Psalms 37 - Quichua Imbabura 2016

Na ali gentecunapaj causaimandaDavid quilcashca Salmomi.

1Na ali gentecunapaj causaita ricushpaca, ama llaquirichu.

Paicuna na alita ruranajujtaca, na munashpa ricujunachu cangui.

2Paicunaca, jihuashnallami ñapash cuchui tucunga.

Jihuashnami chaquinajunga.

3Mandaj Diostalla shuyashpami, alita rurana cangui.

Cambaj llactapi causajushpaca, alita rurashpami causana cangui.

4Mandaj Dioshuanmi cushijuna cangui.

Paimi, can imata mañashcatapash caranga.

5Cambaj causaitaca, Mandaj Diospaj maquipimi churana cangui.

Paitallami yarishpa causana cangui.

Paimi, imata cashpapash caranga.

6Can imata rurashcatapash, michapishnami ricuchinga.

Can imata japinatapash, chaupi punllapishnami cunga.

7Mandaj Diospaj ñaupajpica, upalla saquirishpa, Paitalla shuyangui.

Na ali gentecuna ali causajta ricushpaca ama fiñaringuichu.

Na alita ruraj runatapash ama fiñanguichu.

8Ninanda fiñarishpa causanataca, saquinami cangui.

Na alita ruranataca, amapacha munashpa ricunguichu.

9Na ali gentecunataca tucuchingami.

Mandaj Diosta cazujcunaca, paicunaman carashca alpatami japinga.

10Na alita ruraj runaca, asha punllatallami causanga.

Pai tiyajushca pushtuta can ricungapa rijpica illangami.

11Na fiñarishpa causajcunami, alpataca paicunapaj cachun japinga.

Ima llaquipash illaj causashpami cushijunga.

12Diosta na manllaj runaca,

alita ruraj runatami, llaquichingapa mascajun.

Quirutapash canirishpami fiñarijun.

13Jatun Diosca, chai na ali runata llaquichina punlla chayamujujpica asingami.

14Na ali runacunaca, huajchacunata, llaquilla causajcunata,

huañuchingapami, espadahuan, arcohuan shuyanajun.

Imatapash aligutalla rurajcunata huañuchingapami, chashna chapanajun.

15Espadaca, paipaj shungupillatami yaicunga.

Paipaj arcopash, chaipillatami faquiringa.

16Alitalla rurajcuna, ashatalla charishcapash alipachami.

Juchayu gentecuna ninanda charijyashcacunaca, napacha alichu.

17Diosta na manllajcunapaj ushaica tucuringami.

Ashtahuangarin Mandaj Diosmi, alita ruraj runacunataca shinllichinga.

18Alita ruraj runacunataca, punllandimi Mandaj Diosca ricujun.

Paicunamanmi, causaita causanata caranga.

19Na ali punllacunapipash, paicuna pingai tucuchunga na saquingachu.

Yarjai punllacunapipash, na munajtami micunajunga.

20Diosta na manllajcunaca tucuringami.

Mandaj Diosta na cazujcunaca,

llamapaj virashnami yacuyashpa tucuringa.

Cushnishnami chingashpa tucuringa.

21Diosta cazuj runaca, imata mañashpapash na tigrachinllu.

Alita ruraj runaca, llaquishpami imagutapash caran.

22Pai bendiciashca gentecunami, llactataca japinga.

Pai na alicachishca runacunaca, tucuringami.

23Mandaj Diosmi, runa imashna causanataca ricuchinga.

Alita rurashpa causashca runataca, alicachingami.

24Diosta cazuj runa urmashpaca, na chaipi saquiringachu.

Paitaca, Mandaj Diosmi maquimanda charijun.

25Ñucapash chairalla huambrami carcani.

Ñami cunanga rucuyani.

Alita rurashpa causaj runata, jichushpa saquijtaca na ricushcanichu.

Paipaj huahuacuna, micunata mañanajujtapash na ricushcanichu.

26Diosta cazuj runaca, pimambash llaquishpa mañachinllami.

Paipaj miraicunapash, chashnallatami shujcunaman alita ruranga.

27Na alita ruranataca saquishpami, alitalla rurana cangui.

Shina rurashpaca, causaitami causangui.

28Mandaj Diosca, alita ruraj runatami juyan.

Paipajlla causajcunataca, na jichushpa saquinllu.

Paicunataca, causaita causaicamanmi huacaichinga.

Ashtahuangarin, Paita na cazujcunapaj miraicunataca tucuchingami.

29Alita rurashpa causajcunami, llactataca paicunapaj cachun japinga.

Chai llactapica, causaitami causanajunga.

30Alitalla ruraj runaca, ali yachajushca shimicunatami riman.

Paipaj shimihuanga, alitallami riman.

31Paipaj shungupipash, Taita Dios mandashcata yariashpami causan.

Chashna cashpami imapipash na pandaringa.

32Diosta na cazuj runaca,

alitalla ruraj runata huañuchingapami chapajun.

33Mandaj Diosca, na chai runapaj maquipi saquingachu.

Juezcuna juchachishpa llaquichinajuchunga na saquingachu.

34Mandaj Diosta cazushpami, Pai mandashcata pactachina cangui.

Paimi, canda alicachishpa llactata carangapa agllanga.

Juchata ruraj runacunata tucuchishca jipami, chaitaca pactachinga.

35Diosta na cazuj runataca, ninanda jatun tucuntami ricurcani.

Verde laurel quiru viñajujtashnami ricurcani.

36Shina cashpapash ñapash chingashpami, cutinga na ricurirca.

Paitaca mascashpapash na tarircachu.

37Alitalla ruraj runataca, ama cungapanguichu.

Tucuita pactachij runataca, ama saquipanguichu.

Tucuipi cushijushpa aliguta causaj runatami, jipa punllapica cushichipangui.

38Na cazuj runacunataca tandachishpami, tucuillata tucuchipangui.

Diosta na manllajcunapaj miraicunaca tucuringami.

39Alitalla rurajcunataca Manda Diosmi quishpichinga.

Ninan llaqui punllacunapica,

Paimi jatun torreshna jarcanga.

40Mandaj Diosmi, paicunataca yanapashpa, cacharichinga.

Diosta na cazuj runacunapaj maquimandami, paicunataca quishpichinga.

Diospi shuyashcamandami, chashna quishpichinga.