MIQUEAS 5 - Quichua Imbabura 2016

Belén pueblomanda, shuj Quishpichij shamuna cashcamanda

1Macanajuj runacunaca tucuillami shayarina canguichi.

Pueblotaca jatun pircacunahuanmi muyundi jarcana canguichi.

Ñami pueblotaca chaupipi churamunajun.

Israel llactata pushajtaca, ñavipi caspihuan huajtashpami chugrichinga.

2Cunanga, Efratapi tiyajuj Belén pueblolla,

Judá llactapi tiyanajuj pueblocunamandaca, yali uchillagumi cangui.

Canmandami, Israel llactata Jatun Mandajca shamunga.

Imapash nara tiyajpillata ña causajujmi shamunga” ninmi.

3Shuj huarmi vijsayu tucushpa, ungungacamanmi paicunata llaquichinajuchun saquinga.

Huaquin puchushca huauquicunaca, Israelcunahuanmi tandanajunga.

4Chai mandajmi, Mandaj Diospaj ninan ushaihuan michijunga.

Chaimandami paicunaca, cushijushpa causaita charinga.

Paiman ninan ushaita cujpimi, cai pachataca aliguta mandajunga.

5Paimi, ñucanchimanga cushijushpa causana ushaita, charichun caranga.

Asirio runacuna ñucanchi llactaman shamushpa, mandashpa tiyana huasicunata urmachishpa sarunajujpica,

canchis michijcunata, pusaj mandajcunatami paicunata llaquichinajuchun cachashun.

6Paicunami, Nimrod shuti runa causajushca Asiria llactapi causajcunataca, espadacunahuan huañuchishpa tucuchinajunga.

Paicunallatami, asirio runacuna shamushpa, ñucanchi alpa mujungunapi sarushpa purinajujtaca llujchishpa cacharichinga.

7Jacobmanda mirai puchushcacunaca, ashtaca llactacunapaj chaupipimi, Mandaj Dios cachamushca tamiashna canga.

Jihuapi tamiamushcashnami canga.

Chai tamiaca, huañuna aichayuj runacuna cachamuchunga, na shuyanllu.

8Chashnallatami Jacobmanda miraicunaca, huaquinlla puchushca cashpapash,

ashtaca gentecunapaj chaupipi, sacha animalcunapaj chaupipi, millai leonshna causanajunga.

Tauca llamacunapaj chaupiman, huahua león yaicushpa micujujshnami canga.

Chashna micujujpica, pipash na pacajushpa calpai ushangachu.

9Cambaj maquihuanmi, canda fiñajcunataca llaquichingui.

Canda na ricunayachij gentecunataca, tucuillami tucuchingui.

10Mandaj Diosca, cashnami ninga:

“Chai punllapica, cangunapaj caballocunatapash, carretacunatapash,

tucuilla huañuchishpa tucuchishca cachunmi mandasha.

11Cambaj llactapi tiyaj pueblocunapash, tucuillami tucuringa.

Cambaj shinlli torrecunapash, tucuillami tucuringa.

12Cambaj llactapi tiyaj yachajcunatapashmi tucuchisha.

Cambaj llactapica, brujucunaca na ashtahuan tiyangachu.

13Rumita cangunapaj dios cachun rurashcatapash,

shuj rurashcalla dioscunatapash, cangunapaj chaupimandami anchuchisha.

Shina rurajpimi, cambaj maquihuan rurashca dioscunataca, cutinga na cunguringuichi.

14Asera shuti huarmiman rijchaj, rurashcalla diosta ama yarichunmi,

cambaj pueblocunatapash tucuchisha.

15Ñucata na cazuj llactacunataca, ninanda fiñarishpami,

Ñucata na cazushcamandaca llaquichisha” ninmi.