JUECES 15 - Quichua Imbabura 2016

1Huaquin huatacuna jipami cashna tucurca: Trigota cozechana punllacuna cajpimi, Sansonga, paipaj huarmita ricungapa, shuj maltun chivota apashpa chayagrirca. Paica: “Ñuca huarmita ricungapa, ucuman yaicupasha” nircami.

Ashtahuangarin, paipaj huarmipaj taitaca, ucuman yaicuchunga na saquircachu.

2Chai huarmipaj taitaca, cashnami nirca: “Ña na ricunayachinllu yashpami, cambaj cumbahuanllata cazarachircani. Ashtahuangarin paipaj jipa ñañaca, ¿nachu paitapash yali juyaillagu? Paipaj randica, jipa ñañata japilla” nircami.

3Shina nijpimi Sansonga cashna nirca: “Cunangarin, filisteocunata ashtahuan llaquichishpapash na juchachi tucushachu” nircami.

4Shina nishca jipa, Sansón rishpaca, quimsa patsaj atujcunata japishpami, chupapura huatashpa, chai chupacunapica michungunata huatarca.

5Chai jipaca, michungunapi ninata japichishpami, atujcunataca, filisteocuna tarpushca pambacunapi cacharirca. Chashna cacharijpimi, tandachishpa mundunashca granocunata, shayanajuj chagracunata, uva chagracunata, olivo yuracunatapash tucuillata rupachirca.

6Shina cajpimi filisteocunaca: “¿Pita cashna rurashca?” nishpa tapunajurca. Shina tapunajujpica: “Timnat shuti pueblopi causajuj runapaj masha Sansonmi chashna rurashca. Paipaj huarmita quichushpa, paipaj cumbahuanllata cazarachishcamandami, chashna rurashca” ninajurcami. Chaita villajpi filisteocuna shamushpaca, chai huarmitaca, paipaj taitandimi rupachirca.

7Chaimandami Sansonga: “Canguna chashna rurashcamandaca, cangunatapash chashnallatami rurashpa saquisha” nirca.

8Shinami, Sansonga, ninandapacha macashpa ashtacacunata huañuchirca. Chai jipaca, Etam shuti jaca rumicunapi tiyaj utujuman urai rishpami, chaipi causajurca.

Sansón runaca, Lehi shuti lomapimi filisteocunataca mishashca

9Filisteocunaca, Judá ayllupaj llactaman vichai shamushpami, Lehi shuti lomapi carpacunata shayachishpa tiyanajurca.

10Shina cajpimi Judá ayllu runacunaca, filisteocunataca cashna ninajurca: “¿Imashpata ñucanchihuan macanajungapa shamunguichi?” nijpimi filisteocunaca: “Sansonda japingapami shamunchi. Paitaca, ñucanchita llaquichishcashnami llaquichishun” ninajurcami.

11Shina cajpimi, Judá ayllupuramanda quimsa huaranga runacunaca, Etam shuti jaca rumi utujucunaman rishpa, Sansón runataca: “Filisteocuna ñucanchita mandashpa charinajujtaca, ¿nachu yachangui? ¿Imashpata ñucanchitaca cashna llaquipi churangui?” ninajurca. Shina nijpimi, Sansonga: “Ñucaca, paicuna ñucata imashna rurashcashnami rurarcani” nirca.

12Shina nijpimi paicunaca: “Candaca filisteocunapaj maquipi churangapami shamunchi” ninajurca. Shina nijpimi, Sansonga: “Candaca, napacha huañuchishunllu nihuaichi” nirca.

13Shina nijpimi paicunaca: “Napacha huañuchishunga, candaca, filisteocunapajman pushangapallami shamunchi” nishpa, ishcai mushuj huascacunahuan huatanajurca.

Shina huatashpami, pacajushpa tiyajushca utujumanda llujchishpa pushanajurca.

14Sansonda pushashpa, Lehi shuti lomaman chayajpimi, filisteocunaca caparishpa tuparingapa llujshimunajurca. Ashtahuangarin, Mandaj Diospaj Espíritu Sansonbajman shamujpimi, paipaj maquita huatashca huascacunaca, lino puchata rupachijpishna fitirirca.

15Chaipica, chairalla huañushca burrupaj quijadata tarishpa japishpami, huaranga filisteocunata huañuchirca.

16Chai jipami Sansonga, cashna nirca:

“Shuj burrupaj quijadahuanmi, ashtacacunata huañuchishpa mundunarcani.

Shuj burrupaj quijadahuanmi, huaranga runacunata huañuchircani” nircami.

17Chashna nishpallami, pai charijuj tulluta shitashpa, chai pushtutaca, Ramat-lehi shutita shutichirca.

18Sansonga, ninanda yacunayachishpami, Mandaj Diostaca cashna nishpa mañajurca: “Ñucataca, Canmi quishpichihuarcangui. Shina cashpapash cunanga, ¿Circuncisionda na rurashca cai gentecunapaj maquipichu, yacunayaimanda huañuchun saquigrihuangui?” nircami.

19Chashna mañajpimi Taita Diosca, Lehi shuti lomapi alpata pascashpa, yacuta llujchijpi, Sansonga chai yacuta ufiashpa cutin shinlli tucurca. Chaimandami chai pushtutaca, En-hacore shutita shutichirca. Chaica, cunangamanmi Lehi shuti lomapi tiyajun.

20Shinami, Sansonga, filisteocuna llaquichijui punllacunapica, ishcai chunga huatacunata, Israelcunataca mandajurca.