LAMENTACIONES 3 - Quichua Imbabura 2016

Taita Dios ninanda llaquishpa cacharichinamanda

1Ñucami, Dios fiñashpa astinshna llaquichijpi, llaquita ricushca runa cani.

2Ñucataca, micha illaj ñandami, yana tutapishna pushahuarca,

3Ñucataca cutin cutinmi, paipaj maquihuan punllandi llaquichihuarca.

4Shina llaquita apashpami, ninanda rucuyashcani.

Ñuca tullucunapash, faquirinallami cani.

5Ñucataca, ninan llaquicunami muyundi japimuhuarca.

6Ña unaita huañushcatashnami, shitashpa saquihuarca.

7Muyundita jarcajpimari, llujshitapash na ushani.

Ashtahuan llaquicunata cachamushpami, ninanda llaquichihuarca.

8Ninanda caparishpa mañajujpipash, ñuca mañashcata na uyangapa, munarcachu.

9Ñuca purina ñangunatapash rumihuan jarcashpami, quingu ñangunata cachahuarca.

10Paica oso animalshnami chapariyajuhuarca.

León pacalla chapajunshnami shuyajurca.

11Shuj ñanda pushashpami, llaquichishpa tucuita quichuhuarca.

12Paipaj arcota chutashpa flechata cacharingapami, paipaj ñaupajpi churahuarca.

13Paipaj flechata cacharishpami, ñucataca tucuchihuarca.

14Ñuca llactapi causajcunapajca, na alichishpa rimai tucuna, punllandi asishpa ricui tucunami carcani.

15Jatun llaquicunata cachamushpami, ajenjo jacuta ufiachijshna llaquichihuarcangui.

16Ñuca quirucunapash faquirijtami, alpapi shitahuarca.

Ñucataca, uchufahuanmi quilpahuarca.

17Ñucapaca cushijushpa causanaca tucurishcami.

Ima ali tiyashcatapash, ña cungashcanimi.

18Chashna cashpami, ñuca ushaipash tucurirca.

Mandaj Diosta yarishpa causanapash tucurircami.

19Ninanda llaquita apajushcatapash,

ajenjotapash, jayajtapash ufiachijshna llaquichishcataca yaripayari.

20Ñuca causaipi ninan llaquita apajushcataca yarijushallami.

21Ñuca shungupi ali juyaita japishpami, Diospilla shuyajusha.

22Mandaj Diosca ñucanchita ninanda juyashpami na llaquichishpa tucuchishca.

Paipaj juyaica, napacha tucurinllu.

23Diosca punllandimi mushujta ñucanchitaca juyajun.

Paica tucuita pactachij Dios cashpami, chashna juyan.

24Mandaj Diosca, tucui causaipimi ñucataca ricujun.

Chaimandami, Paitalla shuyashpa causani.

25Mandaj Diosca, Paitalla shuyashpa causajcunataca ninandami juyan.

Paita mascajcunataca, ninandami juyan.

26Mandaj Dios quishpichinata shuyanaca aligupachami.

27Huambramandapacha tucuipi cazushpa causanaca, runacunapaca alipachami.

28Taita Dios mandajujpica, runacunaca upalla chasquinallami.

29Quishpirita ushaipapash canchi,

alpacaman cungurishpami shuyana canchi.

30Fiñaj runamanga, ñavipi huajtachun ricuchinallami.

Na alicachishpa rimajpipash llaquita apanallami.

31Jatun Diosca, causaita causaicaman na shitashpa saquinllu.

32Llaquichishpapash, Paica ninan juyaita charishpami ñucanchitaca cutin chasquin.

33Paica, cai pachapi causaj gentecunataca, na yangamanda llaquichinllu.

34Llactacunapi prezu tiyanajujcunata ninanda llaquichijcunatapash,

35jahua pachapi causajuj Diospaj ñaupajpi, na ali rurajcunatapash,

36Napash llaquichina runacunata llaquichijcunatapash,

Jatun Diosca napacha saquingachu.

37Ima tucunata villajpipash, ¿nachu Jatun Dios mandajpilla pactanga?

38¿Nachu jahua pachapi causajun Dios saquijpilla, ali canapash, llaqui apanapash shamunga?

39¿Imamandata runaca cai pachapi causajushpaca huacajun?

Runaca, pai juchata rurashcamandami huacanataca charin.

40Ñucanchi imashna causanajushcata aliguta yarishpa,

Mandaj Diospajman tigrarishunchi.

41Jahua pachapi Taita Diostaca, maquita vichai churashpa tucui shungu mañashunchi.

42Ñucanchimari, Canda na cazushpa juchata rurashcanchi.

Chaimandamari ñucanchi juchataca, na perdonashcangui.

43Ñucanchitaca ninanda fiñarishpami, catiriyashpa llaquichircangui.

Na llaquishpami huañuchircangui.

44Ñucanchi mañajushcata ama uyangapami, fuyu ucupi carcangui.

45Ñucanchitaca, na alicachi tucushpa, na ricunayachi tucushpa causachunmi, shuj gentecunapaj chaupipi saquircangui.

46Ñucanchita tucui fiñajcunamari, na alicachishpa ninanda rimanajurca.

47Ñucanchitaca, ninan manllaihuan causanajushpami pandarishcanchi.

Chaimandami, ñucanchica ninandapacha llaquichi tucushcanchi.

48Ñuca llactapi causajcuna ninan llaquita apanajujta ricushpami,

ñuca ñavimanda viquica, yacushna jicharijun.

49Ashatallapash cushijuica na tiyajpimi, na samashpa huacajunilla.

50Mandaj Dios jahua pachamanda ricungacamanmi chashna huacajushalla.

51Ñuca pueblopi causajcuna llaquita apajujpimi, ñavitapash, ñuca shungutapash nanajta huacarcani.

52Ñucata fiñajcunaca, yangamandami alasyu animaltashna huañuchingapa catiriyanajurca.

53Ñucataca, yacuta tandachina jatun utujupi churashpami, rumihuan quilparca.

54Yacupash ñuca umacaman quilpajpimi:

“Cunanga ñami huañugrini” yajurcani.

55Mandaj Dioslla, chai llaquipi cashpami, Cambaj shutipi mañarcani.

56Ñuca mañashcataca uyahuarcanguimi.

Ninanda llaquirishpa ñuca mañajujtaca, uyapayari.

57Canda mañajui punllapica, ñucapajman shamushpami:

“Ama manllaichu” nihuarcangui.

58Jatun Dioslla, ñuca llaquipi cajpica, Canmari ñucapaj randi shayarircangui.

Canmari, ñuca causaitaca quishpichircangui.

59Mandaj Dioslla, ñuca llaquitaca Canllata ricushcanguimi.

Ñuca causaitaca, Canllata huacaichihuailla.

60Ñucata ninanda llaquichinajujtapash,

ñucata fiñashpa imatalla yarinajujtapash, tucuitami ricurcangui.

61Mandaj Dioslla, ñucata na alicachishpa rimanajujtapash,

ñucata fiñashpa tucui na alita yarinajujtapash uyarcanguimi.

62Paicuna ñucata fiñashpa rimarinajujtapash,

ñucata llaquichingapa punllandi yarinajujtapash uyarcanguimi.

63Paicuna tiyarintapash, jatarintapash ricupayari.

Ñucataca, na alicachishpami rimanajun.

64Mandaj Dioslla, paicuna imata na alita rurashcamandaca chashnallata tigrachipailla.

65Paicunapaj shungu shinlliyachun saquipailla.

Canllata ninanda na alicachishpa, paicunataca llaquichipailla.

66Mandaj Dioslla, catiriyashpa llaquichipailla.

Cai pachamandaca, paicunataca anchuchipailla.