EZEQUIEL 33 - Quichua Imbabura 2016

Chapariyashpa ricuj runa imatalla ruranamanda(Ez. 3:16-21)

1Mandaj Diosca cashnami nihuarca:

2“Huañuna aichayuj runa, cambaj llactapuracunaman cashna nishpa villangui: ‘Jatun macanajuita cai llactaman cachamujpica, cai pachapi causaj gentecunaca, paicunapaj llactapuramanda shuj runata agllashpami, chapariyashpa ricuchun churanajunga.

3Chai runaca, macanajuj runacuna chai llactaman shamujujta ricushpaca, trompetata huacachishpami gentecunaman villanga.

4Maijan cashpapash, chai trompeta huacanta uyashpapash na pacajushcamandami, huañuchi tucunga. Pai huañushpaca, paipaj jahuallatami canga.

5Chai trompeta huacanta uyashpapash na pacajushcamanda huañushpaca, paipaj jahuallata canga. Trompeta huacanta uyashpa pacajushpaca, na huañungachu.

6Ashtahuangarin, macanajuj runacuna shamunajujta ricushpapash trompetata na huacachijpica, gentecunaca na yachangachu. Shina cajpi, macanajuj runacuna shamushpa, maijanda cashpapash paipaj juchamanda huañuchijpica, chapashpa ricuj runapaj jahuami canga.

7Huañuna aichayuj runa, candaca, Israelcunata chapariyashpa ricuj cachunmi churarcani. Cunanga, Ñuca rimashcataca aligutapacha uyashpa, paicuna ali tucuchun, ñucapaj randi shinllita rimangui.

8Ñucata na manllaj runataca, Ñucallatami, huañunapachami cangui nijuni. Shina cajpipash, chai runa ali tucuchun, can na villajpica, paipaj juchamandallatami huañunga. Ashtahuangarin, pai huañujpica, candami llaquichisha.

9Ashtahuangarin, Ñucata na manllaj runa na alita runata saquichun, can rimashca jahua na saquishpaca, paipaj juchamandami huañunga. Ashtahuangarin canga, cambaj causaitaca quishpichinguimi’ nishpa villai.

Taita Diosca, tucuita alitalla ruraj cashcamanda(Ez. 18:21-32)

10Huañuna aichayuj runa, canga, Israelcunataca cashnami nina cangui: Cangunaca, cashnami ninajurcanguichi: ‘Ñucanchi na cazushcapash, ñucanchi juchacunapash, ñucanchipaj jahuallatami canga. Shinamandami ñucanchica huañuchi tucunajunchi. Shina cashpaca, ¿imashnata causashunyari?’ nircanguichimi ningui.

11Cashnatapash ningui: Mandaj Jatun Diosca, cashnami nin: ‘Ñucaca causajunipachami. Ñucata na manllaj runa huañuchunga, na munanichu. Ashtahuangarin, chai runa Ñucapajman tigrarishpa, causaita charichunmi munani. Shina cashcamandami, na alita ruranajushcata saquishpa, Ñucapajman tigrarimuna canguichi. Israelcunalla, ¿imashpata huañunatara mascanguichiyari?’ ninmi ningui.

12Huañuna aichayuj runa, cambaj llactapuracunataca, cashna ningui: ‘Maijan cashpapash, alitalla rurashpa causajushpapash, pandarishpa, juchata rurashpaca huañungapachami. Shinallata, Ñucata na manllaj runa, shuj punlla Ñucapajman tigrarimushpaca, quishpiringami. Alitalla ruraj runa, pandarishpa shuj punlla juchata rurajpica, ima alita rurashcapash na quishpichingachu’ ningui.

13Ñucaca, alitalla ruraj runataca: ‘Causanguipachami’ nishami. Shina nijpica paica, alitalla rurajmi cani yashpami, shuj punllapica pandarishpa juchata ruranga. Shina rurajpica, alitalla rurashpa causashca cashpapash, chai juchamandaca huañungapachami.

14Shinallata, Ñucata na manllaj runataca: ‘Huañunapachami cangui’ nishami. Shina nijpica, na alita ruranata saquishpa, Ñucapajman tigrarimushpa, ima pandatapash na rurashpami, alitalla ruranga.

15Shinallata, ima shuhuashcata, ima quichushcatapash, tigrachishpa, alitalla rurashpa causashpaca, paica causangapachami.

16Shina cajpimi, pai juchata punda rurashcacunataca, tucuilla cungasha. Alitalla rurashpa causajushcamandami, paica causaita charinga.

17Chaicunata rurajta ricushpaca, cambaj llacta gentecunaca: ‘Jatun Diosca na tucuita ali pactachijunllu’ ninajungami. Ashtahuangarin, paicunami na alita rurashpa causanajun.

18Alitalla ruraj runa, alita ruranata saquishpa, pandarishpa juchata rurashpaca, huañungapachami.

19Shinallata, ñucata na manllaj runa, chai na alita ruranata saquishpa, alitalla rurashpa causashpaca, causangapachami.

20Cangunaca: ‘Jatun Diosca na tucuita ali pactachijunllu’ ninajurcanguichimi. Israelcunalla, canguna imashna causashcataca, Ñucami tucuita ali ricushpa llaquichisha” nihuarcami.

Jerusalén pueblota llaquichishpa tucuchishcamanda

21Chunga quillapaj, picha punllapimi Ñucanchica, chunga ishcai huatata ña prezu tiyanajurcanchi. Shina cajpimi, shuj runa Jerusalenmanda pacajushpa ñucapajman shamushpa, cashna nihuarca: “Jerusalendaca ñamari quichushca” nihuarcami.

22Pacajushpa shamuj runa, ñucapajman chayamungapaca shuj punlla illajpillatami Mandaj Diosca, ñucapajman shamurca. Shina shamushpami ñucataca upata saquihuarca. Cayandi punlla cutin tigramushpa ñuca shimita pascajpimi, cutin rimai usharcani.

23Mandaj Diosca cashnatapashmi nihuarca:

24“Huañuna aichayuj runa, Israel llactapi llaquichishca pushtupi causajcunaca, cashnami ninajun: ‘Abrahamga shujlla cashpapash, tucui llactatami paipajlla cachun japirca. Ñucanchicarin taucacunamari canchi. Chaimandami, ñucanchimanga tucuilla llactata cuna’ ninajunmi.

25Shina cashcamanda, cashna nishpa villangui: Mandaj Jatun Diosca, cashnami nijun: ‘Cangunaca yahuartapash micunguichillami. Rurashcalla dioscunatapash mañanguichillami, gentecunatapash huañuchinguichillami. Chashna na alicuna cashpapash, ¿llactata japingapa munanguichirachu?

26Cangunaca, huañuchina yuyailla causashpami, na alitapacha ruranajunguichi. Shinallata, shujpaj huarmita quichushpami, juchata ruranajunguichi. Chashna na alicuna cashpapash, ¿llactata japingapa munanguichirachu? ninmi’, nishpa villangui.

27Paicunataca cashna ningui: Mandaj Jatun Diosca, cashnami nin: ‘Ñucaca causajunipachami. Llaquichi tucushca pushtucunapi causajcunaca, espadahuanmi huañuchi tucunga. Pambacunapi causajcunataca, millai animalcunaman micuchunmi cusha. Shinlli torrecunahuan jarcashca pueblocunapi, jatun utujucunapi causajcunaca, millai ungüihuanmi huañunga.

28Chai llactataca, ninanda llaquichishpa tucuchishpami chulunlla pushtuta saquisha. Ninanda jariyashpa causanaca tucuringami. Israel llactapi tiyaj urcucunatapash, tucuilla tucuchijpimi, pipash na purinajunga.

29Chashna na alita rurashcamanda, chai llactata tucuilla tucuchishcata ricushpami, Ñucataca, Mandaj Dios cajta yachanajunga’ ninmi nishpa villangui.

30Huañuna aichayuj runa, cambaj llacta gentecunaca, patacunapi, huasi pungucunapi shayarishpami, can rimashcataca na alicachishpa asinajun. Paicunapurapash, caishuj chaishujmi: ‘Mandaj Dios imatalla villashcata uyangapa shamuichi’ ninajun.

31Paicunaca, Ñuca agllashca gentecunashnami cambajman shamunajunga. Can chashna rimashcata uyashpapash, na pactachinajungachu. Ashtahuangarin, uyanayai shimicunahuan rimashpapash, shungupica charijyanatalla munashpami purinajunga.

32Canga, juyarinamanda taquijunshnami, paicunapaca cangui. Juyaillaguta, alipacha candanshnami cangui. Paicunaca, can villashcacunata uyashpapash, chaitaca na pactachinajungachu.

33Can rimashca shimicunaca pactamungami, (ñami chayamujun). Shina pactamujpimi, cai llactapi profeta tiyashcata yachanajunga” nihuarcami.