1Chaipimi Balaam runaca, Balac runataca cashna nirca: “Canchis altarta rurashpa, canchis shicutapash, canchis jari llamatapash huañuchingapa apamungui” nircami.
2Balac runaca, Balaam runa nishcashnami rurarca. Paicunaca ishcandimi, shuj shicutapash, shuj jari llamatapash huañuchishpa altarpi churarca.
3Chai jipami Balaam runaca, Balac runataca cashna nirca:
“Ñucaca rigrinimi, canga, Diosman cushpa tucuillata rupachinacunahuan shuyailla. Mandaj Dios, ñucata tuparingapa shamushpa, imagutapash nijpica, canman villashallami” nircami. Chai jipaca, imapash illaj jichushca urcuman rircallami.
4Balaam runahuan, Taita Dios tuparingapa shamujpimi, Balaam runaca cashna nirca:
“Ñami canchis altarta rurashpa, chai altarcunapica, shuj shicuhuan, shuj jari llamahuan, tucuilla altarcunapi churapashcani” nircami.
5Shina nijpimi Mandaj Diosca, Balaam runataca:
“Balac runapajman tigrashpa cashna ningui” nirca.
6Shina nijpi Balac runapajman tigrajpica, Balac runaca, Moab llactamanda tucuilla mandajcunandimi, Diosman cushpa tucuillata rupachinacunahuan shuyanajurca.
7Shina cajpimi Balaam runaca, yarichina shimicunahuan cashna nijurca:
“Aram llactamandami, Balac runaca pushamuhuashca.
Indi llujshimujman tiyaj urcucunapi, Moab llactata mandajlla,
Jacobpaj miraicunataca, ima llaquipash japishpachari ali canman, ningapa shamupai.
Israelcunata na alicachishpa rimaj shamupai.
8Taita Diospash na llaquichishcataca,
¿imashpata, ñucara na alicachisha?
Shinallata, Mandaj Diospash alicachishcataca,
¿imashpata, ñucara na alicachisha?
9Ashtahuangarin, jaca rumi jahuacunamandami ricusha.
Lomacunamandami ricusha.
Cai gentecunaca imatapash na manllashpami causanajunga.
Paicunaca, shuj llactacunahuanga na chapuringachu.
10Ñutu alpashna Jacobpaj miraicunataca,
¿pita yupangayari?
Na cashpaca, Israelcunamanda chuscupi chaupishpa shicanyachishcacuna mashna cajtaca, ¿pita yupai ushangayari?
Ñucapash, aligutalla ruraj runacunashnallata huañushcaiman.
Ñuca causana punllacunapash, paicunapaj punllacunashnallata cashcanman” nijurcami.
11Shina nijpimi Balac runaca, Balaam runataca cashna nirca:
“Canga, ¿imatata rurashcanguiyari? Ñucata fiñajcunata, ima llaquipash japishpaca alimi canman nichunmi pushamurcani. Ashtahuangarin, bendiciondallami cushcangui” nircami.
12Shina nijpimi Balaam runaca cashna nirca:
“¿Nachu Mandaj Dios imatalla rimachun nishcatalla rimana cani?” nircami.
13Shina nijpimi Balac runaca cashna nirca:
“Israelcunata ricunalla shuj pushtuman ripashun, chaimandaca na tucuillata ricushpami, paicunapaj carpacunata ashatalla ricungui. Paicunataca, chaimandami ima llaquipash japishpaca alimi canman nina cangui” nircami.
14Chai jipami Balaam runataca, Pisga shuti urcu jahuapi tiyaj, Zofim shuti pambaman pusharca. Chaipimi canchis altarta rurashpa, shuj shicutapash, shuj jari llamatapash huañuchishpa, tucuilla altarcunapi churarca.
15Chaipimi Balaam runaca, Balac runataca cashna nirca:
“Canga, animalcunata Diosman cushpa rupachinacunahuan shuyajuilla. Ñucaca, Taita Dioshuan chaipi tuparingapami rigrini” nircami.
16Mandaj Diosca, Balaam runahuan tuparingapa llujshishpami Balaam runataca:
“Balac runapajman tigrashpa cashna ningui” nircami.
17Shina nijpi, Balac runapajman tigrajpica, Balac runaca, Moab llactamanda tucuilla mandajcunandimi, Diosman cushpa tucuillata rupachinacunandi shuyanajurca. Chaipimi Balac runaca:
“¿Mandaj Diosca ima nircata?” nishpa tapurca.
18Shina tapujpimi Balaam runaca, yarichina shimicunahuan cashna nishpa rimajurca:
“Balac runalla, ñuca rimashcata aliguta uyai.
Zipor shuti runapaj churi, ñuca villashcata uyai.
19Taita Diosca, na gentecunashna llullashpa rimanllu.
Na runa aichayuj cashpami, imata ruranataca pactachin.
Pai rurasha nishcataca, ¿nachu ruranga?
Imata rurasha nishcataca, ¿nachu pactachinga?
20Bendiciai nishpami mandahuarca.
Dios bendiciashcata, shujman tigrachitaca na ushanichu.
21Jacobpaj miraicunapica, ima juchatapash na ricushcachu.
Israelcunapica, ima jatun na alitapash na ricushcachu.
Mandaj Taita Diosca paicunahuanmi.
Jatun Mandajpaj ninan cushijuimi, paicunahuan.
22Taita Diosmi paicunataca, Egiptomanda llujchimurca.
Paica, búfalo animalpaj ushaitashnami charin.
23Jacobpaj miraicunataca, ima brujushcacunapash na llaquichingachu.
Paicunata llaquichitaca, maijan brujupash na ushangachu.
Jacobpaj, Israelpaj miraicunataca:
‘¡Taita Diosca, ninandapachami bendiciashca!’ ninajungami.
24Cai gentecunaca, leonshnami jataringa.
Paicunaca, leonshna millaiyashpami shayaringa.
Paicunaca, micushpa tucuchij animalshnami, tucuilla tucuchishpa samanga” nijurcami.
25Shina nijpimi Balac runaca, Balaam runataca: “Paicunata, ima llaquipash japishpaca alichari canman nita na ushashpaca, ama bendiciaichuyari” nircami.
26Shina nijpimi Balaam runaca, Balac runataca:
“¿Nachu, Mandaj Dios tucui imata nishcatalla rurana cani?” nirca.
27Shina nijpimi Balac runaca, Balaam runataca:
“Cutin shuj pushtuman ripashun, chai pushtumandami, Taita Diospaj ñaupajpi ali ricurijpica, paicunataca ima llaquipash japishpaca ali canman nipangui” nijurcami.
28Shina nishpami Balac runaca, Balaam runataca jichushca pamba chimbapurapi tiyaj, Peor shuti urcu jahuaman pusharca.
29Chaipimi Balaam runaca, Balac runataca cashna nirca:
“Canchis altarta ñucaman rurai. Shinallata, canchis shicucunatapash, canchis jari llamacunatapash huañuchishpa chai altarcunapi churai” nircami.
30Balac runaca, imashna Balaam runa nishcashnami shuj shicuhuan, shuj jari llamahuan, tucuilla altarcunapi churarca.
Who We AreWhat We EelieveWhat We Do
2025 by iamachristian.org,Inc All rights reserved.
