2 CORINTIOS 1 - Quichua Imbabura 2016

“Alillachu capanguichi” nishcami

1Jesucristomanda villachun, Taita Dios munashpa agllashca apóstol Pablomi cani. Corinto pueblopi, Acaya shuti llactapi Diospajlla tandanajuj tucui crijcunamanmi caitaca, huauqui Timoteondi quilcamunchi.

2Ñucanchi Taita Diospash, Apunchi Jesucristopash, cangunaman ninan juyaita, ali causaita carachunmi munanchi.

Llaquicunata Pablo apashcamanda

3Ñucanchi Apunchi Jesucristopaj Taita Diosca, ninanda alicachi tucushca cachun. Paica, ñucanchita ninanda llaquij, tucuipi cushichij Taita Diosmi.

4Paica, tucui llaquicunapimi cushichijun. Shujcunata jatun llaquicuna japijpipash, Taita Dios ñucanchita imashna cushichinshnallata, ñucanchipash cushichi ushachunmi chashna rurajun.

5Cristo ninanda llaquichi tucushcashnami, ñucanchipash llaquichi tucunchi. Chashnallatami Cristoca, ñucanchimanga ninanda cushijushpa causachun caramujun.

6Ashtahuangarin, canguna ninanda cushijuchumbash, quishpirichumbashmi llaquichi tucunajunchi. Shinallata, canguna ninanda cushijuchumbash, quishpirichumbashmi ñucanchipash cushijuita japinajunchi. Shinamandami cangunapash, ñucanchishnallata shinlli tucushpa llaquicunataca apanajunalla canguichi.

7Cangunata yarishpami, ninanda cushijunchi. Cangunapash, ñucanchishnallatami llaquita apanajunguichi. Shina cashpami, ñucanchishnallata cushichi tucunajunguichi.

8Juyashca crijcuna, Asia llactapi ñucanchi jatun llaquita apashcata yachachunmi munanchi. Ninandapacha llaquichijpi, na ashtahuan shinlli tucui ushashpami, “ñamari huañugrinchi” yanajurcanchi.

9Huañuchi tucunapachami canchi yarcanchimi. Shina cashpami, na ñucanchillata ushaita charishpa, ashtahuangarin, huañushcacunata causachij Taita Diosta yariashpa causanata yacharcanchi.

10Llaquinayaita huañunamanda quishpichishpami, cunanbipash quishpichijunra. Jipamambash quishpichinata yachashpami cushijushpa shuyanajunchi.

11Ñucanchimandaca, cangunapash Diosta mañapanguichi. Ashtacacuna ñucanchimanda mañajpica, Paimi ñucanchiman imagutapash caranga. Shina carajpimi, chaimandaca ashtacacuna pashi ninajunga.

Corinto puebloman Pablo imashpa na rishcamanda

12Na jariyashpa, na nij tucushpalla, Taita Dios carashca ali yuyaihuan causashpami ñucanchica cushijunchi. Na ñucanchi yachajushcahuanlla causashpami, Taita Dios ninanda juyajpi, cai pachapi causajcunatapash juyashpa, cangunatacarin ashtahuan juyashpa chashna cushijunchi.

13Canguna ricushpa yachajuchunmi, caicunataca quilcamunchi. Shinallata, tucuita aligutapacha yuyaipi japichunmi munani.

14Cangunaca, Apunchi Jesús shamui punllapimi, ñucanchi yachachishcamandaca cushijunguichi. Shinallatami ñucanchipash, cangunamandaca cushijushun.

15Shinamandami, cangunapajmanra punda shamungapa munarcani. Diospaj jatun juyaita chasquichunmi caihuanga ishcaicaman cangunapajman shamungapa munarcani.

16Cangunapajmandaca, Macedonia llactaman yalingapami munarcani. Shinallata, Macedoniamanda tigramushpapash, cutin chayamungapami munarcani. Chaimandaca, canguna ñucata Judea llactaman cachachunmi yarijurcani.

17Cashna yarijushpaca, ¿nachu aliguta yarijupashcani? Na cashpaca, chaita rurangapaca, ¿ñuca munaillachu: “Ari rurashami, na rurashachu” nijushcani?

18Ashtahuangarin, ñucanchi “ari” nishcatapash, “na” nishcatapash, Taita Diosca alimi yachan.

19Cangunapurapica, Silvanopash, Timoteopash, ñucapashmi, Taita Diospaj Churi Jesucristomanda villanajurcanchi. Jesucristoca: “Ari” nishca jipa: “Na” nijunataca na yachanllu carca. Ashtahuangarin: “Ari” nishcataca pactachimbachami carca.

20Taita Diosca, imata pactachingapa: “Ari” nishcataca Jesucristopimi pactachirca. Shina cashcamandami, Taita Diostaca, Jesucristomanda alicachishpa “chashna cachun” ninajunchi.

21Taita Diosmi ñucanchitapash, cangunatapash, Cristota aliguta catichun shinllichijun. Taita Diosllatami aceiteta talishpa javijshna, Paipaj Espiritutapash ñucanchiman caramurca.

22Paillatami, ñucanchi shungupi Paipaj Espirituhuan sellashpa, Paipajlla cashcata ricuchirca.

23Ashtahuangarin, ñuca imashna cajta yachaj Taita Diostami mañajuni. Cangunata amara llaquichingapami, Corinto puebloman shamungapa munashpapash nara shamuni.

24Shina cajpimi, “cashnami catina canguichi” nishpaca na mandanchi. Cangunaca ñami ali crishpa catinajunguichi. Ashtahuangarin, canguna ninanda cushijushpa causachunmi yachachinajunchi.