1Dioshuan ali cangapa cushpa huañuchina animalta apamushpaca, jari huagrata cashpa, huarmi huagrata cashpapash, ali huagratami Mandaj Diosmanga apamuna canguichi.
2Chai huagrapaj umapi maquita churashpami, Dioshuan tuparina jatun carpa ñaupajpi cungata cuchushpa huañuchinga. Yahuartaca, Aaronbaj churi sacerdotecunami altar jahua muyundipi tsirapachinajunga.
3Chai jipami, Dioshuan ali cangapa cushpa huañuchishca animalpaj, chunllulicunata quilpashca viratapash, vijsa ucupi tiyaj tucuilla viratapash, Mandaj Diosman cushpa rupachinga.
4Shinallata, ishcandi riñondapash, chaipillata jahualla viratapash, lomopi viratapashmi rupachinga. Chai riñondillatami, hígado jahuamanda chunllulicunapaj viratapash llujchinga.
5Chaicunataca, Aaronbaj churicunami altarpi rupachinajunga. Chaitaca, Diosman cushpa tucuillata rupachingapa churashca, yamda jahuapi churashpami rupachinajunga. Chaica, Mandaj Diospaj ñaupajpi mishquilla ashnajuchun rupachishcami canga.
6Shinallata, Mandaj Dioshuan ali cangapa cushpa rupachina llamaca, jari llama cashpa, huarmi llama cashpapash, ima huaglipash illajmi canga.
7Maltun llamata cushpapash, Mandaj Diospaj ñaupajpimi cuna canga.
8Chai llamapaj umapi maquita churashpami, Dioshuan tuparina jatun carpa ñaupajpi, cungata cuchushpa huañuchinga. Yahuartaca, Aaronbaj churicunami altar jahua muyundipi tsirapachinajunga.
9Chai jipami Mandaj Dioshuan ali cangapa cushpa huañuchishca animalpaj chupataca, lomo tullucunandi fitishpa, tucuilla viratapash, chunllulicunata quilpashca viratapash, vijsa ucupi tucui viratapash tucuillata rupachinga.
10Shinallata, ishcandi riñondapash, chaipillata jahualla viratapash, lomo viratapashmi rupachinga. Chai riñondillatami, hígado jahuamanda viratapash llujchinga.
11Chaitaca sacerdotemi altar jahuapi rupachinga. Micunata carashpa shina rupachishcami, Mandaj Diosman carashca ofrenda canga.
12Chivota ofrendata cushpaca, Mandaj Diospaj ñaupajpimi cunga.
13Chai chivopaj umapi maquita churashpami, Dioshuan tuparina jatun carpa ñaupajpi cungata cuchushpa huañuchinga. Yahuartaca, Aaronbaj churicunami, altar jahua muyundipi tsirapachinajunga.
14Chai jipami, Dioshuan ali cangapa cushpa huañuchishca animalpaj, chunllulicunata quilpashca viratapash, vijsa ucupi tucui tiyashca viratapash, Mandaj Diosman cushpa rupachinga.
15Shinallata, ishcandi riñondapash, chaipillata jahualla viratapash, lomo viratapashmi rupachinga. Chai riñondillatami, hígado jahuamanda viratapash llujchinga.
16Chaitaca sacerdotemi, altar jahuapi rupachinga. Micunata carashpa shina rupachishcami, Mandaj Diospaj ñaupajpi mishquilla ashnajun ofrenda canga. Tucui tiyashca virami Mandaj Diospaj canga.
17Cangunaca maipi causanajushpapash, viratapash, yahuartapash na micunachu canguichi. Cai mandashca shimicunaca, tucui causaipi pactachinajuchun mandashca shimicunami canga’ nishpa villangui” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.