1Chaquishca tandaguta micujushpapash, aliguta causanami ashtahuan ali.
Ashtaca micuna huasipi tiyajpipash,
fiñanajushpalla causanaca, napacha alichu.
2Huasiyuj runapajta ruraj, ali yuyaita charij runaca,
huasiyuj runapaj na ali churitapash mandangallami.
Chai runaca, huasiyuj runapaj churicunahuanmi ima japina cashcatapash japinga.
3Culquitapash, curitapash, ninapi churashpami ali cajta, na ali cajtapash ricun.
Ashtahuangarin runacunapaj shungutaca, Mandaj Diosmi imashna cajtapash ricun.
4Na ali runaca, na alitalla rimaj runatami alicachishpa uyan.
Llullashpa purij runapash, juchachishpa rimandallami uyan.
5Imagutapash na charij runata asishpa ricuj runaca, paita ruraj Diostami fiñachin.
Shujcuna llaqui japijpi cushijuj runaca, paipash llaquita apangapachami.
6Rucu runagupajca, churicunapaj huahuacunami, juyailla coronagushna ricurin.
Taita mamapajca, churicunami ninan cushijui ricurin.
7Juizu illaj runa, juyailla shimicunata rimashcapash, napacha ali ricurinllu.
¡Mandaj runa, llullashpa rimanacarin, napacha alichu!
8Culquita pacalla cuj runapaca, ninan culquipa randina rumita charishpa pai munashcata pactachini yashpami causan.
Chashna rurashpami, pai imata munashcata pactachin.
9Juchata perdonaj runaca, tucuihuan ali causanatami mascajun.
Ashtahuangarin, pimambash parlashpa purij runaca, paipaj cumbatapash caruyachinmi.
10Ali yuyaita charij runaca, jarcashpa rimashca shimicunataca alimanmi chasquin.
Juizu illaj runata, patsajcaman astishcatapash ashtahuan yali alimi.
11Na cazuj runaca, na alita ruranatallami mascan.
Paitaca, llaquichij runa shamushpa llaquichingapachami.
12Shinlli shungu, juizu illaj runahuan tuparingapa randica,
huahuacunata quichujpi, ninanda fiñarishpa shamujuj huarmi osohuan tuparinarapashmi, ashtahuan ali.
13Alita rurashcamanda, na alita tigrachij runapaj huasimandaca,
ima llaquipash napacha illangachu.
14Fiñanajuita callarichij runaca, jatun yacuta cacharinshnami.
Narapash fiñanajushpa rimari callarijpillatami, anchurina cangui.
15Diosta na manllaj runatara, alipi churaj runatapash,
alitalla ruraj runatara llaquichij runatapash,
Mandaj Diosca ishcanditallatami na ricunayachin.
16Juizu illaj, ali yuyaita na charij runa, culquita charinaca, ¿imapata ali canga?
¿Paica, ali yuyaita randi ushangachu?
17Cumba runaguca, tucui causaipimi juyan.
Llaqui punllacuna japijpipash, paipaj huauquitashnami juyan.
18Ali yuyaita na charij runaca, shujcunapaj randi shayarinllami.
Paipaj cumbapaj randi culquita mañangapa shayarinllami.
19Fiñanajuitalla mascashpa purij runaca, juchata ruranatami alicachin.
Ninanda rimajuj runaca, paillata llaquita apangapami mascajun.
20Jatun na ali shunguta charij runaca, napacha ali causaita taringachu.
Shimi cacharishcata rimaj runapash, jatun llaquipimi urmanga.
21Shinlli shungu churipaj taitaca, paipaj llaquipajmi charin.
Juizu illaj churipaj taitaca, na cushijuita japingachu.
22Shungupi cushijushpa causanaca, ali jambigushnami.
Ashtahuangarin, llaquilla causanaca, tullucunapaj millai ungüishnami.
23Diosta na manllaj runaca, culquita pacalla cujpi japinllami.
Alitalla rurashpa causaj ruranata llaquichingapami, chashna japin.
24Ali yuyaita charij runa, alipacha yachajushca cajtaca, ñavipi ricunallami.
Ashtahuangarin, juizu illaj runaca maitapashmi yarijun.
25Shinlli shungu churica, taitata fiñachinmi.
Mamatapash huacachishpallami causan.
26Alitalla ruraj runatara llaquichinaca, napacha alichu.
Alitalla ruraj, alicachi tucushca runacunata astishpa llaquichinapash, napacha alichu.
27Jarcarishpa rimaj runaca, alipacha yachajushcami.
Ali yuyaita charij runaca, imata rimanatapash jarcarinmi.
28Upalla uyajujpica, shinlli shungu runatapash, alipacha yachajushca runa yashpami ricun.
Ali yuyaita charij runaca, na yangata rimanllu.
Who We AreWhat We EelieveWhat We Do
2025 by iamachristian.org,Inc All rights reserved.
