1Taita Diostaca, caparishpami mañarcani.
Taita Diostaca caparishpa mañajpimi, Paica uyahuanga.
2Ninan llaquihuan cashpami, Jatun Diostaca mascarcani.
Tutapash maquita vichai churashpami, na samashpa, Paitaca mañajurcani.
Imashna cushijuitapash na usharcanichu.
3Taita Diosta yarishpami, ninanda huacarcani.
Llaquihuan na ushajushpami, huañungashna tucurcani. Selah
4Taita Dioslla,
puñuitapash na usharcanichu.
Llaquihuan shaijushca cashpami, rimaitapash na usharcani.
5Ñuca huacharishca punllamandapachami yarijurcani.
Yalishca huatacunatami yarijurcani.
6Tutacuna imatalla candashcatami yarijurcani.
Ñuca shungupimi chashna yarijurcani.
Aliguta yarishpami cashna tapurijurca:
7“¿Jatun Diosca, causaita causaicamanllu jichuhuanga?
¿Cutinga na yaringapachu saquihuanga?
8Paipaj ninan juyaica, ¿causaita causaicamanllu tucurishca canga?
Pai pactachisha nishcapash ¿na pactashpachu saquiringa?
9Diosca, ¿juyanataca cungangachu?
¿Paica ninanda fiñashpachu, cutinga ama llaquingapa saquishca canga?” yashpami tapurijurcani. Selah
10Cashnatapashmi yarijurcani: “Ninan llaquimari japimuhuashca.
Jahua pachapi causajuj Jatun Diosmari, Paipaj ninan ushaitaca anchuchihuashca” yajurcanimi.
11Mandaj Dios tucuita rurashcatami yarijusha.
Ñaupa huatacunapi ima alita rurashcatapashmi tucuita yarijusha.
12Jatun Dioslla,
Can tucuita rurashcatami yarijusha.
Chaitaca tucuicunamanmi villajusha.
13Jatun Dioslla,
Canllami jucha illaj capangui.
Ñucanchi Taita Dioshuan chimbapurangapaca, ¿rurashcalla maijan diospash tiyangachu?
14Jatun Dioslla,
Canmi tucuita juyailla rurashcangui.
Tucuicunamanmi, Cambaj ninan ushaitaca ricuchircangui.
15Cambaj ushaihuanmi, Cambaj agllashca gentecunataca quishpichircangui.
Jacobpaj, Josepaj miraicunatapashmi quishpichircangui. Selah
16Jatun Dioslla,
yacucunapashmi Candaca ricurca.
Yacucunapash, Canda ricushpami manllarirca.
Ninan ucu ucu cucha yacucunapash, Canda ricushpami manllarirca.
17Fuyumandami ninanda tamiamurca.
Jahua pachapimi ninanda culun nishpa,
rayucunapash punchapamba ricurirca.
18Canga acapana huairapimi, culunlla uyarimurcangui.
Cambaj rayucunahuanmi, cai pachatapash tucuilla punchayachircangui.
Alpa mamapash, ninandami cuyujurca.
19Mama cuchatami, ñanda rurarcangui.
Yacu chaupitami, Cambaj purina ñanda rurarcangui.
Cambaj chaqui sarushcataca, pipash na yacharcachu.
20Cambaj agllashcacunataca, llamata michijshnami,
Moiseshuan, Aaronhuan pushamurcangui.
Who We AreWhat We EelieveWhat We Do
2025 by iamachristian.org,Inc All rights reserved.
