1Chai punllacunapimi, ashtaca gentecuna tandanajushca chaipi carca. Paicunaca, ima micunatapash na charijta yachashpami Jesusca, Paipaj yachajujcunata cayashpa cashna nirca:
2“Cai tucui gentecunataca, ninandami llaquini. Ña quimsa punllatami, Ñucahuan purinajun. Paicunaca, imata micunatapash na charinllu.
3Huaquingunaca, caru llactacunamandami shamushca. Paicunata na micuchishpa huasiman cachajpica, chaupi ñambillami juizu chingashpa shitarinajunga” nircami.
4Shina nijpimi, Paipaj yachajujcunaca:
“Cai jichushca pambapica, ¿maimandata paicunamanga tandata carai ushangayari?” ninajurca.
5Shina nijpica Jesus tapushpaca:
“Cangunaca, ¿mashna tandatata charinguichi?” nircami.
Shina nijpimi paicunaca:
“Canchis tandatallami charinchi” ninajurca.
6Shinamandami, chai tucui gentecunataca: “Alpapi tiyarishpa samapaichi” nirca.
Chaipimi, chai canchis tandata japishpa Jesusca, Diosta pashi nishpa mañarca. Chai jipami, chaupishpa, tucuicunaman carachun, Paipaj yachajujcunaman curca. Paicunaca, tucui gentecunamanmi caranajurca.
7Shinallata huaquin pijicunatapashmi charishca carca. Chaicunamandapash Diosta mañashpami, carachun cacharca.
8Shina carajpimi gentecunaca, vijsa pactajta micurca. Paicuna na micui ushashcataca, canchis canasta jundatami, Paipaj yachajujcunaca tandachirca.
9Chai micushpa tiyanajuj gentecunaca, chuscu huarangashnami carca. Paicunataca: “Cayacaman” nishpa cacharcallami.
10Chai jipami Jesusca, Paipaj yachajujcunandi barcopi tiyarishpa, Dalmanuta llactaman shamurca.
“Pipash na rurai ushanallata rurashpa ricuchi” ninajushcamanda(Mat. 16:1-4; Luc. 12:54-56)11Chaipimi fariseocuna shamushpa, Jesusta pandachingapa munarca. Paicunami: “Imatapash na rurai ushanallacunata jahua pachamanda rurashpa ricuchi” ninajurca.
12Chaimandami Jesusca, espiritupi ninanda llaquirishpa cashna nirca:
“Cunan viñaicunaca, ¿imashpata pipash na ruranallacunata rurashpa ricuchichun mañanajun? Na llullashpami, cangunataca cashna nini: Cunan viñaicunaca, pipash na rurai ushanallata rurashcataca napacha ricungachu” nircami.
13Chai jipaca, tucuillata chaipi saquishpami barcopi cutin yaicushpa, cucha chimbaman rirca.
“Fariseocuna yachachishcacunaca levadurashnami” nishcami(Mat. 16:5-12)14Paipaj yachajujcunaca, tandata apashpa rinata cungashpami, shujlla tandata barcopi charinajushca carca.
15Jesusca, paicunataca cashna nishpami mandarca:
“Pactarallapash fariseocunapaj, Herodespaj levaduratara chasquinguichiman” nircami.
16Shina nijpimi:
“Paica, tandata na apamushcata yachashpami, cashna nijun” nishpa paicunapura nirinajurca.
17Chashna nirinajujta Jesús yachashpami:
“¿Imashpata tandaca illanchimari ninajunguichi? ¿Narachu yuyaipi japinguichi? ¿Narachu yachai ushanguichi? ¿Cunangamanllu shinlli shungura canguichi?
18Ñavita charishpapash, ¿nachu ricunguichi? Rinrita charishpapash ¿nachu uyanguichi? ¿Ima nishcatapash nachu yaringuichi?
19Picha tandata chaupishpaca, picha huaranga runacuna micuchunmi cararcani. Chaimandaca ¿mashna canasta junda puchushcatata tandachircanguichi?” nijurcami.
Shina nijpimi:
“Chunga ishcai canasta jundatami tandachircanchi” ninajurca.
20“Shinallata, canchis tandata chaupishpami, chuscu huaranga gentecuna micuchun cararcani. Chaimandaca ¿mashna canasta junda puchushcatata tandachircanguichi?” nircami.
Shina nijpimi:
“Canchis canasta jundatami tandachircanchi” ninajurca.
21Shina nijpimi paicunataca:
“¿Chashna rurashca jahuachu cunangaman na yuyaipi japinguichi?” nirca.
Betsaida pueblopi shuj ñausa runaguta alichishcamanda22Betsaida puebloman chayamujpimi, shuj ñausa runaguta apamushpaca: “Cambaj maquihuan tacarishpa alichipai” nishpa ninanda mañanajurca.
23Chaipimi, ñausa runata maquimanda aisashpa, chai uchilla llactamanda llujchishpa pusharca. Chai ñausa runapaj ishcandi ñavipi t'ucata churashpa, umapipash maquicunata churashpami:
“¿Ñachu imagutallapash ricungui?” nishpa tapurca.
24Shina nijpi ricujushpaca:
“Quirucunashna purinajujtami, gentecunataca ricuni” nirca.
25Shina nijhuanga cutinmi ñavicunapi maquicunata churarca, shina rurashpaca cutinmi ricuchun mandarca. Chashna rurajpimi, ali tucushpa tucuita ali ricujurca.
26Chai jipaca: “Ama chai llactaman yaicunguichu, pimambash cashna rurashcataca ama villanguichu, cunanga cambaj huasiman rilla” nishpami cacharca.
Pedroca: “Cristomi cangui” nishcami(Mat. 16:13-20; Luc. 9:18-21)27Jesús chaimanda llujshishpaca, Paipaj yachajujcunandimi, Filipo runapaj Cesarea muyundi uchilla llactacunaman rijurca. Ñanda rijushpami Paipaj yachajujcunataca:
“Gentecunaca Ñucataca, ¿pi yashpashi ricuhuan?” nishpa tapurca.
28Shina tapujpimi paicunaca: “Huaquingunaca: ‘Bautizaj Juanmi canga’, shujcunaca: ‘Eliasmi canga’, cutin shujcunaca: ‘Punda profetapuramanda maijambashmi canga’ yanajunmi” ninajurca.
29Shina ninajujpimi Jesusca: “¿Cutin cangunaca maijan canga yahuanguichita?” nirca.
Shina tapujpimi:
“Canga Cristomi cangui” nishpa, Pedroca tigrachirca.
30Shina nijpimi, Jesusca:
“Ñuca maijan cajtapash, pimambash na villanachu canguichi” nishpa mandarca.
Jesusca, pai huañunatami villashca(Mat. 16:21-28; Luc. 9:22-27)31Shinallata Jesusca, cashna nishpami yachachi callarirca:
“Runa Aichayuj tucushca Ñucaca, ninanda llaquichi tucunapachami cani. Mandaj ancianocunapash, sacerdotecunata mandajcunapash, mandashca Shimita yachachijcunapash, Ñucataca na ricunayachishpami huañuchihuanga. Shina huañushpapash, quimsa punllahuanga causarishallami” nijurcami.
32Chaitaca, Paipaj yachajujcuna aligutapacha yachachunmi villajurca. Shina nijpimi Jesustaca, Paitalla pushashpa, Pedroca ninanda jarcashpa rimajurca.
33Shina nijpimi Paipaj yachajujcunata tigrarishpa ricushpa, Jesusca, Pedrotaca: “¡Ñuca ñaupajmanda anchuri, Satanás! Canga, Taita Dios munashcashnaca na yarijunguichu, ashtahuangarin gentecuna munashcatallami yarijungui” nishpa shinllita rimarca.
34Shina nishpallami Jesusca, Paipaj yachajujcunatapash, caishuj gentecunatapash cayashpa cashna nijurca:
“Maijan cashpapash Ñucata catingapa munashpaca, paipaj causaita na llaquishpa, paipaj cruzta aparijshna Ñucata catihuachun.
35Maijan cashpapash, paipaj causaita quishpichingapa munashpaca, chingaitami chinganga. Ashtahuangarin Ñucata catijushcamanda, ali villanata villajushcamanda huañuchi tucushpaca, quishpiringami.
36Shuj runa cai pachapi ima tiyajtapash tucuita japishpa charijyashpapash paipaj alma chingaita chingagrishpaca, ¿ima alita cangayari?
37Chashna chingashpaca, paipaj almamandaca, ¿imatashi cui ushanga?
38Maijambash, Ñucamanda, Ñuca villashca shimicunamandapash pinganayachishpa, cai na ali juchayuj gentecunaman na villajpica, Runa Aichayuj tucushca Ñucapashmi, Ñuca Taitapaj punchapamba ushaihuan, Paipaj jucha illaj angelcunahuan shamushpa, paitaca pingaichisha” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
