1Ocozías shuti runapaj mama Atalía shuti huarmica, paipaj churi huañushcata ricushpami, jatun mandajpaj miraicunataca, tucuillata catishpa huañuchirca.
2Shina cajpipash, jatun mandaj Joram shuti runapaj ushi Josaba shuti huarmimi, Ocozías runapaj churi Joás shuti runataca, pacalla llujchirca. Josaba shuti huarmica, Ocozías runapaj panimi carca. Chashna llujchishpami, Atalía huarmi ama ricuchunga, huahuataca viñachij mamandi, puñuj ucupi pacarca. Shina pacajpimi, paitaca na huañuchirca.
3Chai huahuaca, paita viñachij mamandimi, Mandaj Diospaj huasipi sucta huatatami pacajuchun saquirca. Chai llactataca, Atalía huarmimi mandajurca.
4Ashtahuangarin ña canchis huata tucujpimi Joiada shuti runaca, patsaj macanajuj runacunata mandajta, mandana huasipi ricuj runacunata tandachirca. Shina tandachishpami paicunataca, Mandaj Diospaj huasi ucupi, paicunataca, shujlla yuyai tucungapa juramentuchirca. Chai jipami, jatun mandaj Ocozías runapaj churi Joasta ricuchirca.
5Chaipimi paicunataca, cashna nirca: “Cangunaca, caitami rurana canguichi: Cangunapuramanda quimsapi shicanyachishca runacunaca, jatun mandaj mandashpa tiyajuna huasitami, samana punllapi ricuj shamunga.
6Quimsapi shicanyachishca caishuj runacunaca, Shur shuti pungupimi ricunajunga. Quimsapi shicanyachishca chaishuj runacunaca, ricuj runacunapaj huasi huashaman tiyajuj uchilla pungupimi ricunajunga. Chashnami, chai huasiman pipash ama yaicuchun, ricuna canguichi.
7Ashtahuangarin, ishcaipi shicanyachishca cangunapuramanda, samana punllapi llujshijcunaca, Mandaj Diospaj huasipimi, jatun mandajta ricuna canguichi.
8Jatun mandajtaca, cangunapaj maquipi macanajunacunata chaririyajmi, tucui muyundipi shayarishpa ricuna canguichi. Maijan cashpapash canguna shayanajuj pushtuman yaicujpica, huañuchinguichilla. Jatun mandaj maiman llujshijpipash, tigramujpipash, paihuan pajtami purina canguichi” nijurcami.
9Patsaj macanajuj runacunata mandajcunaca, sacerdote Joiada mandashcashnami, tucuita ruranajurca. Paicunaca, samana punllapi ricungapa yaicunajuj, samana punllapillata ricushpa llujshinajuj, paicuna mandanajushca macanajuj runacunata tucuicuna tandachishpami, sacerdote Joiadapajman shamunajurca.
10Chaipica, sacerdote Joiadami, jatun mandaj David charishca tucsina jirrucunata, macanajuipi jarcarinacunataca, patsaj macanajuj runacunata mandajcunaman curca. Chaicunaca, Mandaj Diospaj huasipimi alichishca tiyanajushca carca.
11Chai jipami, ricushpa shayanajuj runacunaca, macanajunacunata paicunapaj maquipi chaririyaj shayarinajurca. Paicunaca, Diospaj huasi ali maquimandashna callarishpa, lluquimanmi shayarinajurca. Altarpash, Diospaj huasipash shayanajuj chaupipimi, jatun mandajta muyundi ricushpa shayarinajurca.
12Chai jipaca, sacerdote Joiadami, jatun mandaj Ocozías runapaj churita llujchimushpa coronata churachirca. Shinallata, mandashca shimicunatapash cushpami, aceiteta talishpa javishpa, jatun mandaj cachun churanajurca. Shina churajpimi: “¡Jatun mandajlla, causajupailla!” nishpa, maquita huactanajurca.
13Gentecuna ninanda caparinajujta uyashpami, Atalía huarmica, Mandaj Diospaj huasipi shayanajuj gentecunapajman yaicurca.
14Chaiman yaicushpami jatun mandajtaca, imashna shayarina cashcashnallata, pilarpi quimiriaj shayajujta ricurca. Shinallata mandajcunapash, taquijcunapash, jatun mandajhuan pacta shayanajujtami ricurca. Chai llactapi causaj tucui gentecunapash, trompetata huacachishpa ninanda cushijunajujta ricushpami Atalía huarmica, pai churajushcata liquishpa:
“¡Umachihuashcamari, umachihuashcamari!” nishpa, cunga pactarishcata caparirca.
15Ashtahuangarin, sacerdote Joiadami, patsaj macanajuj runacunata mandajcunata cashna nirca:
“Chai huarmitaca, Diospaj huasi ñaupajmanda canllaman llujchishpa apaichi. Pipash, paita catijpica espadahuan huañuchinguichilla” nircami.
(Sacerdotellatami, Mandaj Diospaj huasipica, na huañuchinachu canguichi nishpa mandashca carca).
16Chaimandami Atalía huarmitaca, chaimanda llujchishpa, caballocunahuan mandana huasiman yaicuna ñambi huañuchirca.
17Chai jipaca sacerdote Joiadami, jatun mandajtapash, gentecunatapash, Mandaj Dioshuan imatalla rurashpa pactachinajuchun, Mandaj Diospajlla causanajuchun ari nichirca. Shinallata jatun mandajtaca, gentecunahuan imatalla rurashpa pactachishca cachumbashmi ari nichirca.
18Chai jipami, chai llactapi causaj tucui gentecunaca, Baal shuti diospaj huasiman yaicushpa, tucuillata urmachinajurca. Shinallata, chai ucupi tiyaj altarcunata, imamambash rijchaj dioscunatapashmi tucuillata faquirca. Baal shuti diospajta ruraj sacerdote Matán runatapash, chai altar ñaupajpillatami huañuchirca. Chashna rurashca jipaca, sacerdote Joiadami, Mandaj Diospaj huasita ricuj runacunata churarca.
19Chai jipaca, patsaj macanajuj runacunata mandajcunatapash, chaishuj mandaj runacunatapash, mandana huasipi ricuj runacunatapash, chai llactapi tucui causajcunatapashmi pusharca. Paicunami jatun mandajtaca, mandana huasita ricuj runacuna yaicuna ñanda, Mandaj Diospaj huasimanda apashpa shamunajurca. Chashna apamujpimi jatun mandajca, jatun mandajcuna tiyarinapi tiyarirca.
20Chaimandami, chai llactapi tucui causajcunaca ninanda cushijunajurca. Atalía huarmica, mandana huasiman chayanapi espadahuan huañuchi tucushca cajpimi, Jerusalén pueblopi causajcunaca, macanajui illajpi ali causanajurca.
21Joás shuti runaca, canchis huatata charishpami, mandai callarirca.
Who We AreWhat We EelieveWhat We Do
2025 by iamachristian.org,Inc All rights reserved.
