Psalms 84 - Quichua Imbabura 2016

Taita Diospaj huasita ninanda yarinajushcamandaCandajcunata mandaj candachijuchun, Gitit shuti taquipi, Coré shuti runapaj miraicunaman rurashca Salmomi.

1¡Tucuita Mandaj Dioslla,

Cambaj huasica ninan juyaillagumari!

2Mandaj Diospaj huasi patiocunapi puringapami, ninandapacha munajuni.

Ñucaca, tucui shunguhuanmi, causaj Taita Diostaca candajuni.

3Gorrión shuti alasyu animalpashmari, chaipi causan.

Golondrinapashmi, paipaj huahuacunaman tazinda rurajun.

Tucuita Mandaj Dioslla,

Cambaj altar quimiriapimi chashna ruranajun.

Canmi, ñucata Mandaj, ñuca Taita Dios capangui.

4Cambaj huasipi causajcunaca, ninandami cushijunga.

Causaita causaimanmi, canda alicachinajunga. Selah

5Can ushaita cujpi causajcunaca, ninandami cushijunga.

Paipaj shungupipash, Canda cazushpa causanatami yarinajunga.

6Huacana shuti pugru pambata rinajushpaca, yacutami taringa.

Tamiashpa jatun utujucunapi jundajpimi, chashna taringa.

7Ashtahuan, ashtahuanmi, ushaita japishpa rinajunga.

Taita Diostaca, Sion pueblopimi ricunajunga.

8Tucuita Mandaj Taita Dioslla,

ñuca mañajujtaca uyahuayari.

Jacobpaj Taita Dioslla, uyahuayari. Selah

9Ñucanchi jarcarina escudoshna Taita Dioslla, ricuhuayari.

Can agllashca jatun mandajtapash ricupayari.

10Huaranga punllacunata, canllapi canapaj randica,

shuj punllatallapash Cambaj huasi ucupi purijunami ashtahuan ali canga.

Na ali gentecunapaj huasicunapi causangapa randica,

ñuca Taita Diospaj huasi pungupi canatami munani.

11Mandaj Taita Diosca, indishna punchayachishpami ñucanchitaca ricuriajun.

Mandaj Dioslla,

Canmi ñucanchitaca juyashpa, alipi churangui.

Canda juyashpa causajcunamanga, tucuita cushpami charingui.

12Tucuita Mandaj Dioslla,

Canda yariashpa causaj runaca ninandami cushijunga.