1Josías runapaj churi Joacim runaca, Judá llactataca ñami chuscu huatata mandajurca. Chai huatapimi, Nabucodonosor runaca, Babilonia llactata mandai callarirca. Chai huatapillatami Mandaj Diosca, Judá llactapi causajcuna ima tucunataca, Jeremiasman villarca.
2Chaitami, profeta Jeremiasca, Judá llactapi gentecunaman, Jerusalenbi causajcunamambash, cashna nishpa villajurca:
3“Amón shuti runapaj churi Josías runaca, Judá llactataca ñami chunga quimsa huatata mandajurca. Chai punllamandapacha cunan punllacamanmi, Mandaj Diosca cai shimicunata villahuarca. Chaica, ñami ishcai chunga quimsa huata tucun. Chaitaca, pundamandapacha na shaijushpa villajujpipash cangunami, na uyangapa munarcanguichi.
4Mandaj Diosca, Paipajta ruraj profetacunataca, pundamandapachami cachamujurcalla. Ashtahuangarin cangunami paicuna villashcataca napacha uyangapa munashpa causarcanguichi.
5Paicunaca cashnami villanajun carca: ‘Na ali causaita, na alita ruranacunata saquishpami, Diospajman tigrarina canguichi. Chaita pactachishpami, causaita causaicaman, cangunamambash, cangunapaj ñaupa taitacunamambash, Mandaj Dios carashca cai llactapica causanguichi.
6Rurashcalla dioscunata, alicachishpa causanataca saquinami canguichi. Cangunapaj maquihuanllata rurashca dioscunahuan, na ninanda fiñachijpica, Ñucapash cangunataca na llaquichishachu’ ninmi nishpami, villanajuj carca.
7‘Shina villajpipash, na uyangapa munashpami causarcanguichi. Cangunallata llaquichi tucungapami, cangunapaj maquihuan rurashca dioscunahuan, Ñucataca ninanda fiñachircanguichi’ ninmi Mandaj Diosca.
8Shinamandami tucuita Mandaj Diosca, cashnatapash nin: ‘Ñuca rimashcataca, napacha uyangapa munashpami causarcanguichi.
9Chaimandami, janaj llactapi causanajuj tucui ayllucunatapash, Babilonia llactata jatun mandaj, Ñucapajta ruraj Nabucodonosor runatapash pushamushpa, cai llactataca tucuchigrini. Paicunataca, cai llactatapash, caipi causajcunatapash, cai muyundi tucui llactacunatapash, llaquichishpa tucuchinajuchunmi pushamugrini. Shina rurashpami, paicunapaj tucui causaipi ninanda na alicachi tucushpa causachun saquisha. Mandaj Dios Ñucami, chashna nini.
10Paicunamandaca, ninanda cushijuna punllacunatapash, cazaraipi cushijunatapashmi anchuchigrini. Shinallata cutana rumi huacajujpash, micha punchayachijujpash illangami.
11Tucui cai llactami, manllanayaita llaquichi tucunga. Cai llactapi causajcunaca, canchis chunga huatatami, Babilonia llactata jatun mandajpajta rurashpa causanajunga.
12Mandaj Diosca, cashnatapash nin: Chai canchis chunga huata pactajpimi, Babilonia llactata jatun mandajtapash, chai llactapi causajcunatapash, paicuna na alita rurashcamanda llaquichisha. Caldeo runacunapaj llactataca, tucui causaipimi llaquichisha.
13Chai llactata llaquichishami nishcataca pactachishami. Tucui llactacunata, Ñuca llaquichinata, Jeremías villashpa cai libropi quilcashcataca pactachishami.
14Babilonia llactataca, shuj llactacunata jatun mandajcuna shamushpami mishashpa mandanajunga. Shinami paicunataca, paicuna na alita rurashcashnallata, Ñuca llaquichisha’ ninmi” nijurcami.
Shuj llactacunapi causajcunata ninanda fiñarishpa llaquichinamanda15Israelcunata Mandaj Taita Diosca, cashnami nihuarca: “Ninandapacha Ñuca fiñarishcatami, cai vino copaca ricuchijun. Chaitaca, Ñuca canda cachashca tucui llactacunamanmi apana cangui.
16Chaita ufiashpaca, espadahuan llaquichi tucunata, paicunaman cachajpimi, manllarishpa imata na rurai ushanajunga” nihuarcami.
17Shina nijpimi, Mandaj Diospaj maquimanda chai copata japishpa, Mandaj Dios cachashca tucui llactacunaman aparcani.
18Jerusalenbipash, Judá llacta pueblocunapipash, jatun mandajcuna, cati mandajcuna ninan llaquita apachunmi chashna curcani. Na cazushpa, asishpa ricui tucunajuchun, na alicachi tucunajuchunmi chashna curcani.
19Shinallata, Egipto llactata jatun mandaj Faraonmambash, cati mandajcunamambash, paipajta rurajcunamambash, paipaj tucui gentecunamambashmi chashna curcani.
20Shuj llactacunamanda gentecunamambash, Uz shuti llactata jatun mandajcunamambash, Filistea llactapi tiyaj Ascalón, Gaza, Ecrón pueblocunata mandajcunamambash, Asdod shuti pueblopi huaquin puchushca gentecunamambashmi chashna curcani.
21Shinallata, Edom, Moab, Amón shuti llactacunapi causajcunamambashmi curcani.
22Tiro shuti, Sidón shuti pueblocunata jatun mandajcunamambash, mama cucha manñacunapi tiyaj tucui llactacunata jatun mandajcunamambashmi curcani.
23Dedán, Tema, Buz shuti ayllucunamambash, ñavi milmacunata ruturij runacunamambashmi curcani.
24Arabia llactata jatun mandajcunamambash, chaquishca pambapi causanajuj tucui ayllucunata jatun mandajcunamambashmi curcani.
25Zimri, Elam, Media shuti llactacunata jatun mandajcunamambashmi curcani.
26Janajman tiyaj tucui llactacunata jatun mandajcunamambash, chai quimiriallapi causajcunamambash, carupi causajcunamambashmi curcani. Tucui cai pacha llactacunapimi, caishujman chaishujman curcani. Paicunapaj jipaca, Babilonia llactata jatun mandajmi chai llaquitaca apanga.
27“Paicunataca cashna ningui: Tucuita Mandaj, Israelcunapaj Diosca cashnami nin: ‘Cai copamanda ufiashpa machashpa, shungu tigrachishpa urmashpaca, cutinga na jataringuichu. Cangunata espadahuan llaquichinajuchun, cachashcamandami, na jataringuichi’ ninmi ningui.
28Cambaj maquipi charijuj chai copamanda ufiangapa na munajpica, cashna ningui: Tucuita Mandaj Diosca, cashnami nin: ‘Ufianapachami canguichi.
29Ñuca shutipi mañanajuj gentecunatarami, llaquichi callarircani. ¿Cangunarachu na llaquichi tucuna canguichi? Cai llaquimandaca, napacha quishpiri ushanachu canguichi. Tucui cai pachapi causajcunatami, espadahuan huañuchigrini’ ninmi tucuita Mandaj Diosca, ningui.
30Canga, Ñuca imatalla nishcatami cashna nishpa, villana cangui:
‘Mandaj Diosca, jahuamandami leonshna huacamunga.
Pai causajuj jucha illaj huasimandami shinllitapacha rimamunga.
Pai causana huasita fiñashpami, ninandapacha leonshna huacamunga.
Cai pachapi tucui causajcunatami, uvata sarujcuna candanshna candashpa llaquichinga.
31Ninanda caparishcacunaca, cai pacha tucuri manñacunacamanmi uyaringa.
Mandaj Diosca, tucui cai pachapi causajcunapaj Juez cashpami, tucui llactacunapi causajcuna imatalla rurashcata ricushpa llaquichinga.
Paita na manllajcunataca, espadahuan huañuchijcunapaj maquipimi saquinga’ ninmi Mandaj Diosca nishpa villangui” nihuarcami.
32Tucuita Mandaj Diosca, cashnatapashmi nihuarca:
“Ricuichi, llactan, llactanmi ninanda llaquichishpa ringa.
Cai pacha tucuri manñamandami, ninan huairahuan tamia jataringa.
33Chai punllapica, Mandaj Dios ñuca huañuchishcacunaca, tucui cai llactacunapimi sirinajunga.
Paicunamandaca, pipash na huacangachu.
Paicunataca, pipash na apashpa pambangachu.
Huanushnami, alpapi shitashca siringa.
34Michijcunaca, ninanda caparishpa huacaichiyari.
Ashtaca llamacunata michijcunapash, ñutu alpapi shitarichiyari.
Cunanmi, cangunapaj cungata muchuna punllapash, caita chaita calpachina punllapash pactamushca.
Cangunaca, juyailla vasota faquijpishnami tucuringuichi.
35Michij runacunapash na pacajui ushangachu.
Ashtaca llamacunata michijcunapash, na pacajui ushangachu.
36Mandaj Diosca, michina pambacunatapashmi tucuchinga.
¡Shinamandami michijcunaca, ninanda caparishpa huacanajunga!
¡Ashtaca llamacunata michijcunapashmi, ninanda huacanajunga!
37Mandaj Diosca, ninandapacha fiñarishpami, michina juyailla pambacunataca tucuchinga.
38Huahua león paipaj causana pushtuta saquishpa rijshnami, Diosca shitashpa saquirca.
Diosca fiñarishpami, paicunataca llaquichirca.
Paicunata fiñajcunata cachamushpami chashna tucuchirca”. nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
