JOSUÉ 4 - Quichua Imbabura 2016

Jordán yacumandami, chunga ishcai rumicunata apashca

1Tucuilla Israelcuna Jordán yacuta chimbashca jipaca, Josuetaca cashna nishpami, Mandaj Diosca mandarca:

2“Tucui Israel ayllucunamandaca, chunga ishcai runacunata agllashpa,

3cashna nishpa mandangui: ‘Jordán yacu chaquishca chaupipi sacerdotecuna shayanajuj pushtumanda, chunga ishcai rumicunata apashpa yalinguichi. Chai rumicunataca, tuta maipi samana pushtupi churanguichi’ nishpa mandangui” nircami.

4Shina nijpimi Josueca, Israel ayllupuramandaca, chunga ishcai agllashca runacunata cayarca.

5Josueca, paicunataca cashna nishpami mandarca: “Cangunata Mandaj Taita Diospaj arca ñaupajta yalishpa, Jordán yacu chaupiman richi. Chaimandaca, taita Israelpaj chunga ishcai churicunapaj mirai ayllucuna mashna cashcashnallata, rumicunata shujgu shujgu, rigrapi churashpa apamunguichi.

6Chai rumicunaca, cangunapurapica shuj ricuchinami canga. Jipa punllacunapi cangunapaj miraicuna: ‘Cai rumicunaca, ¿imatata ricuchin?’ nishpa tapunga.

7Shina tapujpica, cashna ninguichi: ‘Mandaj Dioshuan ari ninajushcata alichishca arcata apashpa yalichunmi, Jordán yacuca caiman chaiman shicanyarirca. Chai arcata apashpa Jordán yacuta yalinajujpimi, chai yacuca caiman chaiman shicanyarirca’ ninguichi. Chai rumicunaca, causaita causaicaman chaipi ima tucushcata Israelcuna yarichunmi canga” nircami.

8Josué mandashcashnami, Israelcunaca ruranajurca. Mandaj Dios imashna Josueta mandashcashnami, Israel ayllucunaca mashna cashcashnallata, Jordán yacu chaupimandaca, chunga ishcai rumicunata japinajurca. Chai rumicunataca, paicuna carpacunata shayachina pushtucaman apashpami, chaipi churanajurca.

9Shinallata Josuepash, Jordán yacu chaupipica, chunga ishcai rumicunatami shayachirca. Chai rumicunataca, Dioshuan ari nishcata alichishca arcata apanajun sacerdotecuna shayanajushca pushtupimi shayachirca. Chai rumicunaca, cunangamanmi chaipillata tiyanajun.

10Chai arcata huandushpa rinajuj sacerdotecunaca, Mandaj Dios imashna Josueman mandashcata tucui pactachingacamanmi, Jordán chaupipi shayanajurca. Moisés imashna Josueta mandashcashnami, tucuita ruranajurca. Israel runacunaca, Jordán yacutaca uchashpami chimbanajurca.

11Israelcuna ña chimbajpica, sacerdotecunapash tucuicuna ricujtami, Mandaj Diospaj arcahuan chimbarca.

12Shinallata, Ruben shuti, Gad shuti ayllu runacunapash, Manasespaj chaupi ayllu runacunapashmi, Moisés mandashcashnallata, macanajunacunata apashpa, tucuicunata ñaupashpa chimbanajurca.

13Macanajuiman ña rinalla runacunaca, chuscu chunga huarangashnami carca. Paicunaca macanajunacunata apashpami, Mandaj Diospaj ñaupajpi, Jericó pueblo pambaman chayanajurca.

14Chai punllami Mandaj Diosca, tucui Israelcuna ricujta Josuetaca, ninan jatunbi churarca. Chaita ricushpami Israelcunaca Josuetaca, Moisesta cazushcashnallata tucui causaipi cazunajurca.

15Chai jipami Mandaj Diosca, Josuetaca cashna nishpa mandarca:

16“Ñucahuan ari nishcata alichishca arcata apanajun sacerdotecunataca, Jordán yacumanda llujshichun mandangui” nircami.

17Shina nijpimi Josueca, sacerdotecunataca: “Jordán yacumanda llujshimuichilla” nirca.

18Mandaj Dioshuan ari nishcata alichishca arcata huandushpa apanajun sacerdotecuna, Jordán yacumanda llujshishpa, chaquishca alpapi sarujhuanmi, Jordán yacuca imashna cashcashnallata, ishcandi manñacaman jundashpa rijurca.

19Israelcunaca, callari quillapaj chunga punllapimi, Jordán yacuta chimbashpa, Jericó pueblomanda, indi llujshimujman, Gilgal shuti puebloman chayanapi carpacunata shayachishpa tiyanajurca.

20Shinallata, Gilgal shuti pueblopimi Josueca, Jordán yacumanda apamushca chunga ishcai rumicunataca shayachirca.

21Chaipimi Josueca, Israelcunataca cashna nirca: “Jipa punllacuna cangunapaj miraicuna: ‘Cai rumicunaca, ¿imatata ricuchijun?’ nishpami taitacunata tapunga.

22Shina tapujpica cashna ninguichi: ‘Jordán yacutami, Israelcunaca chaquishca alpata chimbarca.

23Cangunata Mandaj Taita Diosca, canguna chimbangacamanmi Jordán yacutaca, canguna ricujta chaquichirca. Pundapash, cangunata Mandaj Taita Diosca, ñucanchi chimbangacamanmi, Puca Cuchataca chashnallata chaquichirca.

24Cai pachapi causanajuj tucui gentecunaca, Mandaj Diostaca ninan ushaita charijta yachachunmi, chashna rurarca. Shinallata cangunapash, cangunata Mandaj Taita Diosta tucui causaipi cazushpa causachunmi, chashna rurarca’ nishpa villanguichi” nijurcami.