1Mandaj Dios ima nijujta uyaichi:
“Imata Ñucata, rimana cashpapash, urcucuna, lomacuna uyachun rimaichilla.
2Cai pachapi urcucunapash, cai pacha tiyachun callaripi churashca rumicunapash,
Mandaj Dios Ñuca, fiñashpa rimashcatami uyanga.
Mandaj Dios Ñuca agllashca Israelcunataca, Ñucami fiñarishpa, llaquichigrini.
3Ñuca agllashcacuna, ¿cangunataca ima na alitata rurarcani?
¿cangunataca imata rurashpata fiñachircani?
Ñucata imata nina cashpapash, villaichilla.
4Cangunataca, Egipto llactamandami pushamurcani.
Ñucami chaipi gañan tucushpa causanajushcamanda llujchimurcani.
Cangunata pushamuchunga Moisesta, Aaronda, Mariatami cacharcani.
5Cangunaca, Moab llactata jatun mandaj Balac, imatalla yachachishcatami yarina canguichi.
Beor shuti runapaj churi Balaam shuti runa, Sitim shuti pueblomanda Gilgal shuti puebloman yalijujpi, imata nishcatami yarina canguichi.
Chaita yarishpami Mandaj Diosca, imata cashpapash pactachij cajta yachanguichi” ninmi.
Imatalla rurachun Mandaj Dios mañashcamanda6Mandaj Diospaj ñaupajmanga, ¿imahuanda rina cani?
Jahuapacha Mandaj Diostaca, ¿imashnata ninanda alicachina cani?
¿Shuj huatata charij shicuta huañuchishpachu, tucuillata rupachishpa ofrendata cuna cani?
7¿Mandaj Diosca, huaranga huaranga llamacunata, ofrendata cujpi chasquingachu.
Na cashpaca chunga huaranga jatun larca yacushna, aceiteta cujpi cushijungachu?
¿Ñuca na cazushpa, ñucallata juchata rurashcamandaca, ñucapaj callaripi huacharishca huahuatachu cuna cani?
8Huañuna aichayuj runa
Paica, ñami cambaj ima ali canatapash villarca.
Mandaj Diosca, caitallami can rurachunga shuyajun.
Imatapash alitalla rurashpa, pitapash juyashpa, Diospaj ñaupajpi na jariyashpa causachunmi munan.
9Mandaj Diosmi, Judá llactapi causajcunataca tucuicunata cayajun.
Paita cazushpa causajcunallami, ali yachajushpa causanga.
Pita cashpapash Dios llaquichijpica, cazunami canguichi.
10Diosta na manllaj runapaj huasipica, ¿na alita rurashpa charishcacuna tiyangachu?
¿Shinallata Ñuca na ricunayachishca, na ali tupushca shuhuaj runacunaca causangachu?
11Na ali pezaj balanzapi pezashpa jatujcunatapash,
na ali pezaj muchilacunapi umachishpa jatujcunatapash,
¿alimi rurajungui nishpa saquishallachu?
12Ninan charijcunaca, shujcunata llaquichishpami, ninanda charijyashca.
Paicunaca ninan llullacunami.
Shimipash ninanda llullangapa yacharishcacunami.
13Chaimandami: “cangunataca ninanda llaquichisha.
Cangunapaj juchamandami ninanda llaquichishpa tucuchisha.
14Micushpapash na vijsa pactashpami causanguichi.
Cangunapaj causaipica ninandami llaquiringuichi.
Imata tandachishpapash, na mirachi ushashpami causanguichi.
Imata tandachishpapash, shujcuna macashpa apachunmi tandachinguichi.
15Tarpushpapash, fucushcataca na tandachishpami causanguichi.
Olivocunata cutashpapash, chai aceitetaca na alichishpami causanguichi.
Uvacunata capishpapash, chai vinotaca na ufiashpami causanguichi.
16Jatun mandaj Omri shuti runa mandashcatallami pactachishpa causanguichi.
Acab shuti runapaj ayllucuna, imata rurashcatallami, rurashpa causanguichi.
Chaimandami cangunataca, ninanda llaquichisha.
Cai llactapi causajcunataca, ninandami na alicachishpa ricunga.
Cangunataca, shuj pueblopi causajcuna na alicachishpa rimajpimi causanguichi” ninmi.
Who We AreWhat We EelieveWhat We Do
2025 by iamachristian.org,Inc All rights reserved.