1 PEDRO 1 - Quichua Imbabura 2016

“Alillachu capanguichi” nishcami

1Jesucristopaj apóstol Pedromi cani. Paicunapaj llactamanda llujchishpa cachajpi, Ponto, Galacia, Capadocia, Asia, Bitinia shuti llactacunapi causanajuj crijcunamanmi, caitaca quilcani.

2Cangunaca, Taita Dios munashcashna pundamanda agllai tucushca, Diospaj Espirituhuan, Diospajlla shicanyachishcami canguichi. Shinallata, Diosta cazushpa causachun, Jesucristopaj yahuarhuan maillashcami canguichi. Diospaj juyaipash, ali causaipash, cangunapi ashtahuan mirachun ninimi.

Causaita causagrinata shuyanamanda

3Ñucanchi Apunchi Jesucristopaj Taita Diostaca, ninandapacha alicachishunchi. Paica, huañushcacunapaj chaupimanda Jesucristota causachishpami, ñucanchitaca Pai ninanda llaquijunshnallata, causaita causagrinata shuyachun, mushujta huacharishpa causanajuchun agllarca.

4Na ismunalla, na mapayanalla, na tucurinalla caranacuna, jahua pachapi alichishca cangunapaj tiyajujta japigrichunmi, chashna agllarca.

5Canguna crishcamandami, Taita Diosca, Paipaj ushaihuan cangunata quishpichishcata tucurimui punllapi, ricuchishpa pactachingapami chashna agllashca.

6Chaimandami, cai pachapi ashacamanlla shuj shuj llaquicunata apanajushpapash, cushijuita japina canguichi.

7Canguna crishcapash, curitapash yali ashtahuan ali cajta yachashpami chashna cushijuna canguichi. Chai curitaca, tucurinalla cajpipash, ninapi rupachishpami ali cajtaca ricun. Shinallata, canguna ali crishpa causanajujta Jesucristo japij shamushpami, ninanda alicachishpa chasquinga.

8Jesucristotaca na ricushca cashpapash, ninandami juyanguichi. Cunanbi na ricushpapash, Paita crishpami na yachai ushanalla, jatun cushijuita charishpa causanajunguichi.

9Crishcamanda, quishpirinata yachashpami, chashna cushijuita charinguichi.

10Profetacunaca, imashna Dios cangunata ninanda juyashpa quishpichinata yachangapa munashpami, ninanda tapushpa yachanajushca.

11Maijan runapi, ima punllacunapi chashna tucunata, paicunapi causajuj Cristopaj Espíritu yarichijpimi chashna tapushpa purinajushca. Chai Espiritullatami, ninan llaquicunata Cristo apanatapash, jipa punllacunapi ninanda alicachi tucunatapash, chai punllacuna nara pactajpillata villashca.

12Diosca, chai profetacunamanmi, chai villashcacunaca na paicunapaj cashpa, ashtahuangarin ñucanchipaj cashcata ricuchishca. Chaitaca, profetacunami rurashpa catimunajushca. Jahua pachamanda cachamushca jucha illaj Diospaj Espíritu yarichijpimi, quishpirinamanda villajcunaca, cunan punllacunapi cangunaman villanajushca. Chaitaca, angelcunapash ninandami ricungapa munan.

Jucha illaj causachunmi, Taita Diosca cayajun

13Shina cajpimi cinturasta chumbilirijshna, ali yuyaihuambacha causana canguichi. Imata rurashpapash, aligutapacha rurashpa causaichi. Jesucristo tigramushpa, cangunata ninanda juyashpa caranataca, tucui shungu yariashpami shuyana canguichi.

14Cangunaca, ali cazuj huahuacunami cana canguichi, shina cashpami, punda causaipi, na yachaimanda na alita rurashcataca, cutinga na rurana canguichi.

15Ashtahuangarin, cangunata agllaj Diosca, jucha illajmi. Shina cajpimi, cangunapash tucui causaipi jucha illaj causana canguichi.

16Quilcashcapica: “Ñucaca, jucha illajmi cani. Shinamandami cangunapash, jucha illaj causana canguichi” nijunmi.

17Imata rurashcatapash, na shujtalla ricushpa tucuicunata llaquichij Diostami cangunaca mañanajunguichi. Shina cashcamanda, cai pachapi ashacamanlla causanajushpaca, paitallami manllashpa causana canguichi.

18Imapapash na ali, yanga causaimanda quishpichi tucushcataca yachanguichimi. Chai causaitaca, cangunapaj taitacunamandami chasquircanguichi. Tucurinalla curihuan, culquihuanga na quishpichi tucushcachu canguichi.

19Ashtahuangarin, Cristopaj juyailla yahuarguhuanmi, cangunataca quishpichirca. Paica, na mapayashca, ima na alipash illaj llamagushnami carca.

20Paitaca, cai pachata nara rurashpallatami, huañuchun churashca carca. Shina cajpipash, cunan cai tucurimui huatacunapimi, cangunata juyaimanda Cristoca shamurca.

21Paimandami, Taita Diostaca cringuichi. Chashna crishpa, Taita Diosta yariashpa, cushijuihuan shuyashpa causachunmi Cristotaca, huañushcacunapaj chaupimanda causachishpa, ninan ushaihuan causachun churarca.

22Na llullashpa villajuj Shimita cazushpami, Diospaj Espíritu yarichijpi, cangunapaj almapash mapa illaj saquirishca. Chashna cashpami, na nij tucushpalla, huauquipurashna, tucui shunguhuambacha, caishuj chaishuj juyarishpa causana canguichi.

23Cangunaca, huañushpa rinalla taitamandaca na cutin huacharishcachu canguichi. Ashtahuangarin, causaita causaicaman na tucurishpa, causajujlla Taita Diospaj Shimimandami cutin huacharishcanguichi.

24Chai Shimipica, cashnami nijun:

“Tucui gentecunapaj ushaica jihuashnallami.

Paicuna imashna cashcapash, jihua sisashnallami.

Jihua chaquijpica, sisapash urmanllami.

25Ashtahuangarin Jatun Diospaj Shimica,

causaita causaicaman tiyajunllami” nijunmi.

Quishpirinamanda cangunaman villanajushpaca, cai shimicunatami villashca.