1Jesusca, cutin cucha manñapi yachachijujpimi, ashtaca gentecuna Paipajman tandanajumurca. Shinamandami, cuchapi tiyajuj canoapi Jesusca tiyarirca. Chai gentecunaca, tucuillami cucha manñapi carca.
2Chaipimi Jesusca, ashtaca yarichishpa yachachinacunahuan, Paipaj yachashcacunataca cashna nijurca:
3“Aliguta uyahuaichi. Shuj tarpuj runami, tarpungapa llujshirca.
4Chai runa tarpujpica, huaquin muyucunaca ñambimi urmarca. Ñambi urmashca muyutaca, alasyu animalcunami shamushpa micurca.
5Shinallata, huaquin muyucunaca, ashalla alpa tiyaj rumilla alpapimi urmarca. Na jundu alpa cajpimi ñapash viñarca.
6Ashtahuangarin, uchilla sapita charishpami, ninanda indijpica, anguyashpa chaquirca.
7Shinallata, huaquin muyucunaca, casha viñana chaupipimi urmarca. Cashacuna yalishpa viñashpa ismuchijpimi, imallapash na fucurca.
8Ashtahuangarin, huaquin muyucunaca, ali alpapi urmashpami, juyailla llujshimushpa viñashpa, aliguta fucurca. Huaquingunaca, shujmandallami quimsa chungata, huaquingunaca sucta chungata, huaquingunaca patsajta granorca” nijurcami.
9Jesusca chashna nishpallami:
“Uyangapa rinrita charishpaca aliguta uyaichi” nirca.
10Gentecuna tucuilla rijpimi Jesusca, Paipaj chunga ishcai yachajujcunandi, caishuj cumbashpa purijcunandi chaipi saquirirca. Paicunami, imashpa Jesús chimbapurashpa parlashcacunata tapunajurca.
11Shina tapujpimi, Jesusca cashna nijurca:
“Taita Diosca, Pai mandajuj llactamandaca, pipash na yachai ushashcatami, cangunamanlla yachachijun. Ashtahuangarin, chaishuj gentecunataca, yarichishpa yachachinacunahuanmi imatapash yachachijuni.
12Ricushpapash na ricushcashna cachun, uyashpapash na uyashcashna cachunmi, chashna yachachijuni. Paicuna yuyaita japishpa ama Diospajman tigrarichun, paicunapaj juchatapash Dios ama cungachunmi, chashna yachachijuni” nijurcami.
13Jesusca, Paita tapujcunatami cashna nijurca:
“Yarichishpa yachachishcacunataca, ¿narachu cangunapash yachai ushanguichi? Shuj rimashcacunahuan chimbapurashpa yachachijpicarin, ¿imashnashi yachajui ushanguichi?
14Tarpuj runaca, Diospaj Shimita villaj runami.
15Ñambi urmashca huaquin muyucunaca, caicunami: Huaquin gentecunaca, Diospaj Shimita villajujpica, paicunapaj shungupi tarpujpishnami uyanajun. Ashtahuangarin chai uyashcataca, Satanás shamushpami ñapash cungachin.
16Shinallata, rumilla alpapi urmashca muyucunaca caicunami: Huaquin gentecunaca, Diospaj Shimita villajujpica, ninanda cushijushpami chasquin.
17Ashtahuangarin shina chasquishpapash, sapita na charij yurashna cashpami, ashacamanlla catinajun. Paicunaca, jatun llaquicuna japijpi, na cashpaca Diospaj Shimita catinajujpi catiriyashpa llaquichijpica, nitijajshna pandanllami.
18Casha chaupipi urmashca muyucunaca, caicunami: Huaquin gentecunaca, Diospaj Shimita villajujpica, aligutami uyanajun.
19Shina uyashpapash, cai causaipajlla imatapash charingapami munanajun. Ña charishpapash, ashtahuan charingapa munashpami pandachi tucunajun. Diospaj Shimitaca, chai tucui munaicuna shamushpami cungachin. Shinamandami paicunaca, grano na fucunshnalla tucunajun.
20Ali alpapi tarpushca muyucunaca caicunami: Huaquin gentecunaca, Diospaj Shimita uyashpami shungupi alichinajun. Shina cashpami, huaquingunaca shujlla muyumanda quimsa chungata fucujshna mirachin. Shujcunaca, sucta chungata fucunshnami mirachin. Ashtahuan shujcunaca, patsajta fucunshnami mirachin” nijurcami.
Imata pacalla rurashcapash ricuringallami(Luc. 8:16-18)21Jesusca cashnatapashmi nirca: “¿Michataca cajón ucupica, na cashpaca cama ucupi churangapachu japichin? ¿Nachu candeleropi churangapa japichin?
22Na ricurishpa pacalla canaca, imapash na tiyangachu. Michaman ama llujshichun, pacashca canaca imapash na tiyangachu.
23Maijambash uyangapa rinrita charishpaca aliguta uyaichi” nircami.
24Jesusca cashnatapashmi nirca: “Ñuca villajujtaca aliguta uyanguichi. Shujcunaman canguna alita rurajpica, chashnallatami cangunamambash cunga. Ñucata uyashpa cazujcunamangarin, ashtahuanmi caranga.
25Maijambash ashtacata charijmanmi ashtahuan caranga. Ashtahuangarin maijambash na charijtaca, ashaguta charishcatapash quichungami” nijurcami.
Viñajuj muyuhuan yarichishpa yachachishcamanda26Jesusca ashtahuan cashnatapashmi nijurca: “Taita Dios mandajujca, shuj runa paipaj alpapi muyuta tarpujshnami.
27Chai runaca, tutayajpica puñushpa, punllayajpica jatarishpami causan. Ashtahuangarin chai muyuca, chai runa na yachajta llujshishpa, viñashpa catinllami.
28Chai muyutaca alpallatami viñachin. Pundaca, jihuashnalla llujshishpami, jipamanga espiga llujshimun. Chai jipaca, espigapimi grano jundan.
29Ña fucujpica, granocunata tandachina punllacuna chayamujpimi, hoceshuan cuchun” nijurcami.
Mostaza muyumandami yarichishpa yachachishca(Mat. 13:31-32; Luc. 13:18-19)30Jesusca cashnatapashmi nijurca: “Taita Dios mandajujca, ¿imaman rijchajta canga? Na cashpaca ¿ima yarichinahuanda chimbapurashun?
31Chaica, mostaza muyuguta alpapi tarpushcashnami. Chai muyuguca, cai pachapi tucui tiyashca muyucunatapash yali jamzi jamzipachami.
32Ashtahuangarin chai muyuta tarpujpi viñashpaca, micuna tucui jihuatapash yali jatundami viñan. Chashna viñashpa malquicuna jundajpimi, alasyu animalcunaca, chai llandupi causanajun” nijurcami.
Yarichishca shimicunahuan yachachishca imapa cashcamanda(Mat. 13:34-35)33Ashtaca yarichishpa yachachinahuanmi Jesusca Diospaj Shimitaca yachachijurca. Gentecuna yachajui ushanatallami yachachijurca.
34Paicunataca, yarichishpa yachachinahuanllami yachachijurca. Ashtahuangarin, Paipaj yachajujcunamanllami tucui ima cashcataca ali villajurca.
Ninan huairahuan cucha jatarijujta Jesús chulunyachishcamanda(Mat. 8:23-27; Luc. 8:22-25)35Chai punlla ña tutayajpimi, Paipaj yachajujcunataca: “Cuchata chimbashunchi” nirca.
36Shina nijpimi, tucuilla gentecunata “cayacaman” nishpa, Jesús tiyajuj barcopi rinajurca. Shuj barcocunapashmi paicunahuan rinajurca.
37Shina rinajujpimi, ninan huaira jatarishpa yacuta caiman chaiman shitajpi, barcoman jundamurca.
38Jesusca, barco huasha ucuman, saunata churashpa puñujujpimi, rijchachishpa cashna ninajurca:
“¿Yachachij, ñucanchitaca nachu llaquingui? ¡ñucanchica ñamari huañugrinchi!” ninajurca.
39Shina nijpimi Jesusca jatarishpa, huairataca shinllita rimashpa, yacutapash:
“Upallai, chulunlla cai” nirca.
Shina nijpimi huairapash upallayashpa, chulunlla tucurca.
40Shinamandami Jesusca cashna nirca:
“¿Imashpata cashna ninanda manllaringuichi? ¿Imashpata Ñucataca na crihuanguichi?” nircami.
41Shina nijpimi ninanda manllarishpa, caishuj chaishuj parlarishpa cashna ninajurca:
“Cai runaca ¿Pitayari? ¿Imamandata huairapash, cuchapash cazunlla?” ninajurcami.
Who We AreWhat We EelieveWhat We Do
2025 by iamachristian.org,Inc All rights reserved.
