LEVÍTICO 16 - Quichua Imbabura 2016

Juchamanda animalta Diosman cuna punllamanda

1Mandaj Diospaj ñaupajman quimirishpa, na alita rurashcamanda, Aaronbaj ishcai churicuna huañushca jipami, Mandaj Diosca Moisesman cai shimicunata rimarca.

2Mandaj Diosca, Moisestaca cashnami nijurca:

“Cambaj huauqui Aarón ama huañuchunga: ‘Fachata huarcushca huashaman, Ñucapajlla shicanyachishca ucupi arcata quilpashca ñaupajmanga, na yaicunallachu cangui ninmi’ nishpa villangui. Ñucami arcata quilpashca jahuapi fuyupi ricurisha.

3Aaronga juchamanda cungapami, shuj shicutapash tucuillata rupachingapa, shuj jari llamatapash apashpa Ñucapajlla ucumanga yaicunga.

4Linota rurashca, Ñucapajlla shicanyachishca tunicata churajushpa, linota rurashca ucuman churajuna uchilla calzonda churajushpami yaicunga. Shinallata, lino chumbihuan chumbilirishpa, umapipash linota rurashca mitrata churajushpami yaicunga. Chai churajunaca, Ñucapajlla shicanyachishca cajpimi, yacuhuan aliguta armashca jipa churajunga.

5Aaronga tandanajushca Israelcunapaj juchacunamanda Ñucaman cungangapaca, ishcai chivotami apamunga. Shinallata, Ñucaman cushpa tucuillata rupachingapaca shuj jari llamatami apamunga.

6Shinallata Aaronga, paipaj juchacunata perdonachun, Ñucaman cuna jari shicuta apamuchun cachashpami, Ñucahuan ali tucungapaca, paipaj juchamandapash, paipaj huasi ucupurapaj juchamandapash cunga.

7Chai jipami ishcai jari chivocunataca, Ñucahuan tuparina jatun carpa ñaupajpi, Mandaj Dios Ñuca ñaupajpi ofrendata cunga.

8Chai ishcai chivocunataca, Aaronga, pipaj urmajta ricungapa rurashpami, shujtaca Mandaj Diosman, caishujtaca Azazelman cushpa pambaman cacharingapa agllanga.

9Mandaj Dios Ñucapaj urmashca chivotaca, Aaronmi apamuchun cachashpa juchamanda cuhuanga.

10Ashtahuangarin, Azazelpaj urmashca chivotaca, Mandaj Dios Ñucahuan ali tucungapa, Ñuca ñaupajman causajta apamushca jipami, Azazelman cushpa, jichushca pambapi cacharichun cachanga.

11Aaronga, paipaj juchamanda Ñucaman cuna shicuta apamuchun cachashpami, Ñucahuan ali tucungapaca, paipaj juchamandapash, paipaj huasi ucupurapaj juchamandapash cunga. Shinallata, paipaj juchamanda cushca shicutaca, cungata cuchushpami huañuchinga.

12Chai jipami Aaronga, Mandaj Dios Ñuca ñaupajpi tiyajuj altarpi rupajuj, carbonda churashca inciensota rupachinata japinga. Shinallata, mishquilla ashnajun jacutapash, ishcai maqui jundata japishpami, fachahuan jarcashca huashaman apanga.

13Mishquilla ashnajun chai jacutaca, Mandaj Dios Ñuca ñaupajpi ninapi churashpami rupachijunga. Chai cushnimi, imashna causanata Ñuca mandashca shimicunata alichishca arca tapa jahuapi quilpanga. Shina rurajpimi Aaronga na huañunga.

14Chai jipami Aaronga, shicupaj yahuarta paipaj maqui dedohuan japishpa, indi llujshimujman ricushpa tapa jahuapi tsirapachinga. Chaiman ricushpami tapa jahuapi, paipaj maqui dedohuan chai yahuarta japishpa, canchiscaman tsirapachinga.

15Chai jipami jari chivotaca, Israelcunapaj juchamanda cushpa, cungata cuchushpa huañuchinga. Chai chivopaj yahuartapash, fachahuan jarcashca Ñucapajlla shicanyachishca ucumanmi apamunga. Chai yahuartaca, jari shicupaj yahuarhuan imashna rurashcashnami, tapa jahuapipash, tapa ñaupajpipash tsirapachinga.

16Israelcuna na cazushpa juchata rurashcamanda Dios perdonachunmi, Aaronga, Ñucapajlla ucutapash, Ñucahuan tuparina jatun carpatapash, mapa illajta ruranga. Ñucapajlla carpaca, paicunapaj mapa chaupipi shayajushcamandami, chashna ruranga.

17Juchamanda ofrendata cungapa Ñucapajlla huasiman Aarón yaicumujpica, Ñucahuan tuparina jatun carpapica pipash illanapachami. Paipaj juchamandapash, paipaj huasi ucupurapaj juchamandapash, tandanajushca tucui Israelcunapaj juchamandapash, Ñucaman ofrendata cushpa llujshingacaman, chaipica pipash illanapachami.

18Chai ucumandaca, Mandaj Diospaj ñaupajpi tiyajuj altarman llujshishpami, juchamanda ofrendata cunga. Shicupaj yahuarta, jari chivopaj yahuarta japishpami, chai altarpaj cachucunapi, muyundi javinga.

19Altar jahuapica, chai yahuartami paipaj maqui dedohuan japishpa, canchiscaman tsirapachinga. Shina rurashpami, Israelcuna juchahuan mapayashcacunataca, mapa illajta rurashpa, Ñucapajlla cachun ruranga.

20Ñucapajlla ucutapash, Ñucahuan tuparina jatun carpatapash, altartapash mapa illajta rurashca jipami, shuj jari chivota apamuchun cachanga.

21Aaronga, chai jari chivopaj umapi paipaj ishcandi maquita churashpami, Israelcuna na alita rurashcatapash, paicuna na cazushcatapash, paicunapaj tucui juchacunatapash, tucuita villajunga. Tucui Israelcunapaj juchacunata, chai chivopaj umapi churashpami, jichushca pambapi cacharigrichun, shuj agllashca runata cachanga.

22Chai jari chivomi, Israelcuna na alita rurashcata paipaj jahuapi apashpa, pipash na causanajuj pambaman ringa. Chai jari chivotaca jichushca pambata richunmi saquinga.

23Chai jipami Aaronga, Ñucahuan tuparina jatun carpaman shamushpa, Ñucapajlla ucuman yaicungapa churajushca lino churajunata llujchishpa, chaipi saquinga.

24Chai jipami, Ñucapajlla huasi ucupi armashpa, paipaj churajunatapash churajushca jipaca, canllaman llujshishpa animalta Ñucaman cushpa tucuillata rupachinga. Shinallata, paipaj juchamandapash, Israelcunapaj juchamandapash, animalta Ñucaman cushpami tucuillata rupachinga.

25Shinallata, juchamanda cushpa huañuchishca animalpaj virataca, altarpimi rupachinga.

26Shinallata Azazelman, jari chivota apashpa rij runaca, pai churajushcata tajshashpami, paipash armanga. Chai jipami, carpacunata shayachishca ucuman yaicumunga.

27Juchamanda cushpa huañuchishca shicutapash, jari chivotapash, carpacunamanda canllamanmi llujchinga. Chai animalcunapaj yahuartaca, juchamanda cungapami, Diospajlla ucuman apamushca carca. Caracunatapash, aichatapash, huanutapash ninapimi rupachinajunga.

28Chaicunata rupachij runaca, pai churajushcacunata tajshashpa, paipash armashca jipami, carpacunata shayachishca ucuman yaicui ushanga.

29Cai mandashcataca, tucui causaipi pactachinajuchun, Ñuca mandashca cajpimi, chashna rurashpa pactachinapacha canguichi: Canchis quillapaj, chunga punllapica, imatapash na micushpa llaquirishpa, imatapash na rurashpami samana canguichi. Cai llactapillata huacharishca cashpapash, shuj llactamanda shamushca cashpapash, chashnallatami rurana canguichi.

30Chai punllami, cangunapaj juchacunamanda, animalta Diosman cushpa huañuchina canguichi. Shina rurashpami cangunaca, Mandaj Diospaj ñaupajpica, tucui juchata anchuchi tucunguichi.

31Chai punllami cangunapajca, imatapash na rurashpa samana punlla canga. Shina cajpimi cangunaca, tucui almahuan llaquirina canguichi. Caica tucui causaipi pactachinajuchun Ñuca mandashca shimicunami.

32Taitapaj randi aceiteta talishpa javi tucushpa, shicanyachishca sacerdotemi, juchacunamanda animalta cunga. Paica, chaipajlla shicanyachishca lino churajunatami churajunga.

33Paica, Ñucapajlla shicanyachishca jucha illaj ucutapash, Ñucahuan tuparina jatun carpatapash, altartapashmi ima mapapash illajta ruranga. Shinallata sacerdotecunapaj juchamandapash, tandanajushca tucuilla Israelcunapaj juchamandapashmi, animalcunata cushpa huañuchinga.

34Cai mandashcacunaca, tucui Israelcunapaj juchacunata perdonachun, huata pactajpi, animalcunata Diosman cushpa, tucui causaipi pactachinajuchun mandashca shimicunami” nijurcami.

Moisesca, Mandaj Dios mandashcashnami, tucuita pactachijurca.