ECLESIASTÉS 2 - Quichua Imbabura 2016

1Ñuca shungupica: “Cunanga, ima charishcahuambash ninanda cushijushpami causasha” yajurcanimi. Ashtahuangarin chaipash yangatallami carca.

2Chaimandami, juizu illajshna asijurcani. Chashna cushijunaca, imapapash na ali cajtami yacharcani.

3Shinallata, vinota ufiashpa cushijungapami munajurcani. Shina rurashpami, juizu illajcunashna ñuca yachashcahuanlla jarcarishpa purisha yajurcani. Cai pachapi huañuna aichayuj runacuna, paicuna rurashcahuanga ima alita tarijta yachangapami munarcani.

4Ashtahuanmi imatapash rurachijurcani. Ñuca huasicunatapash rurachishpami, uva chagracunatapash tarpuchircani.

5Huertacunatapash, jardingunatapashmi rurachircani. Chaicunapica, tucui granocunata fucuj yuracunatami tarpurcani.

6Quirucuna viñanajuj pambapi yacuta jichangapami, yacuta alichingapa jatun utujucunata rurachircani.

7Jaricunatapash, huarmicunatapash ñucapaj gañanguna cachunmi randircani. Ñuca huasipi huacharishca gañangunatapashmi charircani. Shinallata huagracunatapash, llamacunatapash, Jerusalenbi ñuca ñaupaj causajcunata yalitami charircani.

8Shuj llactacunapi, marcacunapi mandajcunami, culquitapash, curitapash ñucaman ashtacata apamunajurca. Candaj jaricunatapash, huarmicunatapashmi charircani. Taquinacunatapash, shuj shujtami charircani. Shinami, huañuna aichayuj runacuna cushijujshnallata, ninandapacha cushijurcani.

9Jerusalenbi punda causajcunataca, tucuita yali alicachi tucushcapash, ashtahuan charijpashmi tucurcani. Ñuca tucui yachajushcataca, na cungashpami causajurcani.

10Imata ricushpa munashpapash, na jarcarircanichu. Ñuca munashcataca tucuitami pactachircani. Ñucaca, tucui ñuca munashcata rurashpami cushijurcani. Ñuca imatalla rurashcamandaca, chaitami japircani.

11Chai jipami ñuca rurashcacunataca, tucuita ricujurcani. Shinallata, chaicunata imashnalla rurashcatami ricujurcani. Tucui chaicunapash yangallata, yuyaita shaijuchingapallami carca. Indi punllayachijuj cai pachapica, imapapash na alichu carca.

12Chai jipaca, ali yachaj canapash, juizu illaj canapash, na cazuj canapash, imapa ali cajta yachangapami munarcani. “Jatun mandajpaj jipa, shuj jatun mandajca, ¿imatashi mushujta rurai ushanga? Ña rurashca tiyajundallatami ruranga” yajurcanimi.

13Imashnami michaca yana tutata punchayachin, chashnallatami juizu illaj canatapash, alipacha yachajushca canataca yali cajta ricurcani.

14“Alipacha yachajushca runaca, aliguta ricushpami purin, juizu illaj runaca, yana tutapishnami purin”. Chashna cajpimi, tucuicunallata chashna tucunata ricurcani.

15Chaimandami cashna yarircani: “Juizu illaj runa ima tucujpipash, ñucapash chashnallatami casha yarcanimi. Shina cashpaca, ¿imapata alipacha yachajushca canaca, ali canga? Chaicunapash yangallatami ricurirca.

16Alipacha yachajushca runatapash, juizu illaj runatapash, huañushca jipaca pipash na yaringachu. Shamui punllacunapica, tucuitami ña cunganga. Alipacha yachajushca runapash, juizu illaj runapash huañungallatami” yajurcanimi.

17Cai pachapi tucui imatalla rurashcapash yangallata cajpimi fiñarircani. Tucuita ali yarijpica yangallata, yuyaita shaijuchingapalla cajtami yacharcani.

18Shinallata, cai pachapi ñuca tucui imatalla rurashcacunataca ricushpami fiñarircani. Chaicunataca, ñucapaj jipa mandajcunami japinajunga.

19Shinallata, ñuca charishcacunata japijcunaca, ali yachajushca canata, juizu illajcuna canatapash, ¿pita yachai ushanga? Chaicunataca, ali yuyaihuanmi cai pachapica tucuita rurajurcani. Tucui chaicunapash yangallatami.

20Cai pachapi, ñuca imata rurashcata ricushpami ninandapacha llaquirircani. Ñucapaj tucui yachaihuan cai pachapi rurashcata ricushpami llaquirircani.

21Alipacha yachajushcahuan, tucuita ñuca ali rurashcataca, imatapash na ruraj runachari japij shamunga. Chaicunapash yangallatami, ninan na alipachami.

22Shina cashpaca, cai pachapi runacuna, na samashpa tucuita rurashcacunaca, ¿imapata ali cashcayari?

23Paicunapaj causaipica, punllandimi llaquicunatapash, nanaicunatapash apanajun. Paicunaca, tutapash na samai ushanllu. Chaicunapash yangallatami.

24Runaca, micushpa, ufiashpa, pai imata rurashcahuan, cushijushpami causana. Shina cushijunatapash, Taita Diosllata caramushcatami yachani.

25Shina cashpaca, ¿pita ñucata yali alicunata micunyari? ¿Pita ñucata yali ali causanyari?

26Taita Diosca, paipaj ñaupajpi aliguta causaj runamanllami ali yuyaita, ali yachajunata, cushijuitapash caramujun. Ashtahuangarin, juchata ruraj runataca, ashtahuan charichunmi saquin. Chaicunataca, Taita Diosta cazuj runaman cungapami, chashna mirachinga. Chaicunapash yangallatami, yuyaita shaijuchingapallami.