijpimi Moisesca, Mandaj Diostaca cashna nirca:

“Israelcunaca, Sinaí urcumanga na vichai rita ushangachu. Canllatami cashna nishpa mandarcangui: ‘Cai urcuca, Ñucapajllami’ nishpami, maicamanlla chayanapi jarcata churachun mandarcangui” nijurcami.

24Shina nijpimi Mandaj Diosca, Moisestaca cashna nirca:

“Urai rishpa, Aarondapash pushashpa vichai shamungui. Ashtahuangarin sacerdotecunahuan, Israelcunahuanga, maicamanlla shamui ushanapillami saquiringa. Paicunaca, Mandaj Dios Ñucapajman chayamuitaca na ushangachu. Paicuna na cazushpaca huañungami” nircami.

25Shina nijpimi Moisesca urai rishpa, Israelcunaman tucuita villajurca.