PROVERBIOS 28 - Quichua Imbabura 2016

Alihuan, na alihuan chimbapurashpa yarichij shimicunami

1Diosta na manllaj runaca,

pipash na catijujpitami pacajungapa calpajun.

Ashtahuangarin imatapash alitalla ruraj runaca,

leonshna imatapash na manllanllu.

2Llactapi causajcuna na cazushcamandami,

shujcuna shujcuna mandangapa shayarinajun.

Ashtahuangarin, ali yuyaita charij, alipacha yachajushca runaca, ali mandajunllami.

3Huajchacunata llaquichishpa causajcunaca,

shinllita tamiashpa, tarpushcacunata apashpa tucuchinshnami.

4Mandashcata na cazujcunaca,

Diosta na manllajcunatarami alicachinajun.

Ashtahuangarin, mandashcata pactachijcunaca,

paicunahuanga fiñanajushpami causan.

5Na ali runacunaca, Dios llaquichinataca na yachanllu.

Ashtahuangarin, Mandaj Diosta mascajcunaca, tucuitami yachan.

6Huajcha cashpapash, aliguta causanami ashtahuan ali.

Ashtahuangarin, tucuita charishpapash na ali causanaca, llaquipachami.

7Mandashcata pactachij churica, aligutapacha yarishpa purijmi.

Ashtahuangarin, micushpalla causaj runacunahuan tandanajuj churica, taitatami pingaichin.

8Culquita mañachishpa, mama culquimanda ashtahuan yalishpa japij runaca,

huajchacunata juyaj runamanmi tucuita saquinga.

9Mandashcata uyangapa na munaj runataca,

pai mañashcatapash Diosca na uyangachu.

10Alitalla rurajcunata pandachishpa na ali ñambi churaj runaca,

paillatami llaquipi urmanga.

Ashtahuangarin, ima pandatapash na rurajcunaca, alitallami japinga.

11Charij runaca, paipaj yuyaipica, ali yachajushcami cani yajunmi.

Ashtahuangarin, huajcha runaca, ali yachajushca cashpami, tucuita ali ricujun.

12Alitalla rurajcuna mishajpica, jatun cushijuimi tiyan.

Ashtahuangarin, Diosta na manllajcuna jatarijpica,

tucuicunami pacajungapa calpanga.

13Paipaj juchata pacaj runaca, napacha ali causangachu.

Ashtahuangarin, juchata villashpa anchurin runaca quishpiringami.

14Tucui causaipi Taita Diosta cazushpa causaj runaca, ninandami cushijunga.

Ashtahuangarin, na cazushpa causaj runaca, ninan llaquipimi causanga.

15Huacajuj leonshna, ninanda yarjachijuj ososhnami,

Diosta na cazuj mandajca, llactata llaquichijun.

16Na ali yuyaita charij mandajcunaca,

ashtahuanmi llactataca llaquichishpa shuhuashpa catin.

Ashtahuangarin, na shuhuashpa mandajca, unaitami mandajunga.

17Pitapash huañuchij runaca,

pai huañuna punllacaman, pipash na yanapajpillatami huañunga.

18Alitalla ruraj runaca, ima llaquimandapash quishpiringami.

Ashtahuangarin, jatun na alita rurashpa causaj runaca, ima llaquipipash urmangallami.

19Alpapi tarpushpa causaj runaca, na munangacamanmi micunga.

Ashtahuangarin, imata rurangapapash na munaj runacunahuan tandanajuj runaca, imapash illajmi causanga.

20Aliguta yarishpa causaj runaca, ninandami bendiciai tucunga.

Ashtahuangarin, ucha charijyangapa munaj runaca, llaquichi tucungami.

21Pita cashpapash, ñavita ricushpalla chasquinaca napacha alichu.

Runaca, asha micunamandapash juchapi urmanllami.

22Mitsa runaca, charijyana munaihuanllami causan.

Paica, llaquicuna shamunataca na yachanllu.

23Pandata rurajujpi jarcashpa rimaj runaca,

yangata alicachishpa parlaj runataca yalimi, ninanda alicachi tucunga.

24Taita mama imata charishcata shuhuashpapash:

“Ima na alipash na canllu” nij churica,

na alita ruraj runapaj cumbami.

25Ninanda jariyashpa purij runaca, fiñanajuitallami jatarichin.

Ashtahuangarin, Mandaj Diosta yariashpa causaj runaca, tucuipimi ali llujshinga.

26Paipaj yuyaipilla jariyashpa purij runaca, juizu illaj runami.

Ashtahuangarin, ali yachajushca runaca,

ima llaquimandapash quishpiringami.

27Huajchacunata llaquij runaca, ashtahuanmi charinga.

Ashtahuangarin, huajchacunata na llaquijcunaca, ninandami llaquichi tucunga.

28Diosta na cazujcuna mandangapa shayarijpica, gentecunaca pacajunmi.

Ashtahuangarin, paicuna huañushpa tucurijpica, alitalla rurajcunami miran.