MARCOS 1 - Quichua Imbabura 2016

Bautizaj Juanmi villajushca(Mat. 3:1-12; Luc. 3:1-9,15-17; Juan 1:19-28)

1Diospaj Churi Jesucristomanda ali villanataca cashnami callarishca.

2Profeta Isaías quilcashcapica cashnami nijun:

“Ñucamanda villajtami canda ñaupashpa richun cachani.

Paimi, cambaj punda rishpa, can purina ñandaca alichijunga.

3Jichushca pambapi caparijuj runaca:

‘Jatun Diosman ñanda alichipaichi.

Pai rina ñambica, ima jarcapash ama tiyachun alichipaichiyari’ nijunmi” nijurcami.

4Juanga, jichushca pambapimi, bautizajurca. Paica: “Juchayu cashcamanda llaquirishpa Diospajman tigrarishpa, bautizarichi. Shina rurajpimi Diosca, cangunapaj juchacunata perdonanga” nishpami villajurca.

5Shina villajujpimi, Judea llactapi causajcunapash, Jerusalenbi causajcunapash, Juanbajman shamunajurca. Paicunataca, paicunapaj juchacunata villajpimi Juanga, Jordán jatun rijuj yacupi bautizajurca.

6Juanga, camello milmata rurashpa churajushca, cara chumbita chumbilirishcami carca. Shinallata, langosta jurucunata, sacha balun mishquitami micuj carca.

7Paica, cashna nishpami villajurca: “Ñucapaj jipa shamujmi, ñucata yali ninan ushaita charin. Shina cajpimi ñucaca urai cumurishpa, Paipaj chaquipi churajushpa huatarishcata pascachitallapash na ushana cani.

8Ñucaca, yacuhuanllami cangunataca bautizashcani. Ashtahuangarin Paica, jucha illaj Espirituhuanmi cangunataca bautizanga” nircami.

Jesusta bautizashcamanda(Mat. 3:13-17; Luc. 3:21-22)

9Chai punllacunapimi Jesusca, Galilea llactapi tiyajuj Nazaret pueblomanda shamurca. Chaipimi Juanga Jordán jatun yacupi bautizarca.

10Yacumanda Jesús llujshijushpaca, jahua pacha pascarijtami ricurca. Shinallata, Diospaj Espiritutapash, palomagushna Paipaj uma jahuaman urai shamujtami ricurca.

11Jahua pachamandapash: “Canga, Ñuca juyashca Churigumi cangui. Canmandami ninanda cushijuni” nijujmi uyarimurca.

Jesustami, diabloca pandachingapa munashca(Mat. 4:1-11; Luc. 4:1-13)

12Chai jipaca, Diospaj Espiritumi jichushca pambaman pusharca.

13Chai jichushca pambapi, chuscu chunga punllacaman, millai animalcunapaj chaupipi causajujpimi, Satanasca, Jesusman na ali yuyaita cushpa, pandachingapa munarca. Shina cajpimi Jesustaca, angelcuna ricurianajurca.

Jesusca, Diospajta rurai callarishcamanda(Mat. 4:12-17; Luc. 4:14-15)

14Juanda prezu churashca jipami, jahua pachamanda Dios mandana chayamushca ali villanata villashpandi Jesusca Galilea llactaman shamujurca.

15Paica cashnami nijurca: “Chai punllacunaca ñami pactamushca. Taita Dios mandajpi causanami pactamushca. Juchayu cashcamanda ninanda llaquirishpami, quishpirinamanda cai ali villanataca crina canguichi” nijurcami.

Jesusca, pijita japinajuj chuscu runacunatami cayashca(Mat. 4:18-22; Luc. 5:1-11)

16Jesusca, Galilea cucha manñata yalijushpami, Simondaca, paipaj huauqui Andreshuan pijita linllihuan japinajujta ricurca.

17Paicunatami Jesusca cashna nirca:

“Ñucata catihuaichi. Pijita japijshna gentecunata tandachimuchunmi, cangunataca yachachisha” nircami.

18Shina nijpimi, linllicunata saquishpa, Jesusta catishpa rinajurca.

19Jesusca, chaimanda ashaguta rishpallami Zebedeopaj churi Jacobotaca, paipaj huauqui Juanhuan barcopi linllicunata huatanajujta ricurca.

20Jesús cayajpimi, paicunapaj taita Zebedeotaca, pijita japishpa yanapajcunahuan barcopi saquishpa, catishpa rinajurca.

Mapa aya jundashca runamandami villajun(Luc. 4:31-37)

21Jesusca, Capernaúm puebloman chayashpami samana punllapica, sinagogaman yaicushpa yachachijurca.

22Jesusca, imatalla pactachishpa causanata alipacha yachachijujpimi manllarishpa uyanajurca. Paica mandana ushaita charishpami, mandashca Shimita yachachijcunashnaca na yachachijurca.

23Ashtahuangarin chai sinagogapica, mapata rurachij aya jundashca shuj runami tiyajurca. Paimi ninanda caparishpa,

24cashna nijurca:

“¡Aij! Nazaret pueblomanda Jesús, Canga ñucanchihuanga ¿imatata ricunata charinguiyari? ¿Ñucanchita tucuchingapachu shamurcangui? Candaca, Pi cajta rijsinimi. Canga, Taita Dios cachamushca Jucha Illajmari cangui” nijurcami.

25Shina nijpimi Jesusca chai ayataca:

“¡Upallai, cai runamanda llujshi!” nishpa, shinllita rimarca.

26Shina nijpimi chai mapa ayaca, ninanda chujchuchishpa, shinllita caparichishpa, chai runamandaca llujshirca.

27Shinamandami, tucuicuna ninanda manllarishpa, paipura cashna nirinajurca:

“¿Caica imatayari? ¿Cai mushuj Paipaj yachachinaca imatayari?. Mapa ayacunatapash ninan ushaihuan rimajpica, ¿cazunllachu imatayari?” ninajurca.

28Jesús chashna rurashcataca, tucui Galilea llacta muyundipimi ñapash yachanajurca.

Pedropaj suegratami, Jesusca alichishca(Mat. 8:14-15; Luc. 4:38-39)

29Sinagogamanda llujshishpaca Jacobotapash, Juandapash pushashpami Jesusca, Simonbash, Andrespash causaj huasiman shamurca.

30Chaipica, Simonbaj suegra, tabardillo ungüihuan sirijujtami, Jesús chayamunhuan villanajurca.

31Shina villajpi Jesús chayashpa, maquimanda aisashpa jatarichijpimi, tabardillo ungüica ñapash yalirca. Ali tucushpaca, paicunaman micunata cararcallami.

Indi ña huashajujujpimi, ashtaca huañunajujcunata alichishca(Mat. 8:16-17; Luc. 4:40-41)

32Indi huashajushpa ña tutayajpimi, huañunajuj gentecunata, aya jundashca gentecunatapash, Jesuspajman apamunajurca.

33Chai pueblopi causajcunaca, tucuicunami pungupi jundamurca.

34Chaipimi, shuj shuj ungüicunahuan huañunajujcunata Jesusca alichijurca. Shinallata, ashtaca ayacunatapashmi llujchijurca. Jesusta rijsijpimi, ayacuna rimachunga na saquirca.

Galilea llactapimi, Jesusca villashpa purijushca(Luc. 4:42-44)

35Jesusca, nara ali punllayajpillata tutamandata jatarishpami, jichushca pambaman llujshishpa rirca. Chaipimi Diosta mañajurca.

36Ashtahuangarin Simonga, paipaj cumbacunandimi Jesusta mascajurca.

37Paita tuparishpaca:

“Tucuicunami Candaca mascanajun” ninajurca.

38Shina villajpimi Jesusca, paicunataca:

“Caishuj pueblocunaman jacuchi, chaicunapipash villanami cani. Chaipajmi shamurcani” nirca.

39Tucui Galilea llactapi purijushpami, sinagogacunapi Jesusca villajurca. Shinallata, ayacunatapashmi llujchishpa cachajurca.

Lepra ungüihuan runatami, Jesusca alichishca(Mat. 8:1-4; Luc. 5:12-16)

40Lepra ungüihuan shuj runa, Jesuspajman shamushpa cungurishpami:

“¿Nacha ñucata alichihuanguiman?” nishpa ninanda mañajurca.

41Shina nijujpimi, Jesusca chai runata ninanda llaquishpa, maquita chutashpa tacarishpaca:

“Alichingapa munanimi, ali tucuilla” nirca.

42Shina nijhuan, lepra ungüi anchurijpimi, chai runaca mapa illaj saquirirca.

43Chai runataca Jesús cayacaman nishpaca, shinllitapachami cashna nijurca:

44“Ricui, pimambash imatallapash ama villanguichu. Ashtahuangarin sacerdotepajman rishpa can ali tucushcata ricuchigri. Shinallata, Moisés mandashcashna, tucuicuna yachachun ofrendacunata apashpa ringui” nijurcami.

45Ashtahuangarin chai runa rishca jipaca, paita imashna alichishcataca, tucuicunamanmi ninanda villai callarirca. Shinamandami Jesusca, tucuicuna ricujta puebloman yaicuitaca na ushashpa, jichushca pambacunapilla purijurca. Ashtahuangarin tucui llactacunamandami, Jesuspajman shamunajurca.