JEREMÍAS 21 - Quichua Imbabura 2016

Jerusalén pueblota tucuchina cashcamanda

1Mandaj Diosca Jeremiasmanmi rimarca. Chaitaca, Judá llactata jatun mandaj Sedequías runaca, Malquías runapaj churi Pasur runatapash, Maasías runapaj churi Sofonías sacerdotetapashmi, Jeremiaspajman cashna nichun cacharca:

2“Babilonia llactata jatun mandaj Nabucodonosor runami, ñucanchihuan macanajungapa shamushca. Shina cashcamanda, Mandaj Diosta ñucanchi ima tucunatapash tapupayari. Diosca, ninan ushaita charishcamanda, jatun manllarinacunata rurangapashchari. Chashna rurajpimi, chai jatun mandaj runaca, ñucanchimandaca anchuringa” ninajurcami.

3Shina ninajujpimi Jeremiasca, paicunataca cashna nirca: “Sedequías runaman, cashna villagrichi:

4Israelcunata Mandaj Taita Diosca, cashnami nin: ‘Babilonia llactata jatun mandajhuan macanajungapa, cangunapaj charijuj macanajunacunaca, cangunatallatami tucuchinga. Jatun pirca huasha muyundipi, cangunata chapashpa tiyanajuj caldeo runacunataca, Ñucallatami cai pueblo chaupiman tandachimusha.

5Ñucaca ninandapacha fiñarishcami cani. Shinamandami, Ñuca ninan ushaihuan cangunataca llaquichigrini.

6Cai pueblopi causajcunataca, ninandami llaquichigrini. Gentecunapash, animalcunapash, ninan ungüihuanmi huañunajunga.

7Chai jipaca, Judá llactata jatun mandaj Sedequías runatapash, paipajta rurajcunatapash, shuj gentecunatapash, jatun ungüihuan, jatun macanajuipi, yarjaihuan huañuchunmi saquisha. Chaimanda puchushcacunatapash, Babilonia llactata jatun mandaj Nabucodonosor runapaj maquipi huañunajuchunmi saquisha. Paicunataca, na llaquishpami tucuillata huañuchishpa tucuchinga’ ninmi Mandaj Diosca nigrichi” nircami.

8Cai pueblopi causaj gentecunataca, cashna ningui: Mandaj Diosca, cashnami nin: “Cangunamanga, causana ñanda, na cashpaca huañuna ñandami churani.

9Cai pueblopi puchushca gentecunaca, macanajuipi cashpa, yarjaihuan cashpa, jatun ungüihuan cashpapash huañungapachami. Ashtahuangarin caimanda llujshishpa, muyundipi chapanajuj caldeo runacunapajman maijambash rishpaca, huañunamanda quishpiringami.

10Mandaj Dios Ñucami, cai pueblotaca napacha llaquishpa tucuchingapami ricujuni. Babilonia llactata jatun mandajpaj maquipi churajpimi, rupachishpa tucuchinga” nichunmi cachamuhuarca.

11Judá llactata jatun mandajpaj huasi ucupuracunatapash, cashna ningui:

Mandaj Dios rimashcata uyaichi:

12Davidpaj huasi ucupurataca, Mandaj Diosca cashnami nin:

“Punllandimi, alitalla rurashpa pactachina canguichi.

Shinallata llaquichi tucun runataca, llaquichij runapaj maquimanda cacharichinami canguichi.

Canguna na alita rurashcamanda, Ñuca ninandapacha ama fiñarichunmi, chashna rurana canguichi.

Chai ninanda fiñarishcataca, pipash na jarcai ushangachu” ninmi.

13Mandaj Diosca, cashnatapashmi nin:

“Pamba chaupipi shayajuj jatun rumishna mandajuj, Jerusalén pueblolla.

Candaca ninandami fiñashca cani.

Cangunaca cashnami ninajunguichi:

‘¿Pita ñucanchihuan macanajungapa, vichai shamui ushanga?

Ñucanchi causanajuj pushtumanga, ¿pita yaicui ushanga?’ ninajunguichimi.

14Ñucami, cangunata llaquichigrini.

Canguna na alita rurashpa causashcamandami, chashna ruragrini.

Ñucami, pambapi shayanajuj quirucunataca, rupachishpa tucuchisha.

Chai ninami, chai muyundipi tucui tiyajcunatapashmi tucuchinga” ninmi Mandaj Diosca.