2 CORINTIOS 4 - Quichua Imbabura 2016

1Dios ninanda llaquishpa, Paipajta rurachun ñucanchiman mingashca cajpimi, na shaijushpa ruranajunchi.

2Shina cashpami, na pinganayachishpa, imatapash na pacalla ruranajunchi. Pitapash na umachishpami, Taita Diospaj Shimi imata nijushcatalla villanajunchi. Shina na llullashpa villashpa purinajushpami, tucuicuna ricushpa chasquichun, Diospaj maquipi mingarinchi.

3Chingaiman rinajuj gentecunaca quilpashcashna cashpami, quishpirinamanda ñucanchi villanajuj shimitaca na chasquinajun.

4Paicuna ama yachai ushachunga, cai pachapi mandajuj diablomi, paicunapaj yuyaitaca yanayachishpa saquishca. Paicunataca, ninan ushaita charij Cristomanda villashca shimicuna, ama punchayachijuchunmi chashna rurashca. Taita Dios imashna cajtami Cristoca ricuchijun.

5Shinallata, na ñucanchimandallata villanajushpami, ashtahuangarin “Jesucristomi, tucuita Mandaj” nishpa villanajunchi. Jesús ñucanchita juyajujpimi cangunaman villanajunchi.

6Taita Diosca: “Yana tutataca, micha punchayachijuchun” nishcami. Paimi, ñucanchi shungutapash punchayachishca. Taita Dios punchapamba causajujta yachachunga, Jesucristomi ñucanchiman ricuchimurca.

Jesusta crishpa causanamanda

7Chai quishpirinamanda juyailla villashca shimicunataca, alpa mangapishnami churashca. Na ñucanchipaj ushaihuanlla cashcata, ashtahuangarin Diospaj ninan ushaihuan cashcata yachachunmi shina churashca.

8Jatun llaquicuna japimujpipash, na llaquirishpa, ima tucujushpapash na musparishpami catinchi.

9Ñucanchita catiriyashpa llaquichijpipash, Diosca na saquinllu. Huajtashpa urmachishpapash, na tucuchi ushanllu.

10Maita rishpapash, Jesús imashna huañuchi tucushcashnami ñucanchipash llaquicunata apanajunchi. Jesuspaj ushaita ñucanchi causaihuan ricuchingapami chai llaquicunataca apanajunchi.

11Ñucanchica, Jesusta catinajushcamandami, tucui causaipi huañuchi tucunalla canchi. Shina cashpami, Jesuspaj ushaitapash ñucanchi huañunalla cuerpopi ricuchinajunchi.

12Shina cashcamanda, ñucanchita huañuchijpipash, cangunaca causaitami charinguichi.

13Ashtahuangarin, crina ushaita caraj Espiritutami charinchi. Quilcashcapica cashnami nijun: “Crircanimi, shina cashpami villarcani” nijunmi. Chaita pactachingapami ñucanchipash crishpa villanajunchi.

14Apunchi Jesusta causachij Diosllatami, ñucanchitapash causachishpa, cangunandi Paipaj ñaupajman pushanga.

15Ñucanchica, cangunata juyashpami llaquicunata apanajunchi. Taita Dios juyajujta ashtacacuna crishpa mirashpami, Paitaca tucuicunallata “jatunmi cangui” ninajunga.

16Shina cashpami na shaijushpa catinchi. Ñucanchi aicha rucuyajujpipash, ñucanchi espiritutaca punllandimi Diosca mushujyachijun.

17Cai causaipi jatun llaquicunaca ashacamanllami canga. Ashtahuangarin cai llaquicunaca, punchapamba juyailla llactapi causaita causagrinatami ricuchijun.

18Ñucanchica, cai causaipi imapash tucurinallacunata na yariashpami, ashtahuangarin, ñucanchi ñavipi na ricurishcacunata yariashpa causanchi. Imata ricushcacunapash tucuringallami, ashtahuangarin, na ricushcacunami causaita causanajungalla.