Psalms 36 - Quichua Imbabura 2016

Taita Diosca ninanda llaquij cashcamandaCandajcunata mandaj candachijuchun, Mandaj Diospajta ruraj David rurashca Salmomi.

1Diosta na manllaj runaca, paipaj shungupica cashnami yajun:

“Diostaca napacha manllanachu cani” yajunmi.

2Chaimandami, ima na alita rurajushpapash, imapash na canllu yajun.

Juchata rurashpapash, ima llaquitapash na japishachu, yajunmi.

3Paipaj shimihuanga, llullashpa, na alita ruranatallami rimajun.

Paica ali yuyaitapash, alita ruranatapash saquishcami.

4Paica, sirijushpapash, na alita ruranatallami yarijun.

Na alitallami rurashpa causan.

Na alita ruranataca napacha saquinllu.

5Mandaj Dioslla,

Cambaj juyaica jahua pachacamanmi.

Can tucuita pactachij cashcapash, jahua fuyucamanmi.

6Alitalla Can rurashcapash, Can Taita Diospaj urcucunashnami.

Can llaquichinacunaca, ucu ucu yacucunashnami.

Mandaj Dioslla,

gentecunatapash, animalcunatapash, Canmi ricushpa charijungui.

7¡Taita Dioslla,

Cambaj ninan juyaica jatumbachami!

Chaimandami, huañuna aichayuj gentecunaca,

Cambaj alas ucupi pacajunajun.

8Cambaj huasipi juyailla micunatami, na munajta micunajunga.

Canga, juyailla ashtaca yacutapashmi ufiachingui.

9Causaita caraj yacutapash, Canmi churarcangui.

Cambaj ñaupajpimi punchalla ricushun.

10Cambaj ninan juyaitaca,

Canda rijsijcunaman ashtahuan mirachipai.

Alitalla rurashpa causajcunapaj shungupipash,

ashtahuan alita rurashpa causachun yaripailla.

11Na ali gentecuna, ñucata llaquichinajuchun, ama saquihuanguichu.

Canda na manllajcunapaj maquihuan ñucata llaquichinajuchunga, ama saquihuanguichu.

12Chaipimi, na alita ruraj runacunaca urmarca.

Paicunaca ñami urmarca. Cutinga na jatari ushangachu.